Daunim Ol Tingting Kranki i Laik Pasim Save Bilong God!

1. Aposel Pol i givim wanem tok lukaut long ol Kristen em God i anointim?

APOSEL POL i tok, “No ken.” Yumi no ken mekim wanem? “[Yumi] no ken wokabaut moa long wankain pasin olsem ol man bilong dispela taim i save bihainim.” (Rom 12:2) Pol i raitim dispela pas long ol Kristen long taim bilong em. Wai na Pol i givim dispela strongpela tok lukaut long ol Kristen em God i anointim?—Rom 1:7.

2-3. (a) Satan i save mekim wanem bilong pulim yumi long lusim Jehova? (b) Hau bai yumi inap rausim ol samting nogut i pas “strong” long tingting bilong yumi?

² Pol i tingting planti bikos sampela Kristen i larim ol tingting kranki na savetingting bilong graun i stiaim tingting bilong ol. (Efe. 4:17-19) Dispela samting inap kamap tu long yumi. Satan em god bilong dispela graun na em i laik tru long pulim yumi long lusim Jehova, olsem na em i yusim kain kain trap. Wanpela trap em olsem: Sapos yumi laik tru long kisim biknem, Satan inap yusim dispela laik long pulim yumi i go longwe long God. Na tu, em inap yusim sampela samting long famili, kalsa, na ediukesen long kirapim yumi long bihainim tingting bilong em.

³ Yu ting yumi inap rausim ol samting nogut i pas “strong” long tingting? (2 Kor. 10:4) Pol i tok: “Mipela i save daunim ol tingting kranki na olgeta samting i pasim rot bilong save bilong God, na mipela i bosim olgeta tingting na mekim tingting i bihainim tok bilong Krais.” (2 Kor. 10:5) Jehova inap helpim yumi long rausim ol tingting kranki. Marasin inap rausim posin i stap long bodi, na olsem tasol, Tok Bilong God inap helpim yumi long rausim savetingting bilong graun we inap posinim tingting bilong yumi.

“KISIM NUPELA TINGTING”

4. Planti bilong yumi i bin mekim wanem ol senis taim yumi kisim save long tok bilong Baibel?

⁴ Tingim ol senis yu bin mekim taim yu kisim save long tok bilong Baibel na yu mekim disisen long lotuim Jehova. Planti bilong yumi i bin lusim ol pasin i no stret. (1 Kor. 6:9-11) Yumi amamas tru olsem Jehova i helpim yumi long mekim olsem!

5. Olsem Rom 12:2 i kamapim, yumi mas mekim wanem 2-pela samting?

⁵ Maski yumi bin mekim ol bikpela senis, yumi no ken ting olsem dispela tasol em inap. Yumi lusim ol pasin nogut na kisim baptais, tasol yumi mas was gut na abrusim olgeta kain samting we inap pulim yumi long bihainim gen ol pasin nogut. Yumi ken mekim wanem? Pol i tok: “Yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis.” (Rom 12:2) Yumi mas mekim 2-pela samting. Namba 1: “No ken wokabaut moa” long wankain pasin olsem ol man bilong dispela graun. Namba 2: Kisim nupela tingting na bai “pasin bilong [yumi] i senis.”

6. Tok bilong Jisas long Matyu 12:43-45 i kamapim klia wanem bikpela lesen?

⁶ Tok bilong Pol i no makim olsem yumi mas senisim lukluk bilong yumi, nogat. Yumi mas senisim pasin tru bilong yumi. (Lukim blok “Senis Tru o Giaman?”) Yumi mas senisim tingting, filings, na laik bilong yumi. Yumi olgeta wan wan i mas askim olsem, ‘Mi senisim tasol lukluk bilong mi, o mi senisim tru olgeta pasin na tingting i stap long bel?’ Yumi mas skelim gut yumi yet. Long Matyu 12:43-45, Jisas i tokim yumi long samting yumi mas mekim. (Ritim.) Tok bilong Jisas i kamapim klia wanpela bikpela lesen: Yumi mas rausim ol tingting kranki, na pulapim tingting long ol samting God i orait long en.

