Save Gut Long Ol Brata
1 Sapos yumi laik save gut long ol wanlotu, yumi mas bung wantaim ol long ol miting long Haus Kingdom, tasol i gat sampela samting moa yumi mas mekim. Yumi save bihainim laik bilong God, na dispela i helpim yumi long stap gut wantaim Jisas. (Mk 3:34, 35) Yumi stap olsem, na dispela i helpim yumi long stap gut wantaim ol brata sista spirit long kongrigesen Kristen em Jisas i tokim yumi long laikim tru ol, na yumi stap olsem wanpela famili. (Jo 13:35) Olsem na ol brata sista i bung wantaim “lain tru bilong God” ol i mas wok strong na bai narapela inap save gut long narapela.—Ef 2:19.
2 Save Long Nem Bilong Ol Brata: Olsem wanem? Yu save long nem bilong olgeta brata sista long Buk-Stadi bilong yu? Grup i no bikpela, olsem na i no hatwok long save long nem bilong olgeta i kam bung. Sapos yu no save long nem bilong ol, olsem wanem? Yu inap tok yu save gut long ol?
3 Olsem wanem long ol man i kam bung long ol miting long Haus Kingdom, na ol pikinini tu? Yumi save long ol? Ating yumi save pren gut wantaim sampela tasol, a? I no gat rong long yumi amamas long bung oltaim wantaim ol, tasol nogut yumi tok gude na strongim sampela tasol, na sampela nogat. Yumi mas pren gut wantaim sampela moa; yumi mas wok strong long save gut long olgeta brata na sista. (2 Ko 6:11-13) Bilong mekim olsem, yumi mas save long nem bilong ol.
4 Ol brata i lukautim ol miting bilong kongrigesen ol i mas wok long kisim save long nem bilong olgeta manmeri i kam long miting. Taim brata i sanap long pletfom i kolim nem bilong ol brata na sista, dispela i mekim na ol i pilim olsem brata hia em i amamas long tok ol i bekim, na dispela i helpim ol narapela long save long nem bilong ol. Tasol long olgeta miting bai i gat sampela nupela man o sampela brata bilong ol narapela kongrigesen, olsem na i hatwok long save long nem bilong olgeta manmeri i kam bung. Tasol sapos yumi givim bel long kisim save long nem bilong ol, dispela bai kamapim klia olsem yumi tingim gut ol.—Ro 1:11, 12.
5 Yu Yet Mas Mekim Samting Bilong Kisim Save Long Ol: Wasman bilong raun i no hatwok long save gut long planti brata na sista. Em inap mekim olsem wanem? I gat 3-pela rot, olsem: (1) Em i save wok wantaim ol long autim tok; (2) em i lukim ol long haus bilong ol taim ol i singautim em long kam long haus; (3) long ol miting em yet i kirap long sekanim ol manmeri i bikpela pinis na ol pikinini tu.
6 Olsem wanem? Yu save long sampela samting yu ken mekim na bai yu inap save gut moa long ol brata na pren gut wantaim sampela moa? Yumi ken singautim sampela long wok wantaim yumi long autim tok. Pasin bilong autim tok long ol haus wantaim ol narapela, o mekim ol gobek na Baibel-stadi, o tilim ol magasin long rot, em ol gutpela rot bilong save gut long ol narapela. Gutpela tu sapos sampela taim yumi singautim ol brata i kam kaikai o dring ti samting long haus bilong yumi. Sapos yu yet yu kirap long toktok wantaim ol nupela man o ol man i save sem liklik, dispela bai strongim ol long ol samting bilong spirit na kamapim planti gutpela samting.—Ap 20:35; 1 Te 5:11.
7 Pol i save gut long ol brata bilong em. Long ol pas em i raitim em i kolim nem bilong planti bilong ol, na dispela i kamapim klia olsem em i tingim gut ol na laikim tru ol. (1 Te 2:17; 2 Ti 4:19, 20) Sapos yumi wok strong long save gut long ol brata bilong yumi, yumi olgeta bai kisim ol blesing i kamap long dispela.
[Ol Askim]
1. Yumi stap olsem wanem wantaim ol wanlotu bilong yumi long kongrigesen Kristen?
2. Bilong wanem em bikpela samting long yumi mas save long nem bilong ol brata bilong yumi i kam long Buk-Stadi?
3. Olsem wanem yumi ken kisim save long sampela brata moa?
4. Ol brata i lukautim ol hap bilong miting ol i mas wok long mekim wanem?
5. Wasman bilong raun i mekim wanem bilong em inap save gut long planti brata sista?
6. Kolim sampela samting yumi ken mekim na bai yumi inap pren gut wantaim sampela brata na sista moa?
7. Olsem wanem yumi save, aposel Pol i bin lusim bikpela hap taim liklik bambai em inap save gut long ol brata bilong em?