Yu Gat Tingting Long Mekim Wok Painia?
1 Ol painia i gat strongpela tingting long bihainim tok bilong Jisas long autim tok na kamapim ol disaipel, na ol i givim bel long helpim ol narapela man na mekim pasin sori long ol na ol i no tingim skin bilong ol yet—ol i putim laik bilong ol i stap nambatu na ol i amamas long bihainim gut lek bilong Bikpela bilong yumi, em Jisas. Na ol i amamas tu long ol samting bilong spirit na ol i no tingting tumas long ol samting bilong skin.
2 Long nau, lain bilong Jehova i gat dispela kain tingting. Maski ol man i birua long ol na mekim nogut tru long ol o narapela hevi i painim ol, ol i amamas yet long autim gutpela tok bilong Kingdom. Taim yumi wok strong long autim tok, bel bilong yumi i gutpela na yumi amamas long mekim dispela wok. Taim yumi go long ol bikpela kibung na yumi toktok wantaim ol painia, yumi pilim tru dispela amamas bilong ol, na dispela i kirapim yumi tu long wok strong long autim tok, maski yumi pablisa o yumi painia.
3 Tasol nau yumi stap long pinis bilong las taim, na planti hevi i save painim yumi long olgeta wan wan de, na sampela taim dispela i mekim yumi i bel hevi na i pinisim strong bilong yumi na yumi no givim bel tumas long ol samting bilong spirit. Tasol yumi olgeta wan wan i mas askim skin bilong yumi olsem: ‘Mi gat tingting olsem bilong ol painia? Mi larim pasin bilong dispela graun i daunim ol gutpela tingting bilong spirit i stap long bel bilong mi? Mi givim bel long tok i tru? Mi strong tru long tokim ol narapela man long Kingdom bilong God? Mi wok long kirapim ol narapela long kongrigesen long kisim tingting wankain olsem bilong ol painia na kirapim ol long wok strong moa long bihainim laik bilong God? Mi ken mekim wanem bilong strongim bel bilong mi na kisim tingting bilong ol painia?’
ROT BILONG KISIM TINGTING LONG MEKIM WOK PAINIA
4 Dispela tingting long mekim wok painia i save kirap long bel, na yumi mas wok long kisim dispela kain tingting. Ol samting yumi save kaunim long buk na ol samting yumi save harim, ol dispela samting i save go daun long bel, na nau bel i kirapim yumi long tingim ol dispela samting. Na i olsem tasol taim yumi yet yumi stadi long Baibel na kisim save, ol dispela tok bai go daun long bel na nau bel inap kirapim yumi long kisim tingting long mekim wok painia. Pol i tokim Timoti: “Oltaim yu mas lukautim gut ol dispela wok . . . na bai olgeta manmeri i lukim pasin bilong yu yet i kamap gutpela tru. . . . Sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Ti 4:15, 16) Olsem na yumi mas tingting strong long ol samting bilong spirit bambai dispela kain tingting i ken i go daun long bel, long wanem, bel yet i kirapim yumi long mekim ol samting. Sapos yumi mekim olsem, dispela bai kirapim laik long bel bilong yumi na yumi laik tru long mekim wok bilong God. Na bai yumi amamas long ol samting bilong spirit na bai yumi painim rot long mekim moa yet ol wok bilong God.
5 Ol samting yumi save toktok long en inap mekim nogut long ol brata o strongim ol. (Ef 4:29) Sapos yumi stori long ol gutpela samting i bin painim yumi taim yumi autim tok, na yumi stori long sampela tok yumi bin harim long miting o yumi kisim save long en taim yumi mekim stadi bilong yumi yet, bai yumi wok long putim gutpela tingting i go daun long bel bilong ol brata na dispela i strongim bel bilong ol. Na olsem wanem? Taim yumi go long wok o long ol stua samting, yumi save painim rot bilong autim tok long ol manmeri yumi bungim ol? Sapos yumi painim rot bilong autim tok long kain kain taim na ples, yumi bihainim lek bilong Jisas, long wanem, em yet i bin mekim olsem.—Jo 4:7-10.
6 Sapos yumi wok long kirapim bel bilong yumi long sori tru long ol narapela man, dispela bai helpim yumi long kisim tingting long mekim wok painia. (Mt 22:39) Taim Jisas i stap long graun em i gat dispela kain pasin sori. Em i lukim ol manmeri na em i sori tru long ol, na em i wok strong tru long helpim ol, maski em i no bin slip o malolo samting. (Mt 9:36; Ro 5:6) Sapos yumi bihainim pasin na tingting bilong Krais, orait, yumi tu bai sori long ol man na bai yumi wok strong tru long helpim ol long ol samting bilong spirit, maski ol i sakim yumi.—Lukim Matyu 23:37.
GUTPELA SAMTING BAI KAMAP LONG DISPELA WOK
7 Sapos yumi kisim tingting long mekim wok painia, dispela bai helpim gut yumi na bai yumi kisim planti blesing. Na taim yumi wok strong moa yet long autim tok, bai yumi kamap gutpela tisa, na bai yumi kisim bikpela amamas long en. Taim ol brata sista long kongrigesen i kisim tingting long mekim wok painia, orait pasin sori bai kamap strong namel long ol, na bai ol i tingting strong long ol samting bilong spirit. Wanpela elda i stori long wok painia i bin helpim gut kongrigesen bilong em na em i tok: “Taim sampela i kirap mekim wok painia, dispela i kirapim tru kongrigesen na ol i givim bel na wok strong long autim tok. Nau wok bilong mipela long autim tok em i go bikpela.”
[Ol Askim]
1. Ol painia i gat wanem tingting?
2. (a) Wanem taim yumi inap pilim tru tingting bilong ol painia? (b) Dispela i save mekim wanem long ol narapela pablisa?
3. (a) Wanem samting i mekim na em inap daunim gutpela tingting bilong spirit i stap long bel bilong yumi? (b) Olsem na yumi olgeta wan wan i ken givim wanem askim long skin bilong yumi?
4. (a) Taim yumi stadi long tok bilong Baibel, olsem wanem dispela i kirapim yumi long kisim tingting long mekim wok painia? (b) Sapos yumi tingting long ol samting bilong spirit, olsem wanem dispela bai helpim yumi long kisim tingting long mekim wok painia?
5. Ol samting yumi toktok long en, dispela inap mekim wanem long tingting bilong ol brata?
6. Sapos yumi wok long kirapim bel bilong yumi long sori long ol man, olsem wanem dispela bai helpim yumi long kisim tingting long mekim wok painia?
7. Taim yumi kisim tingting long mekim wok painia, dispela i helpim yumi yet na kongrigesen tu olsem wanem?