Taim Poroman Marit i No Stap Gut

“Mi laik dai taim man bilong mi i tokim mi olsem em bai lusim mi na kisim wanpela yangpela meri. I lukim olsem em i no fea, moa yet taim mi tingim ol sakrifais mi bin mekim long helpim em.”—Maria, Spen.

“Taim meri bilong mi i lusim mi wantu tasol, i olsem wanpela samting insait long mi i dai. Ol samting mipela i tingting long en, mipela i laik mekim, na ol plen bilong mipela i bagarap. I gat ol taim we mi pilim olsem mi no wari na tingting planti, tasol i no long taim bel hevi i daunim mi olgeta gen.”—Bill, Spen.

TAIM poroman marit i no stap gut long marit, dispela i save kamapim bikpela bel hevi tru. Sampela poroman marit i pilim olsem ol i ken fogivim poroman bilong ol husat i sori long rong bilong em, na strongim gen marit bilong ol.a Tasol maski ol i brukim marit o nogat, ol poroman marit husat i painimaut long poroman bilong ol i no stap gut long marit, ol i pilim bikpela pen na bel hevi tru. Hau bai ol dispela poroman marit i stap gut i karim dispela bikpela bel hevi?

OL BAIBEL VES INAP HELPIM YU

Maski bel hevi i daunim ol, planti poroman marit husat i stap gut i kisim bel isi long ol tok bilong Baibel. Ol i luksave olsem God i lukim aiwara bilong ol na pilim pen bilong ol.—Malakai 2:13-16.

“Taim wari na tingting planti i daunim mi, yu save strongim mi na mekim bel bilong mi i stap isi.”—Buk Song 94:19.

Bill i tok: “Taim mi ritim dispela ves, mi piksaim long tingting Jehova i mekim isi pen bilong mi, olsem papa i gat pasin sori i mekim.”

“Man i save stap gut long narapela, yu save stap gut long em.”—Buk Song 18:25.

Carmen, em man bilong em i paul nabaut inap planti mun, i tok: “Man bilong mi no stap gut long mi. Tasol mi inap trastim Jehova long stap gut long mi. Em i no inap lusim mi.”

“Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, . . . na dispela bel isi bilong God i winim tru tingting bilong man, em bai lukautim bel bilong yupela.”—Filipai 4:6, 7.

Sasha i tok: “Mi ritim dispela skripsa planti taim. Taim mi beten planti taim moa, God i givim mi bel isi.”

Ol dispela manmeri em tok bilong ol i stap antap, sampela taim ol i pilim olsem ol i laik givap. Tasol ol i trastim Jehova God na kisim strong long Tok bilong em. Bill i tok: “Bilip bilong mi i mekim na laip bilong mi i gat as bilong en maski olgeta narapela samting i bagarap. Sampela taim mi ‘wokabaut long veli i tudak nogut tru,’ tasol God i stap wantaim mi.”—Buk Song 23:4.

a Bilong save sapos yu mas fogivim poroman marit o nogat, lukim ol stori long Kirap! bilong Me 8, 1999, “Taim Poroman Marit i Bagarapim Marit.”

Hau Sampela i Bin Karim Hevi

Tingim tingim long bel ol skripsa i mekim isi bel.

Bill i tok: “Taim mi ritim Buk Jop na Buk Song, mi makim olgeta hap we i stret long ol hevi bilong mi yet. Mi luksave olsem ol dispela man bilong raitim Baibel i bin ekspiriensim wankain pen, wari na tingting planti olsem mi pilim.”

Musik i mekim isi bel.

Carmen i tok: “Taim mi no inap slip long nait, mi harim musik. Dispela em gutpela rot tru bilong mekim bel i stap isi.” Daniel i tok: “Mi lain long paitim gita na mi luksave taim mi pilaim gut gita bilong mekim musik, dispela i helpim mi na tingting na bel bilong mi i stap isi tru.”

Kamapim ol filings bilong yu.

Daniel i tok: “Mi no lain long kamapim ol filings bilong mi. Tasol mi gat sampela gutpela pren, na long olgeta de mi save toktok long ol. Mi kamapim ol filings bilong mi long ol, long rot bilong raitim pas long ol na taim mi toktok wantaim ol. Dispela i helpim mi tru.” Sasha i tok: “Helpim mi kisim long famili bilong mi i bikpela samting tru. Mama bilong mi i save stap taim mi nidim em. Sapos mi laik toktok, em i save stap bilong putim yau long mi. Na tu, papa bilong mi i mekim mi pilim seif, em i helpim mi na i no subim mi long lusim tingting hariap long hevi.”

Beten oltaim.

Carmen i tok: “Mi save beten oltaim. Mi pilim olsem God i stap klostu long mi, putim yau long mi, na helpim mi. Long dispela taim mi gat bikpela hevi, mi go klostu tru long God.”