Autim Gutpela Tok—Spirit Bilong Jehova Bai Helpim Yu
1 Sapos yumi laik autim gut tok bilong Kingdom, Jehova i mas soim rot long yumi na blesim yumi. Yumi mas beten askim Jehova long givim spirit holi bilong helpim yumi long mekim dispela wok. Jisas i tok God bai salim spirit holi bilong em long ol man i askim em long givim long ol.—Lu 11:13.
2 Yumi mas redi gut pastaim bambai yumi inap autim tok long sampela kain man. (Skelim 1 Korin 2:1-5.) Tasol sapos yumi askim God long helpim yumi long spirit holi bilong em, em bai helpim yumi, na bai yumi inap autim gut tok.
3 Spirit holi bai strongim yumi, na bai yumi no pret long autim tok long “olgeta manmeri.” (1 Ti 2:3, 4; 1 Te 2:2) Kristen i mas strong long autim tok, tasol em i no ken daunim narapela man o mekim pasin antap.
BIHAINIM OL PASIN EM SPIRIT HOLI I KAMAPIM
4 Aposel Pita i tok, taim yumi autim tok, yumi mas mekim “long tok isi na long gutpela pasin.” (1 Pi 3:16) Pasin isi em wanpela pasin em spirit holi i save kamapim, na taim yumi autim tok na man i kros o i no laik harim tok bilong yumi, yumi mas bihainim dispela pasin. Na yumi mas bihainim ol narapela pasin em spirit holi i save kamapim na dispela bai helpim yumi taim yumi autim tok na kain hevi olsem i kamap. (Ga 5:22, 23) Sapos wanpela man i no laik harim tok bilong yu, yu no ken ting em i bel nogut long yu yet. Tasol yu mas save, ating dispela man i no save olsem ol tok yu laik autim inap helpim em. Sapos yu save olsem, dispela bai helpim yu long bihainim pasin daun. Sapos yu inap, taim yu laik lusim dispela man i go, mekim gutpela tok long em. Ating dispela samting bai opim rot, na taim narapela brata i kam autim tok long em, em bai harim tok.—Snd 15:1.
5 Maski yumi autim tok long ol haus o long rot, ol narapela man i lukim ol samting yumi mekim. Long olgeta taim yumi mas was gut, nogut toktok o pasin bilong yumi i pundaunim wanpela man na em i no laik harim tok bilong yumi. Planti man ol i no save amamas long dispela wok yumi mekim. Planti ol i no laik harim tok bilong yumi. Tasol yumi no ken bel hevi. Yumi wok long painim ol sipsip. (Mt 10:12-14) Taim yumi autim tok yumi mas bihainim pasin em spirit holi i save kamapim, na long dispela rot bai yumi litimapim nem bilong God. Sapos yumi bihainim gutpela pasin na yumi tingim gut ol narapela man, ating dispela bai mekim gut bel bilong sampela man na bai ol i amamas long harim tok bilong yumi.—2 Ko 6:3.
6 Taim yumi autim tok, sapos yumi bungim wanpela man i gat planti wok, ating yumi inap toktok liklik tasol wantaim em. Sapos yumi tingim gut dispela man na mekim gutpela pasin olsem, ating bai rot i op na taim narapela Witnes i kam lukim dispela man, em bai harim tok bilong Witnes. Spirit bilong God bai helpim yumi long sori long ol narapela man na isi long ol na mekim gutpela pasin. Yumi amamas, long wanem God i marimari long ol man na em i opim rot bambai ol inap harim tok bilong em planti taim, na dispela samting i kirapim sampela man long harim tok na ol i ken bilip.—1 Ko 13:4.
7 Taim yumi larim spirit bilong God i bosim ol wok yumi mekim, yumi inap autim tok bilong Kingdom na helpim ol man i gat gutpela bel na ol i tingim God. Yumi mas was gut bambai ‘olgeta pasin yumi mekim i kirapim ol man long givim biknem long dispela tok yumi save autim, em tok tru bilong God, em Man bilong kisim bek yumi.’—Ta 2:10.
[Ol Askim]
1. (a) Luk 11:13 i mekim wanem gutpela tok bilong helpim ol Kristen? (b) Taim yumi autim tok, bilong wanem God i mas helpim yumi long spirit holi bilong em?
2. (a) Taim Pol i go lukim kongrigesen long Korin, em i gat wanem tingting? (b) Sapos yumi askim Jehova, em bai givim wanem samting long yumi?
3. (a) I gat wanem gutpela tok i stap long 1 Timoti 2:3, 4 bilong helpim yumi long autim tok long “olgeta manmeri”? (b) Bilong wanem yumi no ken pret long autim tok long wanpela bisop o praim-minista samting?
4. (a) Taim wanpela man i kros o toknogutim yumi, wanem samting inap helpim yumi long bihainim pasin isi? (b) I gat wanem gutpela tok i stap long Sindaun 15:1?
5. (a) Taim yumi autim tok, bilong wanem yumi mas bihainim gutpela pasin? (b) Sapos ol manmeri i no laik harim tok bilong yumi, bilong wanem yumi no ken bel hevi? (c) Olsem 2 Korin 6:3 i tok, bilong wanem yumi mas wok strong long bihainim gutpela pasin na mekim gutpela tok?
6. Olsem wanem Jehova i mekim pasin isi na pasin sori long ol man long nau?
This article is repeated in km 10/92.