Kot Bilong God—Em i Save Givim Planti Tok Lukaut?

SAVEMAN bilong stadim weda i lukluk long masin reda. Em i luksave olsem bikpela win na ren i laik kamap long wanpela hap we planti manmeri i stap long en. Em i tingim seifti bilong ol manmeri, olsem na em i yusim olgeta kain rot bilong givim tok lukaut paslain long bikpela win na ren i kamap.

Long wankain pasin, Jehova i wok long givim tok lukaut long ol manmeri long wanpela kain disasta we bai kamapim bikpela bagarap moa winim olgeta narapela disasta. God i givim tok lukaut long wanem rot? Olsem wanem yumi save olsem God i givim bikpela haptaim long ol manmeri long tanim bel? Yumi bai kisim bekim bilong ol dispela askim taim yumi skelim sampela tok lukaut em Jehova i givim long bipo.

GOD I MEKIM OL TOK LUKAUT

Long taim bilong ol man i raitim Baibel, Jehova i givim tok lukaut olsem strafe bai painim ol lain i sakim tok bilong em. (Prov. 10:25; Jer. 30:23) Tasol paslain long em i givim strafe, em i givim toksave na tokim ol manmeri long bihainim laik bilong em na lusim ol pasin nogut. (2 Kin. 17:12-15; Neh. 9:29, 30) Planti taim em i salim ol bilipman i go bilong givim toksave na kirapim ol manmeri long senisim kwik ol pasin bilong ol na bai ol inap abrusim bagarap.—Amo. 3:7.

Wanpela bilipman em Noa. Long taim bilong em, ol manmeri i mekim pasin pamuk na insait tru long pasin bilong pait. Inap planti yia, em i strongim bel na tokaut olsem Bikpela Tait bai kamap bilong bagarapim ol manmeri i mekim ol pasin nogut. (Stt. 6:9-13, 17) Em i tokim ol manmeri long ol samting ol i mas mekim na bai ol inap abrusim bagarap, olsem na Baibel i kolim em olsem “man bilong tokaut long stretpela pasin.”—2 Pita 2:5.

Noa i stap olsem mausman bilong God long givim tok lukaut, tasol ol manmeri i sakim tok bilong God. Ol i no bilip. Olsem na Bikpela Tait wara i “kam na karim ol i go.” (Mat. 24:39; Hib. 11:7) Taim Bikpela Tait i kamap, i no gat wanpela bilong ol dispela lain nogut inap sutim tok olsem God i no givim tok lukaut long ol.

Long ol narapela taim, Jehova i givim tok lukaut paslain liklik long em i givim strafe. Maski i olsem, em i larim sampela haptaim i stap na bai ol manmeri i gat sans long tanim bel na abrusim bagarap. Eksampel: God i givim tok lukaut long lain Isip paslain long em i kamapim Tenpela Bikpela Hevi. Tingim, Jehova i salim Moses na Aron bilong givim tok lukaut long Fero na lain bilong em paslain long namba 7 bikpela hevi i kamap long neks de—ren ais. Yu ting God i givim taim long lain Isip long painim ples hait paslain long ren ais i pundaun? Baibel i tok: “Sampela wokman bilong Fero husat i pret long dispela tok Jehova i mekim, kwiktaim ol i bringim ol wokboi na ol animal bilong ol i go insait long ol haus. Tasol ol arapela husat i no tingim tumas tok bilong Jehova, ol i larim ol wokboi na ol animal bilong ol i stap ausait.” (Kis. 9:18-21) Jehova i givim tok lukaut na em i givim taim, olsem na ol manmeri husat i kirap kwik long bihainim tok, ol i no karim bikpela hevi olsem ol narapela.

Fero na ol wokboi bilong em tu i kisim tok lukaut paslain long namba 10 bikpela hevi i kamap. Tasol ol i sakim dispela tok lukaut. (Kis. 4:22, 23) Olsem na ol fesbon pikinini man bilong ol i dai. Sori tru long ol! (Kis. 11:4-10; 12:29) Yu ting ol Isip i bin gat rot long bihainim kwik toksave? Yes! Kwiktaim Moses i tokim lain Israel long namba 10 bikpela hevi bai kamap na em i givim instraksen long hau ol inap seivim ol famili bilong ol. (Kis. 12:21-28) Hamas manmeri i bihainim ol dispela instraksen? Ating inap 3 milion manmeri bilong lain Israel na “planti kain kain lain manmeri” bilong Isip na ol narapela ples, ol tu i bihainim tok na abrusim bagarap na lusim Isip.—Kis. 12:38; ftn.

Ol dispela stori i soim klia olsem paslain long Jehova i givim strafe, oltaim em i save givim tok lukaut na larim sampela haptaim i lus na bai ol manmeri inap tanim bel. (Lo 32:4) Wai na God i save mekim olsem? Aposel Pita i tok, Jehova “i no laik bai wanpela i kisim bagarap. Em i laik bai olgeta i tanim bel.” (2 Pita 3:9) Yes, God i tingim tru ol manmeri. Em i laik bai ol i tanim bel, bihainim tok, na abrusim strafe.—Ais. 48:17, 18; Rom 2:4.

BIHAINIM TOK LUKAUT BILONG GOD LONG NAU

Long nau tu, olgeta manmeri i mas bihainim wanpela bikpela tok lukaut i go aut long olgeta hap bilong graun. Taim Jisas i stap long graun, em i tok lukaut olsem haptaim nogut bilong nau bai pinis long taim bilong “traipela hevi tru.” (Mat. 24:21) Jisas i tok profet long ol bikpela hevi bai kamap bilong soim olsem traipela hevi tru i kam klostu pinis—ol disaipel tu bai lukim na karim ol dispela hevi. Jisas i kolim klia ol bikpela hevi i wok long kamap long nau.—Mat. 24:3-12; Luk 21:10-13.

Olsem na long nau Jehova i kirapim olgeta manmeri long stap daun long wok bos bilong em. Em i laik bai ol manmeri i stap amamas long nau na kisim ol blesing long nupela taim we stretpela pasin tasol bai stap long en. (2 Pita 3:13) Jehova i laik bai ol man i bilipim ol tok promis bilong em, olsem na em i kamapim wanpela tok we inap seivim laip bilong ol manmeri—“gutnius bilong Kingdom,” na Jisas i tok profet olsem ol man bai autim dispela gutnius “long olgeta hap bilong graun na bai olgeta lain man i ken harim.” (Mat. 24:14) God i oganaisim ol man i lotuim em long autim “gutnius bilong kingdom” long ol manmeri i stap long planti hap, inap olsem 240 kantri. Jehova i laik bai olgeta lain man i ken harim gutnius na abrusim bagarap long taim em i karimaut stretpela kot bilong em.—Sef. 1:14, 15; 2:2, 3.

Jehova i save givim taim long ol manmeri long bihainim ol toksave em i givim. Yumi luksave long dispela long ol eksampel yumi skelim pinis. Olsem na bikpela askim em olsem: Long haptaim i stap yet, ol manmeri bai bihainim tok lukaut bilong God o nogat? Yumi stap olsem ol mausman bilong God, olsem na yumi mas wok yet long helpim planti manmeri moa long abrusim bagarap bilong pinis bilong dispela haptaim nogut.