Helpim Ol Narapela Long Givim Biknem Long Man Bilong Wokim Yumi
1 Olsem wanem? Yumi pilim wankain olsem man bilong raitim Song, em i tok: “Bikpela . . . Yu as tru bilong laip bilong olgeta samting”? (Sng 36:5, 9) Yumi ken mekim wanem na bai yumi inap helpim ol narapela long save, Jehova em i Man bilong wokim yumi na yumi mas givim biknem long em? Long mun Jun, yumi ken mekim olsem long rot bilong tilim buk Rot Bilong Abrusim Bagarap na i Stap Long Nupela Graun o ol narapela buk i gat 192 pes long en. Dispela buk inap strongim bilip bilong ol olsem Baibel em i Tok Bilong God. Yumi laik bai olgeta man i ken givim biknem long God Jehova, na tingim gut ol promis na tok bilong em i stap long Baibel.
2 Wanpela tok i klia na i no hatwok long mekim, em olsem:
Taim yu tok gude pinis, soim piksa i stap long pes 33 na kamapim askim olsem:
◼ “Long pastaim tru God i gat wanem laik long ol manmeri? Yu save? God i laik bai ol man i pulap long graun na bihainim ol gutpela pasin bilong em, na mekim Paradais i kamap long olgeta hap, na lukautim dispela Paradais na ol animal i stap long en, na stap oltaim long graun. Olsem wanem? Sampela taim yu bin tingting long God i gat wanem laik long ol man? [Larim man i bekim tok.] Dispela buk bai helpim yu long save long laik bilong God na ol samting em bai mekim bilong kamapim dispela laik. Mi laik bai yu kisim dispela buk na bai yu ken skelim ol tok bilong en na save God i gat wanem laik tru long dispela graun na long ol man i stap long en.”
3 O ating yu ken tok olsem:
◼ “Planti man long nau, na ol yangpela tu, ol i no bilip tumas long God. Planti ol i hatwok long karim ol hevi bilong nau. Yu ting Baibel inap helpim man long ol hevi bilong ol? [Larim man i bekim tok.] Lukim dispela tok hia long Baibel. [Kaunim Song 55:22 na stori long ol samting God i tok promis long kamapim long bihain. Na ating yu ken kaunim Song 37:10, 11 o 2 Pita 3:13.] Ating bai yu laikim ol tok i stap long dispela gutpela buk. Buk hia bai stori moa long ol dispela samting na kamapim klia olsem, ol dispela tok yumi bin toktok long en em i tru. [Tilim buk.]”
4 O taim yu tok gude pinis, ating yu ken tok:
◼ “Sampela man i ting ol man bilong bipo ol i raitim Baibel, olsem na ol tok bilong en i no inap helpim ol man long nau. Olsem wanem long yu? Yu ting Baibel inap soim gutpela rot long ol man long nau? [Larim man i bekim tok.] Baibel i kamapim planti tok profet i makim stret ol samting i kamap long nau. Na ol man i bin raitim Baibel ol i kamapim klia olsem yumi mas mekim wok i stret wantaim ol dispela tok profet bambai yumi ken i stap laip. [Kaunim 1 Korin 10:11 na 2 Pita 1:20, 21.] Dispela buk bai helpim yu long save olsem wanem yu ken mekim wok i stret wantaim laik bilong God olsem i stap long Baibel, na kisim laip i stap oltaim.”
5 O yu ken kamapim piksa i stap long pes 5 bilong buk, na tok olsem:
◼ “Mipela kam bilong kirapim ol man long kaunim Baibel na kisim save long ol samting bai kamap bihain. Olsem dispela piksa i makim, graun bilong yumi inap kamap gutpela ples. Tasol bilong graun i ken kamap olsem, ol man i mas bihainim ol lo bilong God. God i wokim graun bilong ol man i ken i stap long en. Em i laik bai ol i stap bel isi na no ken sik. God i tok promis pinis long kamapim ol dispela samting long bihain. Olsem wanem? Yu laik stap wanbel wantaim olgeta lain man? Yu laik stap oltaim long graun long gutpela ples paradais? [Larim man i bekim tok.] Mi laik kaunim Song 37:9, 29 long yu. [Kaunim.] Olsem na yumi save, God i tok promis long yumi inap i stap oltaim long Paradais long graun. Mi laik bai yu kaunim dispela buk na bai yu yet yu ken save olsem wanem ol dispela samting bai kamap.”
6 Olsem wanem? Yu gat bikpela laik long helpim ol narapela long kisim save long ol gutpela tok i tru bilong Man bilong wokim yumi na ol gutpela samting em i laik mekim bilong helpim ol man? Buk Abrusim Bagarap inap helpim yu long mekim olsem. Buk hia i save givim biknem long Bikpela Man bilong wokim yumi, em Nambawan Bikpela King Jehova, na i litimapim ol wok bilong em na i kamapim gutpela laik bilong em bilong mekim holi nem bilong em na blesim ol man long rot bilong Kingdom bilong Krais.