Lainim Ol Baibel-Stadi Long Mekim Wok Long Baibel
1 “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.” (1 Te 2:13) Yumi ol Kristen tru, yumi save autim tok bilong Baibel long ol man. Olsem na taim yu mekim Baibel-stadi wantaim wanpela man, yu mas helpim dispela man long save, ol tok em i lainim i no tok bilong ol man; em tok bilong God. Sapos yumi lainim gut ol Baibel-stadi long mekim wok long Baibel, bai ol i bilip tru long ol tok bilong Baibel, na bai bilip bilong ol i gat strongpela as bilong en, na bai ol inap kamapim ol tok bilong Baibel na bekim tok long man i askim ol long bilip bilong ol.—2 Ti 3:16, 17; 1 Pi 3:15.
2 Wanem taim yu mas kirap lainim Baibel-stadi long mekim wok long Baibel? I gat 66 liklik hap bilong Baibel, orait olsem wanem yu ken lainim Baibel-stadi long wanem liklik hap i kamap pastaim na wanem hap i kamap bihain, stret olsem ol i raitim long Baibel, na bai em inap painim kwik insait long Baibel? Na olsem wanem yu ken lainim em long painim ol sapta na ves? Em yet i ken mekim wanem bambai em inap tingim sapta na ves samting bilong sampela bikpela tok long Baibel? I gat kain kain pasin bilong helpim em olsem.
MEKIM WOK LONG BAIBEL
3 Long namba wan stadi, opim Baibel na soim lista bilong ol buk bilong Baibel long man yu stadi wantaim em. Long dispela lista, ol i raitim nem bilong ol wan wan buk, na namba bilong namba wan pes bilong en long Baibel. Helpim Baibel-stadi long opim Baibel na painim ol dispela wan wan buk. Long ol buk na nius bilong Sosaiti ol i raitim planti tok bilong Baibel, tasol sampela taim ol i raitim tasol nem bilong buk bilong Baibel na namba bilong sapta na ves, na man i mas opim Baibel na lukim. Taim yu kirap long lainim nupela Baibel-stadi, i gutpela sapos yu kirapim em long opim Baibel na lukim olgeta tok bilong Baibel em buk i kolim, maski ol i raitim pinis ol tok bilong en long buk o ol i raitim tasol namba bilong sapta na ves. Sapos yu mekim olsem bai dispela man i save tru, yu laik lainim em long ol tok bilong Baibel. Tru, bai yupela lusim bikpela hap taim liklik long mekim olsem, tasol dispela pasin bai helpim dispela man long save gut long opim Baibel na painim ol buk bilong Baibel na sapta na ves bilong en. Na tu, dispela pasin bai lainim em olsem ol tok bilong Baibel i as bilong ol tok bilong dispela buk em i lainim tok bilong en.
SOIM: Brata i mekim namba wan stadi wantaim man na lainim em long opim Baibel na lukim ol tok bilong en. Bihain em i tokim dispela man long opim Baibel na kaunim ol tok bilong Matyu 24:14 na Buk Song 37:34 na Kamapim Tok Hait 21:4, 5.
4 Taim yu stadi wantaim wanpela man na em i kamapim sampela askim, kolim ol tok bilong Baibel i bekim askim bilong em na kirapim em long opim Baibel na lukim ol dispela tok. Long dispela rot bai em i kisim save olsem tok bilong God i bekim askim bilong em. (Jo 17:17) Helpim em long tingim gut ol tok em i kaunim na bai em i pilim tru bekim i stap long Baibel. Long pinis bilong stadi, stori gen long tupela o tripela bikpela tok yupela bin stori long en, na kirapim em long opim Baibel na kaunim ol dispela tok, tasol em i no ken kaunim tasol, em i mas stori tu long en long toktok bilong em yet. Long dispela rot bai yu lainim em long opim Baibel na bekim tok long man i askim em long bilip bilong em. Na bai em i bilip tru long ol tok bilong Baibel na em i no pret long autim long ol narapela man.—Ap 17:1-3.
5 Kirapim Baibel-stadi bilong yu long opim Baibel na lukim ol tok bilong en taim em yet em i stadi na redim ol tok bilong Stadi Wastaua na ol tok bilong ol narapela miting. Long dispela rot bai em i redi gut, na bai em inap opim kwik Baibel long taim bilong miting na lukim ol tok bilong en, na taim em i bekim tok bai ol tok bilong Baibel i as bilong ol tok em i mekim. Taim Baibel-stadi yet i kaunim na skelim gut ol tok bilong Baibel, dispela i helpim em long kisim gut ol tok i tru na putim i go daun long bel.
6 Sapos yu lainim Baibel-stadi bilong yu long mekim wok long Baibel, dispela bai helpim em long olgeta taim bihain. Bai em i save, ol tok em i lainim em i tok bilong God. Tru tumas, “tok bilong God em i gat laip,” na i gat strong. (Hi 4:12) Yumi laik helpim ol man bambai ol i lain gut long mekim wok long Baibel, na bai ol inap “autim stret tok tru.”—2 Ti 2:15.
[Ol Askim]
1. (a) Ol Kristen i ting olsem wanem long Baibel? (b) Bilong wanem yumi mas helpim ol Baibel-stadi long mekim wok long Baibel? Wanem ol tok bilong Baibel i kamapim dispela samting?
2. I gat wanem ol askim long wok yu mas mekim bilong helpim nupela Baibel-stadi?
3. (a) Long namba wan stadi, gutpela sapos yu soim wanem samting long man? (b) Maski ol i raitim pinis ol tok bilong Baibel long buk o ol i raitim tasol namba bilong sapta na ves, bilong wanem i gutpela sapos yu kirapim Baibel-stadi long opim Baibel na kaunim olgeta tok bilong en em buk i kolim.
4. (a) Wanem gutpela rot bilong bekim ol askim bilong Baibel-stadi bilong yu? (b) Long pinis bilong stadi, taim yu laik stori gen long sampela bikpela tok, yu ken mekim olsem wanem? (c) Taim Pol i wok long lainim ol man, em i bihainim wanem gutpela pasin olsem Aposel 17:1-3 i stori long en?
5. Wanem samting inap helpim Baibel-stadi long kisim gut ol tok i tru na putim gut long bel?
6. Sapos yu lainim Baibel-stadi bilong yu long mekim wok long Baibel, bai em i kisim wanem ol blesing?