“TINGTING BILONG YUPELA I MAS WOK LONG KAMAP NUPELA”

7. Hau bai yumi inap senisim ol tingting, ol pasin, na ol laik bilong yumi?

⁷ Yu ting yumi inap senisim ol tingting, ol pasin, na ol laik bilong yumi? Baibel i tok: “Oltaim tingting bilong yupela i mas wok long kamap nupela. Na yupela i mas kisim nupela pasin em laik bilong God yet i as bilong en na i poroman wantaim stretpela pasin na pasin bilong stap gut long narapela.” (Efe. 4:23, 24) Yumi inap senisim ol tingting, ol pasin, na ol laik bilong yumi, tasol i no isi long mekim olsem. Yumi mas sakim ol laik nogut na stop long mekim ol pasin i no stret. Na tu, “tingting bilong [yumi] i mas wok long kamap nupela.” Dispela i makim olsem yumi mas senisim ol laik bilong yumi, ol pasin bilong yumi, na tingting tru i stap insait long bel. Oltaim yumi mas taitim bun long mekim olsem.

8-9. Hau na ekspiriens bilong wanpela brata i soim olsem yumi mas senisim ol laik na ol tingting tru i stap long bel bilong yumi?

⁸ Yumi ken skelim ekspiriens bilong wanpela brata; pastaim em man bilong kros na pait. Tasol em i lusim pasin bilong dring alkohol na pait, na em i kisim baptais. Ol manmeri long komiuniti bilong em i amamas long lukim bikpela senis em i mekim. Long wanpela apinun, traim i painim em. Wanpela spakman i kam long haus bilong em na i laik pait wantaim em. Pastaim, brata bilong yumi i no laik pait. Tasol taim spakman i tok bilas long nem bilong Jehova, dispela i mekim brata bilong yumi i belhat nogut tru. Olsem na em i go ausait na paitim dispela man. Wai na brata i mekim olsem? Em i kisim save long tok bilong Baibel na dispela i helpim em long lusim pasin bilong pait, tasol em i no bin senisim ol laik na ol tingting tru i stap insait long bel.

⁹ Brata bilong yumi i no givap. (Prov. 24:16) Ol elda i helpim em na isi isi em i mekim ol senis. Bihain, em i winim mak bilong kamap elda. Wanpela apinun em i go ausait long Haus Kingdom, na wankain traim i painim em olsem i bin kamap sampela yia i go pinis. Wanpela spakman i laik paitim narapela elda. Brata bilong yumi i mekim wanem? Em i daunim em yet na long pasin isi em i toktok gut wantaim spakman na mekim isi bel bilong em na bringim dispela man i go long haus. Wai na brata i mekim olsem? Brata bilong yumi i bin senisim ol laik na ol tingting tru i stap insait long bel. Em i lusim olpela pasin na kisim pasin isi na pasin daun, na dispela i givim biknem long Jehova.

10. Yumi mas mekim wanem na bai yumi inap senisim pasin bilong yumi?

¹⁰ Ol senis i no inap kamap nating. Ating yumi mas “wok strong tru” inap planti yia long mekim ol senis. (2 Pita 1:5) Maski yumi mekim wok bilong Jehova inap planti yia, dispela i no makim olsem pasin bilong yumi bai senis, nogat. Yumi mas wok hat tru long senisim pasin tru bilong yumi. I gat sampela samting yumi mas mekim na bai yumi inap senisim pasin bilong yumi. Yumi ken skelim sampela bilong ol dispela samting.

ROT BILONG SENISIM TINGTING

11. Olsem wanem pasin bilong beten inap helpim yumi long senisim tingting tru bilong yumi?

¹¹ Namba 1: Beten. Yumi mas beten na mekim wankain tok olsem man bilong raitim song i tok: “O God, yu ken wokim nupela klinpela bel insait long mi. Na putim nupela tingting insait long mi na bai mi ken sanap strong.” (Sng. 51:10) Yumi mas luksave olsem yumi nid long senisim tingting tru bilong yumi na askim Jehova long helpim yumi. Olsem wanem yumi inap bilip tru olsem Jehova bai helpim yumi? Yumi inap trastim Jehova taim yumi ritim tok promis em i mekim long bikhetlain Israel long taim bilong Esekiel: “Mi bai mekim ol i stap wanbel, na mi bai putim nupela tingting long ol . . . na givim bel i malumalum olsem bilong man [dispela i makim bel bilong man i hariap long larim God i stiaim em].” (Ese. 11:19, ftn.) Jehova i redi long helpim lain Israel long kisim nupela tingting, na em i redi long helpim yumi tu.

12-13. (a) Song 119:59 i tok yumi mas tingim na skelim wanem samting? (b) Yu mas givim wanem ol askim long yu yet?

¹² Namba 2: Tingim na skelim. Taim yumi ritim Tok Bilong God long olgeta de, yumi mas lusim sampela haptaim long tingim na skelim wanem ol tingting na filings yumi mas senisim. (Ritim Buk Song 119:59; Hib. 4:12; Jems 1:25) Yumi mas luksave long ol tingting na filings we inap pulim yumi long bihainim savetingting bilong dispela graun. Yumi mas luksave tu long ol pasin kranki bilong yumi na wok strong long lusim ol dispela pasin.

