Autim Gutnius na Ting Olsem Ol Man Bai Harim Tok
1 Yumi olgeta i laik long kisim amamas na mekim gut ol wok yumi mekim, na yumi laik mekim olsem long wok bilong kamapim disaipel. Wanem samting i save bringim kain amamas olsem long yumi? Taim yumi mekim gutpela wok bilong helpim ol narapela, yumi mas bilip yet olsem ol gutpela samting bai kamap long wok bilong yumi. (Snd 11:25) Olsem wanem? Yumi mekim planti tumas wok long kongrigesen, olsem na oltaim yumi lusim tingting long autim tok long papamama o ol wanblut em ol i no bilip? Gutpela samting yumi ken mekim long ol wanblut sapos ol i no bilip yet, em long lainim ol long tok i tru. Tasol bilong mekim olsem, i gutpela yumi mekim long gutpela pasin. Sapos yumi stap longwe long ples, yumi inap helpim ol sapos oltaim yumi raitim pas long ol na stori long ol blesing yumi bin kisim long Jehova na long ol blesing yumi wetim. Na tu yumi inap givim buk Yu Inap i Stap Oltaim Long Paradais Long Graun olsem presen.
2 Taim yumi autim tok long ol wanblut o ol wantok long kain kain taim na ples, yumi ken tingting long givim wanpela buk samting olsem presen na no ken askim ol long givim kontribusen. Tasol taim yumi toktok long ol man yumi no save long ol, olsem long taim yumi autim tok long ol haus, i gutpela long tilim nupela buk samting long kontribusen Sosaiti i makim. Long dispela rot yumi inap helpim ol man long pilim tru gutpela samting ol i kisim na dispela bai kirapim ol long kaunim ol buk samting. Plis tingim ol narapela narapela pe bilong ol buk long tok Inglis, tok Hiri Motu, na tok Pisin. Long olgeta taim dispela gutpela buk i mas i stap long haus bilong yupela.
3 Taim yu tilim buk “Stap Oltaim” long namba wan taim, yu ken tok olsem:
◼ “Yu bilip olsem i gat gutpela samting bai painim ol manmeri long bihain? [Larim man i bekim tok.] Baibel i tok, gutpela samting bai painim ol manmeri long bihain na ol inap i stap oltaim long pasin isi.” Kaunim Song 37:29, 37. Yu ken stori liklik long ol dispela ves na nau yu ken tok, “Dispela song yet i tokim yumi olsem wanem yumi inap karim ol hevi bilong nau na tingting strong long gutpela samting bai kamap bihain.” Nau yu ken kaunim ves 39. Opim buk Stap Oltaim na soim em olsem wanem piksa long pes 9 i narakain tru long piksa long pes 11-13, em ol man i sindaun gutpela na amamas. Bilong pinisim tok, tokim man sapos em i laik tru long stap oltaim na amamas long Paradais long graun bihain, em i mas lain moa long en. Nau tilim buk Stap Oltaim.
4 Taim yu go bek yu ken mekim wok long dispela askim:
◼ “I gat planti lotu i stap long nau, olsem na planti man i tok lotu bilong yumi i no bikpela samting. Yu ting olsem wanem? [Larim man i bekim tok.] Jisas i bin givim yumi wanpela gutpela tok piksa em inap helpim yumi.” Kaunim Matyu 7:13, 14. Kamapim tok bilong paragraf 5 na 6 long pes 26 na 27 bilong buk Stap Oltaim. Tokim em olsem taim yumi mekim wok long dispela tok piksa, yumi inap save lotu bilong yumi em i bikpela samting. Olgeta lotu i no narapela narapela rot bilong bihainim i go na kamap long wanpela ples tasol. Kamapim klia olsem wanem stadi long Baibel inap helpim em long save wanem kain lotu God i orait long en. Tokim em yu laik stadi Baibel wantaim em. Sapos em i laik stadi, kirapim stadi long buk Save.
5 Yu ken traim mekim dispela tok taim yu givim buk “Stap Oltaim” long wanblut o pren bilong yu olsem wanpela presen:
◼ “Olgeta taim yu save mekim gutpela pasin tru long mi. [O yu ken kolim narapela gutpela as bilong mekim olsem.] Mi laik givim yu wanpela buk mi save laikim tumas. Em bai helpim yu long save moa long pasin bilong God na ol samting em i laik mekim long bihain. Lukim ol dispela piksa hia long pes 156 na 157 em ol tok promis bilong Baibel i as bilong en.” Kaunim sampela skripsa i stret long em, na stori long ol piksa long pes 156-158, na 161-162. Kamapim klia olsem yu givim dispela buk long em olsem presen na strongim em long kaunim.
6 Taim yu go bek bilong lukim ol wanblut o ol pren:
◼ “Pastaim yumi bin stori long ol gutpela samting bilong bihain em God i tingting long kamapim long dispela graun na ol manmeri i laikim stretpela pasin. Mi laik soim yu narapela samting moa insait long buk pastaim mi bin givim long yu. [Yu ken askim em long kisim buk i kam sapos em inap.] Lukim tok buk i mekim long ol pasin bilong God.” Opim buk long pes 38 na kaunim paragraf 12 na 13, na stori wantaim em. Sapos em i laik harim tok, soim em olsem wanem pasin bilong stadi long Baibel long olgeta taim inap helpim em long save gut long God. Soim em buk Save na kirapim stadi.
7 Taim yu autim tok long ol stua, yu inap mekim sotpela tok bilong tilim buk “Stap Oltaim” olsem:
◼ “Long nau mipela i wok long toktok wantaim ol wokman bilong dispela hap. Yumi olgeta i tingting planti long pasin raskol na pait na bagarapim man i wok long i go bikpela long hap bilong yumi. Yu ting i gat wanpela man i save long rot tru bilong stretim dispela hevi? [Larim man i bekim tok.] God i gat rot bilong stretim.” Opim buk Stap Oltaim long pes 13; kaunim Aisaia 11:6-9 na stori long en. Sapos yu laik, yu ken stori long piksa na tilim buk.
8 Taim yu mekim gobek long wokman bilong stua yu bin tilim buk “Stap Oltaim” long em, yu ken tok olsem:
◼ “Taim mi kam lukim yu bipo, mi bin tok olsem God wanpela tasol i save long rot bilong pinisim tru pasin raskol na pait na bagarapim man. Olsem em i bin tok promis, yumi ken bilip tru olsem bel isi na gutpela sindaun bai kamap tru long graun. I olsem i gat tupela rot na yumi mas makim wanem rot yumi laik bihainim.” Kaunim paragraf 13 long pes 255 bilong buk Stap Oltaim, em Matyu 7:13, 14 i stap long en. Tokim em yu laik mekim Baibel-stadi wantaim em long ples wok o long haus bilong em.
9 Olsem ol “wanwok bilong God,” i gat gutpela as na taim yumi autim gutnius yumi ken ting olsem ol man bai harim tok. (1 Ko 3:9) Sapos yumi gat dispela tingting long taim yumi autim tok long haus o long kain kain taim na ples, Jehova bai blesim tru yumi.