God Bai Mekim Wanem?

Sapos yu bungim hevi, ating yu laik bai wanpela gutpela pren i mekim samting bilong helpim yu. Sampela i tok, God i no wanpela pren bikos ol i pilim olsem em i no inap mekim wanpela samting bilong helpim ol. Tru tru, God i mekim pinis planti samting bilong helpim yumi, tasol em bai mekim tu ol samting bilong helpim yumi long karim ol pen na hevi yumi bungim long nau. God bai mekim wanem?

PINISIM OLGETA PASIN NOGUT

God bai pinisim olgeta pasin nogut taim em i bagarapim man i as bilong ol dispela pasin. Baibel i tokaut long dispela man, em i tok: “Dispela graun olgeta i stap long han bilong Satan.” (1 Jon 5:19) “Satan” i makim wankain man em Jisas i kolim olsem “hetman bilong dispela graun.” (Jon 12:31) Satan em as bilong olgeta pasin nogut, em i kirapim ol man long graun long kamapim kain kain hevi. God bai mekim wanem?

Klostu nau Jehova God “bai bagarapim Devil, em dispela man i gat strong bilong kamapim dai.” Em bai mekim olsem long rot bilong Pikinini bilong em, Jisas Krais. (Hibru 2:14; 1 Jon 3:8) Baibel i kamapim olsem Satan i save “em i gat sotpela taim tasol bilong i stap” paslain long em i bagarap. (Revelesen 12:12) God bai pinisim olgeta pasin nogut na bagarapim ol man i kamapim ol dispela pasin.—Buk Song 37:9; Provep 2:22.

MEKIM GRAUN I KAMAP PARADAIS

Bihain long God i pinisim olgeta pasin nogut, Krieta bilong yumi bai mekim ol samting em i tingting pinis long mekim long ol manmeri na dispela graun. Yumi inap luk fowed long wanem samting?

Gutaim na bel isi. “Ol man i gat pasin daun, ol bai kisim graun olgeta, Na ol bai i stap bel isi tru na dispela bai mekim ol i stap amamas moa yet.”—Buk Song 37:11.

Planti gutpela kaikai. “Bai i gat planti wit samting long graun; Na antap long ol maunten, ol wit samting bai pulap.”—Buk Song 72:16.

Ol gutpela haus na amamas long wok. “Ol bai wokim ol haus na stap long ol, Na ol bai planim ol gaden wain na kaikai prut bilong ol. . . . Na ol manmeri mi bin makim, ol bai amamas tru long ol wok em han bilong ol yet i mekim.”—Aisaia 65:21, 22.

Yu laik tru long lukim dispela kain sindaun? Klostu nau dispela samting bai painim yumi long olgeta de.

PINISIM TRU SIK NA DAI

Long nau olgeta man i save sik na dai, tasol klostu dispela bai pinis. God bai givim yumi helpim long rot bilong pe bilong baim bek man na “olgeta man husat i bilip long em ol inap abrusim bagarap na kisim laip oltaim.” (Jon 3:16) Wanem samting bai kamap?

Sik bai pinis tru. “I no gat wanpela man i stap long dispela ples bai tok: ‘Mi sik.’ God bai fogivim ol rong bilong ol manmeri i stap long dispela ples.”—Aisaia 33:24.

Dai bai i no inap givim hevi moa long ol manmeri. “Em bai daunim dai olgeta, na Nambawan Bikpela Jehova bai mekim drai aiwara long pes bilong olgeta man.”—Aisaia 25:8.

Ol manmeri bai i stap laip oltaim. “Presen God i givim em laip oltaim long rot bilong Krais Jisas, Bikpela bilong yumi.”—Rom 6:23.

Ol manmeri i dai pinis bai kisim laip gen. “Bai i gat kirap bek bilong ol man i dai pinis, em ol stretpela man na ol man nogut wantaim.” (Aposel 24:15) Ol bai kisim helpim long presen God i givim em pe bilong baim bek man.

Hau bai God i inapim olgeta dispela samting?

KAMAPIM WANPELA GUTPELA GAVMAN

God bai inapim ol samting em i tingting pinis long mekim long ol man na long dispela graun long rot bilong gavman bilong em long heven, na Krais Jisas em man em i makim bilong stap King. (Buk Song 110:1, 2) Em dispela gavman, o kingdom, Jisas i bin skulim ol disaipel long beten long en olsem: “Papa bilong mipela long heven, . . . Kingdom bilong yu i mas i kam.”—Matyu 6:9, 10.

Kingdom Bilong God bai bosim olgeta hap bilong graun na pinisim tru olgeta pen na hevi. Dispela Kingdom em nambawan gavman ol man inap long i gat! Em risen na Jisas i givim bel long autim “gutnius bilong Kingdom” long taim em i stap long graun, na em i tokim ol disaipel long mekim wankain wok.—Matyu 4:23; 24:14.

Jehova God i laikim tru ol man em i wokim, olsem na em i promis long mekim ol gutpela wok bilong helpim ol. Olsem wanem? Ol dispela samting i kirapim yu long kisim sampela save moa long em na yu laik i go klostu long em? Sapos yu mekim olsem, hau bai dispela i helpim yu? Neks atikol bai stori long dispela.