Ol Inap Ritim Olpela Skrol

LONG 1970, ol saveman i painim wanpela olpela skrol em paia i bin kukim. Ol i painim dispela skrol long Ein Gedi, Israel, klostu long nambis bilong Detsi long hap wes. Ol i lukim dispela skrol taim ol i digim graun i karamapim wanpela sinagog em bipo ol man i kukim taim ol i bagarapim dispela ples, ating namel long 500 C.E. na 550 C.E. Paia i bin kukim dispela skrol, olsem na i hatwok long ritim ol tok bilong en; skrol bai bruk sapos ol i laik opim. Tasol tenkyu tru olsem long rot bilong 3-D skena, ol inap lukim ol rait i stap insait long skrol maski ol i no inap opim. Ol i yusim program bilong kamapim klia piksa (digital imaging software), na ol inap ritim ol tok bilong skrol.

Ol i painimaut wanem samting? Dispela skrol i gat ol tok i stap nau long Baibel. Sampela rait bilong en i wankain long sampela ves long kirap bilong buk Wok Pris. Ol dispela ves i gat nem bilong God long Tetragramaton bilong tok Hibru. Dispela skrol bilong ol Skripsa Hibru i bilong ol yia namel long 50 C.E. na 400 C.E., olsem na em i olpela moa winim ol manuskrip bilong Kumran. Long niuspepa, The Jerusalem Post, Gil Zohar i raitim ripot olsem: “Paslain long ol i painim skrol bilong Ein Gedi, inap 1,000 yia i lus namel long Ol Olpela Rait Bilong Detsi bilong yia 100 B.C.E. samting, na olpela manuskrip, Aleppo Codex, bilong yia 930 C.E. samting.” Ol saveman i tok ol teks bilong dispela skrol i soim olsem ol rait bilong lain Masoret long buk Tora “i stap wankain insait long wan tausen yia, na i no gat ol popaia bilong ol man i kopim ol tok.”