Sapta 30
Ol Samting Yu Mas Mekim Bambai Yu Inap i Stap Oltaim
1. (a) I gat wanem tupela rot i stap? (b) Yu mas mekim wanem na bai yu bihainim rot i go long laip?
GOD JEHOVA i laik givim gutpela samting tru long yu, em laip i stap oltaim long nupela taim em bai kamapim. (2 Pita 3:13) Tasol nau yu mas bihainim laik bilong God bambai yu ken i stap long dispela gutpela taim bihain. Pasin nogut bilong dispela graun na olgeta manmeri i insait long en i laik pinis. Tasol “man i bihainim tok bilong God, em bai i stap oltaim.” (1 Jon 2:17) Olsem na i gat tupela rot i stap, em rot bilong i dai na rot bilong kisim laip oltaim. (Diuteronomi 30:19, 20) Yu bai bihainim wanem rot?
2. (a) Yu mas bilip tru long wanem samting? (b) Sapos yu bilip long God olsem pikinini i save bilip long gutpela papa bilong em, dispela bai helpim yu olsem wanem long mekim wok bilong God?
2 Sapos yu laik bihainim rot bilong laip, pastaim yu mas bilip long Jehova na long ol tok promis bilong em. Olsem wanem? Yu bilip tru olsem God i stap na em i “save givim gutpela pe long ol man i wok long painim em”? (Hibru 11:6) Yu mas bilip long God olsem pikinini i save bilip long gutpela papa bilong em. (Sam 103:13, 14; Provep 3:11, 12) Sapos yu bilip tru long God olsem, bai yu save olgeta tok na lo bilong Em i bilong helpim yu, na maski sampela taim yu no save gut long as bilong wanpela tok o lo, tasol bai yu bihainim.
3. (a) Yu mas bilip na mekim wanem samting moa? (b) Yu mas mekim wanem ol samting bilong kamapim bel bilong yu, yu laik kisim laip oltaim?
3 Tasol yu no ken bilip tasol. Yu mas mekim ol gutpela wok tu bilong kamapim bilip bilong yu. (Jems 2:20, 26) Olsem wanem? Yu hevi long ol pasin nogut bipo yu bin mekim? Orait yu tanim bel pinis? Na yu lusim pinis ol dispela pasin? Na yu kirap pinis long bihainim laik bilong Jehova? (Aposel 3:19; 17:30) Sapos yu mekim ol dispela samting, yu kamapim bel bilong yu, yu laik kisim laip i stap oltaim.
TOK PROMIS NA BAPTAIS
4. (a) Wanem samting i mas kirapim yu long mekim laik bilong God? (b) Taim yu tingting pinis long mekim wok bilong God, i stret yu mas mekim wanem?
4 Wanem samting i mas kirapim yu long mekim laik bilong God? Yu mas pilim tru ol gutpela samting God i bin mekim bilong helpim yu, olsem em i wokim rot bambai sik na pen na i dai i ken tekewe long yu! Em i givim Pikinini bilong em bambai yu inap i stap oltaim long paradais long graun. (1 Korin 6:19, 20; 7:23; Jon 3:16) Taim yu pilim tru bikpela sori bilong Jehova na yu givim bel long em, orait yu mas kirap mekim wanem? (1 Jon 4:9, 10; 5:2, 3) Long nem bilong Jisas, yu mas beten long God Jehova na tokim em, yu laik mekim wok bilong em, yu laik bai em i kamap Papa bilong yu. Taim yu tok promis olsem, em nau yu dediket. Em samting yu yet yu mas mekim. Narapela man i no ken subim yu.
5. (a) Taim yu tok promis pinis long God, em i laik bai yu mekim wanem? (b) Wanem samting inap helpim yu long truim tok promis bilong yu?
5 Taim yu tok promis pinis long God, em i laik bai yu mas truim dispela tok. Long olgeta taim yu stap laip, yu mas bihainim laik bilong God. (Sam 50:14) Sapos yu pas wantaim lain bilong God long graun, bai ol brata Kristen bilong yu i helpim na strongim yu long mekim olsem.—1 Tesalonaika 5:11.
6. (a) Taim yu tok promis pinis long God, bihain yu mas mekim wanem? (b) Baptais i makim wanem samting?