¹³ Askim yu yet: ‘Mi save bel nogut na jeles long ol narapela?’ (1 Pita 2:1) ‘Mi pilim olsem mi winim ol narapela bikos long famili, ediukesen, na mani kago bilong mi?’ (Prov. 16:5) ‘Mi save luk daun long ol narapela bikos ol i no gat planti mani kago olsem mi o bikos ol i bilong narapela ples?’ (Jems 2:2-4) ‘Mi laikim ol amamas bilong dispela graun?’ (1 Jon 2:15-17) ‘Mi save amamas long lukim ol muvi na ritim ol buk i stori long pasin pamuk na pasin bilong pait?’ (Sng. 97:10; 101:3; Amo. 5:15) Taim yu bekim ol dispela askim, yu inap luksave olsem yu mas stretim sampela tingting na pasin bilong yu. Sapos yumi daunim ol kain tingting we i pas “strong” long bel bilong yumi, yumi bai amamasim Papa bilong yumi long heven.—Sng. 19:14.

14. Wai na yumi mas makim ol gutpela pren?

¹⁴ Namba 3: Makim ol gutpela pren. Ol pren bilong yumi inap stiaim tingting na pasin bilong yumi. (Prov. 13:20) Long ples wok o long skul, yumi stap namel long ol lain em ol i no inap strongim yumi long bihainim tingting bilong God. Tasol yumi inap painim ol gutpela pren long ol miting bilong yumi. Ol bai kirapim yumi long “mekim pasin laikim na mekim ol gutpela wok.”—Hib. 10:24, 25.

“SANAP STRONG LONG BILIP”

15-16. Olsem wanem Satan i traim long senisim tingting bilong yumi?

¹⁵ Satan i laik tru long senisim tingting bilong yumi. Em i save yusim olgeta kain savetingting long bagarapim gutpela tingting yumi lainim long Tok Bilong God.

¹⁶ Satan i wok yet long givim seim askim em i bin givim long Iv long gaden Iden: ‘Tru tru God i tok olsem . . . ?’ (Stt. 3:1) Ol man bilong graun i stap aninit long kontrol bilong Satan, olsem na ol i save givim kain askim olsem: ‘Tru tru God i no orait long 2-pela man o 2-pela meri i marit? Tru tru God i no laik bai yu selebretim Krismas na betde? Tru tru God i no laik bai yu kisim blut? Tru tru God bilong pasin laikim i no laik bai yu bung wantaim ol wanblut na pren em ol i raus long kongrigesen?’

17. (a) Taim ol narapela i askim long risen bilong bilip bilong yumi, yumi mas mekim wanem? (b) Olsem Kolosi 2:6, 7 i tok, wanem samting inap kamap?

¹⁷ Yumi mas holim wanpela tingting long ol samting yumi bilip long en. Sapos yumi gat askim long sampela samting na yumi no mekim wok painimaut long en, yumi inap holim tupela tingting long ol tok yumi lainim pinis. Dispela inap paulim tingting na bagarapim bilip bilong yumi. Orait, yumi mas mekim wanem? Baibel i tok yumi mas kisim nupela tingting, na long dispela rot yumi inap save tru long “laik bilong God, em dispela laik em i gutpela, na em i orait, na i gutpela olgeta.” (Rom 12:2) Taim yumi stadi oltaim long tok bilong Baibel, yumi inap save tru na bilipim ol dispela tok. Yumi inap bilip tru olsem ol lo bilong Jehova i stret olgeta. Wankain olsem diwai i putim rop i go daun tru long graun, yumi bai “sanap strong long bilip.”—Ritim Kolosi 2:6, 7.

18. Yumi mas mekim wanem na bai yumi inap sakim savetingting bilong graun?

¹⁸ I no wok bilong narapela long strongim bilip bilong yu, em wok bilong yu yet long mekim olsem. Olsem na yu mas wok yet long kisim nupela tingting. Beten oltaim; askim Jehova long givim holi spirit long yu. Tingim na skelim; oltaim yu mas skelim tingting bilong yu na tingting tru i stap long bel. Painim ol gutpela pren; poroman wantaim ol manmeri em ol bai helpim yu long kisim nupela tingting. Taim yu mekim olsem, yu bai sakim savetingting bilong graun na daunim “ol tingting kranki na olgeta samting i pasim rot bilong save bilong God.”—2 Kor. 10:5.