Sapta 4
Maria i Gat Bel, Tasol Em i No Marit Yet
TAIM Maria i gat bel nupela yet, em i go i stap wantaim Elisabet. Nau em i gat bel inap 3-pela mun pinis na em i go bek long ples bilong em long Nasaret. Liklik taim na bai ol man bilong ples i save em i gat bel. Em i tingting planti long dispela!
Na sori! Samting nogut inap painim em, long wanem, ol i makim em pinis bilong maritim Josep, em wanpela kamda, na Maria i save, God i bin givim lo long ol Israel, olsem: Sapos ol i makim pinis meri bilong maritim wanpela man na long laik bilong dispela meri em i slip wantaim narapela man, olsem mekim pasin pamuk, orait, ol i mas tromoi ston long em na kilim em i dai. Orait, Maria bai tok wanem long Josep long em i gat bel?
Maria i bin i stap 3-pela mun wantaim Elisabet. Em longtaim liklik. Olsem na bai Josep i amamas long lukim em i kam bek. Taim tupela i bung, ating Maria i tokim Josep em i gat bel, na em i stori olsem dispela samting i kamap long em long rot bilong spirit holi bilong God. Tasol i hatwok long Josep i bilipim dispela tok.
Josep i save Maria i gat gutpela nem. Na em i laikim tru Maria. Tasol Maria i gat bel na Josep i ting em i bin slip wantaim wanpela man. Josep i no laik bai ol man i tromoi ston long Maria na kilim em i dai, na em i no laik semim Maria. Olsem na em i laik lusim em isi tasol. Em i laik katim marit. Long dispela taim bipo, sapos ol i makim pinis wanpela man bilong maritim wanpela meri, orait, long ai bilong ol man i olsem tupela i marit pinis. Olsem na Josep i mas katim marit.
Josep i tingting yet long dispela na em i slip. Long driman wanpela ensel bilong Jehova i kamap long em. Ensel i tok: “Yu no ken pret long kisim Maria olsem meri bilong yu. Harim. Dispela pikinini i stap long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas, long wanem, em bai i tekewe sin bilong ol manmeri bilong en na kisim bek ol.”
Josep i lusim slip na kirap na em i amamas tru! Kwiktaim em i mekim olsem ensel i tok. Em i bringim Maria i go long haus bilong em. Dispela samting em i mekim long ai bilong ol man i makim olsem tupela i marit. Tasol Josep i no slip wantaim Maria i go inap long taim Maria i karim Jisas.
Lukim! Taim bilong Maria i karim pikinini i klostu, tasol Josep i sindaunim em long donki. Tupela i laik i go we? Klostu Maria i laik karim pikinini na bilong wanem tupela i laik raun? Luk 1:39-41, 56; Matyu 1:18-25; Lo 22:23, 24.
▪ Taim Josep i save Maria i gat bel, em i ting olsem wanem? Bilong wanem em i ting olsem?
▪ Josep tupela Maria i no marit yet, orait, olsem wanem na Josep inap katim marit?
▪ Josep i mekim wanem long ai bilong ol man na dispela i makim olsem tupela i marit?