Yu Save Long Dispela?

Wanem samting i helpim Stiven long stap isi taim ol man i birua long em?

SAMPELA bikman i bung na ol i birua long Stiven. Sanhedrin em suprim kot bilong Israel, na i gat 71 jas bilong skelim kot. Ol dispela jas i gat biknem na namba long kantri Israel, na Hetpris Kaiafas i bungim ol dispela man. Em i bin go pas long kotim na kilim i dai Jisas inap sampela mun i go pinis. (Mat. 26:57, 59; Apo. 6:8-12) Taim ol i wok long bringim ol man i kam bilong sutim tok long Stiven, ol i lukim narakain samting—pes bilong Stiven i olsem “pes bilong wanpela ensel.”—Apo. 6:13-15.

Wanem samting i mekim na Stiven i stap isi taim ol man i birua long em? Paslain long ol i kisim Stiven i go long Sanhedrin, holi spirit i pulap long em na em i givim bel tru long mekim wok bilong helpim ol wanbilip. (Apo. 6:3-7) Taim em i sanap long kot, holi spirit i mekim isi bel bilong em na helpim em long tingim bek ol tok. (Jon 14:16) Taim Stiven i sanap strong na mekim tok olsem i stap long Aposel sapta 7, holi spirit i helpim em long tingim bek winim 20 tok i stap long Ol Skripsa Hibru. (Jon 14:26) Tasol bilip bilong Stiven i kamap strong moa taim em i lukim wanpela visen we Jisas i sanap long han sut bilong God.—Apo. 7:54-56, 59, 60.

Bihain ating ol man bai mekim ol tok bilong pretim yumi na birua long yumi. (Jon 15:20) Taim yumi ritim Tok Bilong God long olgeta de na autim tok long olgeta taim, orait holi spirit bilong Jehova bai stiaim yumi. Na tu, yumi inap sanap strong na stap bel isi maski ol man i birua long yumi.—1 Pita 4:12-14.