6 Na yu mas mekim wanpela samting bambai ol narapela man i ken save, yu tok promis pinis long Jehova na yu laik mekim wok bilong em. Yu mas mekim wanem? Yu mas kisim baptais. Baptais i makim man i tok promis pinis long God na em i kam givim skin bilong em long God bilong mekim laik bilong Em.
7. (a) Jisas i mekim wanem na em i makim pasin ol Kristen i mas bihainim? (b) Baptais Jisas i tok long en, bilong wanem em i no bilong ol liklik pikinini?
7 Krais Jisas em i kisim baptais, olsem na yumi save baptais em i bikpela samting. Jisas i no tok tasol em i kam bilong mekim laik bilong Papa. Nogat. (Hibru 10:7) Taim em i laik kirap mekim wok bilong em long autim tok bilong kingdom bilong God, Jisas i givim skin bilong em long Jehova na kisim baptais. (Matyu 3:13-17) Jisas i makim pasin yumi mas bihainim. Olgeta manmeri i tok promis long mekim laik bilong God ol i mas kisim baptais. (1 Pita 2:21; 3:21) Na Jisas i tok, ol man i bihainim em ol i mas kamapim ol disaipel na givim baptais long ol. Ol i no ken baptaisim ol liklik pikinini. Nogat. Ol i mas baptaisim ol man i kamap bilipman, ol i tingting pinis long mekim laik bilong God.—Matyu 28:19; Aposel 8:12.
8. Sapos yu laik kisim baptais, yu mas tokaut long husat long kongrigesen? Bilong wanem yu mas mekim olsem?
8 Sapos yu tingting pinis long mekim laik bilong Jehova na yu laik kisim baptais, orait yu mas mekim wanem? Yu mas tokim elda i lukautim wok bilong kongrigesen, em wasman siaman. Em wantaim ol narapela elda long kongrigesen bai helpim yu long tingim gen ol samting yu mas mekim bilong lotuim Jehova bambai em i ken amamas long yu. Na bihain bai ol i stretim rot bilong yu ken kisim baptais.
OL SAMTING GOD I LAIK YU MEKIM LONG NAU
9. Paslain long tait, Noa i mekim wanem na God i laik bai yu mekim olsem tasol long nau?
9 Paslain long tait wara, Noa i mekim wok bilong Jehova na tokim ol man, bagarap i laik painim ol na i gat wanpela ples hait tasol bambai ol i no ken bagarap, em sip bilong Noa. (Matyu 24:37-39; 2 Pita 2:5; Hibru 11:7) God i laik bai yu mekim wankain wok long nau. Jisas i tok, long taim bilong yumi “bai ol i autim dispela gutnius bilong kingdom long olgeta hap bilong graun, . . . na bihain tasol bai las de i kamap.” (Matyu 24:14) Yu kisim save pinis long laik bilong God, na ol narapela manmeri tu i mas save long dispela samting bambai ol i ken winim taim bilong bagarap na i stap oltaim. (Jon 17:3) Olsem wanem? Bel bilong yu i kirapim yu long autim dispela tok long ol narapela man na helpim ol long kisim laip?
10. (a) Sapos yumi laikim tumas ol narapela man, dispela bai kirapim yumi long bihainim wanem pasin bilong Jisas? (b) Ol i mekim we bikpela hap wok bilong autim tok?
10 Yu mas bihainim pasin bilong Krais. Em i no wetim ol man i kam long em. Nogat. Em i go painim ol manmeri i laik harim tok bilong Kingdom. Na em i tok, olgeta disaipel ol i mas mekim dispela wok. (Matyu 28:19; Aposel 4:13; Rom 10:10-15) Ol Kristen bilong pastaim ol i bihainim tok na pasin bilong Krais na ol i go long haus bilong ol man na autim tok. (Luk 10:1-6; Aposel 20:20) Long nau tu ol Kristen tru i mekim olsem. Bikpela hap wok bilong autim tok ol i mekim long haus bilong ol man.
11. (a) Bilong wanem yumi mas strongim bel bambai yumi inap autim tok bilong Kingdom? Tasol bilong wanem yumi no ken pret? (b) Jehova i ting olsem wanem long gutpela wok yumi mekim?
