I Stap na Wok Bilong Jisas

Em i Gat Bel, Tasol Em i No Marit

MARIA i gat bel inap tripela mun pinis. Pastaim em i stap wantaim Ilisabet, tasol nau em i go bek long ples bilong em long Nasaret. Liklik taim na bai ol man bilong ples i save, em i gat bel, na bai em i gat hevi!

Na samting i mekim dispela hevi i bikpela moa, em olsem: Ol i bin makim em bilong maritim Josep, em wanpela kamda. Na Maria i save, God i bin givim lo long ol Isrel, olsem: Sapos ol i makim pinis meri bilong maritim wanpela man na long laik bilong dispela meri em i slip wantaim narapela man, olsem mekim pasin pamuk, orait, ol i mas tromoi ston long em na kilim em i dai. Maria bai tok wanem long Josep long dispela samting i kamap long em, olsem em i gat bel?

Maria i bin i stap tripela mun wantaim Ilisabet. Em longtaim liklik. Olsem na bai Josep i amamas long lukim em i kam bek. Taim tupela i bung, ating Maria i tokim Josep em i gat bel, na em i stori olsem dispela samting i kamap long em long rot bilong spirit holi bilong God. Tasol i hatwok long Josep i bilipim dispela tok.

Josep i save Maria i gat gutpela nem, na ating Josep i laikim tru Maria. Tasol Maria i gat bel na Josep i ting em i bin slip wantaim wanpela man. Josep i no laik bai ol man i tromoi ston long Maria na kilim em i dai, na em i no laik semim Maria. Olsem na em i laik lusim em isi tasol. Em i laik katim marit. Long dispela taim bipo, sapos ol i makim pinis wanpela man bilong maritim wanpela meri, long ai bilong ol man i olsem tupela i marit pinis. Olsem na Josep i mas katim marit.

Josep i tingting yet long dispela na em i slip. Long driman wanpela ensel bilong Jehova i kamap long em. Ensel i tok, ‘Yu no ken pret long kisim meri bilong yu Maria. Dispela pikinini em i kisim pinis long bel bilong em, em spirit holi i bin givim long em. Bai em i karim pikinini man, na yu mas kolim nem bilong em Jisas. Long wanem em bai i tekewe sin bilong ol manmeri na kisim bek ol.’

Josep i lusim slip na kirap na em i amamas tru! Kwiktaim em i mekim olsem ensel i tok. Em i bringim Maria i go long haus bilong em. Dispela samting em i mekim long ai bilong ol man i makim olsem tupela i marit. Tasol Josep i no slip wantaim Maria i go inap long taim Maria i karim Jisas.

Lukim! Taim bilong Maria i karim pikinini i klostu, tasol Josep i sindaunim em long donki. Tupela i laik i go we? Klostu Maria i laik karim pikinini na bilong wanem tupela i laik raun? Luk 1:39-41, 56; Matyu 1:18-25; Diuteronomi 22:23, 24.

◆ Taim Josep i save Maria i gat bel, em i ting olsem wanem? Bilong wanem em i ting olsem?

◆ Josep tupela Maria i no marit yet, orait, olsem wanem na Josep i laik katim marit?

◆ Josep i mekim wanem long ai bilong ol man na dispela i makim olsem tupela i marit?