Yumi Mas i Gat Kongrigesen
1 Bilong kamapim amamas bilong ol long kongrigesen bilong Jehova, ol pikinini bilong Kora i bin tok: “Sapos mi stap wanpela de tasol long haus bilong yu, em i winim tru 1000 de long narapela ples.” (Sng 84:10) Ol pikinini bilong Kora i pilim olsem dispela graun i no holim wanpela gutpela samting i winim haus bilong Jehova. Sapos yu gat wankain tingting, yu mas mekim kongrigesen i kamap namba wan samting long laip bilong yu.
2 Kirap long taim em i kamap nupela, kongrigesen Kristen i kamapim long ples klia olsem Jehova i mekim gut long en. (Ap 16:4, 5) Yumi olgeta i no ken ting kongrigesen em samting nating tasol o kongrigesen i bilong helpim yumi long bung wantaim, em tasol. Long olgeta hap kongrigesen em ples bilong strongim ol Witnes Bilong Jehova. Em i helpim yumi long stap wanbel wantaim na Jehova i ken skulim yumi na yumi inap mekim wok bilong Kingdom.—Ais 2:2.
3 Kongrigesen Kristen em i namba wan rot bilong skulim yumi long tok i tru. (1 Ti 3:15) Ol disaipel bilong Jisas i mas “i stap wanbel”—wanbel wantaim God, na Krais, na wanbel wantaim. (Jo 17:20, 21; skelim wantaim Aisaia 54:13.) Maski yumi go long wanem hap bilong graun, ol brata bilong yumi i bilip na bihainim tok na lo bilong Baibel.
4 Sosaiti i skulim yumi na givim ol samting long yumi, na yumi inap mekim wok bilong yumi long kamapim disaipel. Long olgeta mun, Wastaua, na Kirap!, na Wok Kingdom Bilong Yumi i kamapim ol gutpela tok bilong helpim yumi long kirapim tok bilong Baibel long ol man. Ol tok i kamap long miting ol i bilong soim yumi long olsem wanem yumi ken painim ol man i laik harim tok na kirapim ol long kisim save long tok i tru. Lain Witnes i go bikpela long olgeta hap na dispela i kamapim long ples klia olsem Jehova i blesim dispela wok.—Mt 28:18-20.
5 Kongrigesen i save strongim yumi long olgeta de long ‘laikim ol arapela na mekim ol gutpela pasin long ol.’ (Hi 10:24, 25) Kongrigesen i strongim yumi long sanap strong na karim hevi. Ol wasman i gat pasin sori i helpim yumi long karim ol hevi. (Sav 4:9-12) Yumi kisim ol gutpela tok bilong stretim yumi sapos samting i laik pulim yumi na yumi laik lusim rot. Wanem narapela oganaisesen i save helpim gut ol man olsem?—1 Te 5:14.
6 Jehova i laik bai yumi pas gut long oganaisesen bilong em na yumi stap wanbel. (Jo 10:16) Oganaisesen i save salim ol wasman bilong raun bilong strongim kongrigesen, na long dispela rot yumi save gut long tingting bilong gutpela wokboi. Sapos yumi bihainim ol gutpela tok bilong stiaim yumi, bai yumi pas gut wantaim na dispela bai helpim yumi long stap strong long samting bilong spirit.
7 Kongrigesen em i bikpela samting bilong helpim yumi long stap strong long samting bilong spirit. Sapos yumi no pas gut wantaim kongrigesen, ol wok bilong Jehova yumi mekim, em i no inap orait long en. Olsem na yumi mas pas gut wantaim samting Jehova i bin givim long yumi. Yumi mas wok gut wantaim kongrigesen long mekim ol wok bilong en na bihainim ol tok yumi kisim long kongrigesen. Long dispela rot tasol yumi ken kamapim long ples klia olsem kongrigesen em i bikpela samting long yumi.—Sng 27:4.