11 Bilong mekim dispela wok, yu mas strongim bel. Long wanem Seten wantaim ol manmeri bilong dispela graun, ol i laik pasim yu, olsem ol i mekim long ol disaipel long bipo. (Aposel 4:17-21; 5:27-29, 40-42) Tasol yu no ken pret. Jehova i bin strongim ol dispela Kristen bilong pastaim, na em bai strongim yu tu. (2 Timoti 4:17) Olsem na yu mas strongim bel! Givim bel long mekim wok bilong autim tok na lainim ol man, na bai yu kamapim bel bilong yu, yu laikim tumas Jehova na ol narapela man. (1 Korin 9:16; 1 Timoti 4:16) Jehova i no ken lusim tingting long gutpela wok bilong yu; em bai givim gutpela pe long yu.—Hibru 6:10-12; Taitas 1:2.
12. Pasin bilong meri bilong Lot i ken lainim yumi long wanem samting?
12 Dispela taim nau i no gat wanpela gutpela samting tru bilong en. Olsem na taim yu givim baksait long en yu no ken ting yu lus long kisim sampela gutpela samting. Jisas i tok: “Tingim meri bilong Lot.” (Luk 17:32) Em wantaim lain bilong em ol i ranawe lusim Sodom, tasol em i lukluk i go bek, long wanem em i laikim tumas ol samting em i bin lusim long Sodom. God i save long dispela laik bilong bel bilong em na God i mekim em i kamap olsem sol. (Jenesis 19:26) Yu no ken bihainim pasin bilong em! Lukluk i go na tingim “laip tru” yu inap kisim long nupela taim bihain.—1 Timoti 6:19.
BIHAINIM ROT BILONG KISIM LAIP OLTAIM LONG GRAUN
13. Jisas i tok wanem long tupela rot yumi inap bihainim?
13 I gat tupela rot tasol i stap. Krais i tok, wanpela rot em i “bikpela na i op tumas.” Ol manmeri i bihainim dispela rot ol inap mekim laik bilong ol yet. Na wanpela rot, em i ‘liklik na i gat hatwok.’ Ol manmeri i wokabaut long dispela rot, ol i mas bihainim ol tok na lo bilong God. Tasol Jisas i tok, planti manmeri ol i bihainim bikpela rot, na wan wan tasol i bihainim liklik rot. Orait, yu laik bihainim wanem rot? Yu mas tingim gut wanpela samting, olsem: Man i bihainim bikpela rot em bai lus! Tasol liklik rot bai bringim yu i go long nupela taim God bai kamapim. Na bai yu inap insait long wok bilong mekim olgeta hap graun i kamap olsem gutpela ples paradais. Na yu ken i stap oltaim oltaim na i stap amamas tru.—Matyu 7:13, 14.
14. Yu mas insait long wanem lain bambai yu inap winim taim bilong bikpela bagarap na i stap laip?
14 Yu no ken ting i gat planti rot yu ken bihainim bilong kisim laip long nupela taim God bai kamapim. Nogat. I gat wanpela rot tasol. Olsem bipo i gat wanpela sip tasol i winim bikpela tait wara. Na i gat wanpela lain tasol—em lain bilong God—ol bai winim “bikpela hevi tru” liklik taim bai kamap. Yu no ken ting olgeta lotu i bringim ol man i go bilong kisim laip. Nogat. (Matyu 7:21-23; 24:21) Yu mas insait long lain bilong Jehova na mekim laik bilong em bambai yu ken kisim laip i stap oltaim.—Sam 133:1-3.
15. (a) Long olgeta taim yumi mas mekim wanem? (b) Yumi wetim wanem samting em bai kamap tru?
15 Olsem na olgeta taim yu mas tingim gutpela pe Jehova i tok promis long givim long yu—em laip i stap oltaim long Paradais long graun. Dispela i no olsem wanpela driman. Em i samting tru! Ol samting bai kamap tru olsem Baibel i tok pinis: “Ol stretpela man bai i kisim graun God i givim ol, na bai ol i stap oltaim long en. . . . bambai yu lukim em i bagarapim ol man nogut.”—Sam 37:29, 34.
[Piksa long pes 251]
Dediket long Jehova . . . na kisim baptais
[Piksa long pes 253]
“Tingim meri bilong Lot”
[Ol Piksa long pes 254]
Olgeta taim yu mas tingim nupela taim God i laik kamapim