Askim

◼ Sapos yumi gat askim long sampela tok bilong Baibel o yumi laik kisim sampela tok bilong helpim yumi, i gutpela sapos yumi ringim Sosaiti na askim ol?

Planti manmeri i mekim wok long telefon bilong mekim kwik ol samting, tasol yumi no ken tingting tasol long mekim ol samting hariap. Ol man bilong dispela graun i no laik mekim ol samting i hatwok long ol yet; ol i no laik taitim bun.

Tasol gutpela tok God i givim i narapela kain! Em i kirapim yumi long painim gutpela tingting olsem mani na silva i hait long graun. Olsem na yumi mas redi long taitim bun. Sapos yumi mekim olsem dispela bai helpim yumi inap long olgeta taim bihain.​—⁠Snd 2⁠:​1-4.

Yumi ken mekim kain wok olsem sapos wanpela askim i kamap taim yumi redim miting o sapos wanpela hevi i painim yumi. Sapos yumi yet i painim ol tok long Baibel na long ol narapela buk bilong Sosaiti na long Watch Tower Publications Index (tok Inglis), em i gat index bilong ol skripsa na index bilong ol het-tok, dispela bai helpim tru yumi. Dispela i gutpela moa long ringim tasol Sosaiti na askim ol.

Taim yumi bin mekim wok olsem painim ‘mani na silva i stap hait long graun’ na yumi no save gut yet, yumi ken askim wanpela elda long kongrigesen long helpim yumi. Ol elda i gat gutpela save long Baibel na ol i gat save long painim ol tok long ol buk samting bilong Sosaiti. Gutpela tingting na tok bilong ol i ken helpim tru yumi sapos yumi laik kisim sampela tok bilong helpim yumi long ol hevi bilong yumi yet, long wanem ol i save long yumi na long sindaun bilong yumi.​—⁠Lukim Aposel 8⁠:​30, 31.

Sapos yumi ting yumi mas kisim yet sampela tok moa i kam long Sosaiti yet, i gutpela sapos yumi salim pas. Ating ol elda i ken helpim yumi long raitim. Sapos yumi raitim pas, bai i gat taim na Sosaiti i ken skelim gut na tingting gut pastaim na bihain ol i ken bekim pas. Sapos man i ring i hatwok long mekim olsem.