Oltaim Yumi Mas Tingting Long Ol Samting Bilong Antap
1 Wanpela nius (The New York Times, Disemba 31, 1994) i stori long ol man bilong dispela taim na ol samting ol i ting bai kamap bihain, na i tok: “Ol i pret long ol samting bai kamap bihain, olsem: no gat wok, sik, mani i sot, ol hevi bilong graun.” Long olgeta hap ol man i tingting planti long ol samting bai painim ol bihain. Taim yumi ol Witnes Bilong Jehova i autim tok, yumi bungim kain man olsem. Ol hevi i painim ol i save painim yumi tu, tasol yumi bilip na wetim ol gutpela samting Baibel i tok bai kamap, olsem na tingting bilong yumi long ol samting bai kamap bihain em i narapela kain olgeta long tingting bilong ol.—Ais 65:13, 14, 17.
2 Yumi bilip na wetim gutpela samting bai kamap, na dispela i kirapim planti man i gat gutpela bel long putim yau long tok yumi autim long ol. Planti man i bel hevi na ol i stap nogut, na taim yumi toktok wantaim ol, dispela i mekim gut bel bilong ol. Ol i amamas long ol tok ol i harim, olsem na sampela ol i orait long yumi stadi wantaim ol long Baibel. Tasol pastaim long stadi, sampela i laik kamapim ol hevi bilong ol. Yumi ken harim, tasol nogut yumi lusim tingting olsem wok bilong yumi em bilong lainim ol man long ol gutpela tok i tru bilong Baibel.
3 Yumi sori long ol man i gat hevi. Long Matyu 11:28, Jisas i soim rot long yumi taim em i tok: “Yupela ol man i save hatwok tru na i karim ol bikpela hevi, yupela olgeta kam long mi.” Yumi tu i mas strongim ol man olsem. Tasol long laspela hap bilong ves 28, Jisas i tok: “Bai mi givim malolo long yupela.” Yumi tu i mekim olsem taim yumi tokim ol long ol gutpela tok promis bilong God. Taim yumi putim gut yau long ol tok ol i kamapim, dispela i makim olsem yumi tingim gut ol. Long dispela rot bai yumi inapim wok yumi mas mekim bilong autim gutnius bilong Kingdom, na helpim ol narapela long save olsem Kingdom tasol em i rot bilong pinisim olgeta hevi i save painim ol man.—Mt 24:14.
4 Wok bilong yumi i no olsem bilong dokta samting. Yumi mekim wok aposel Pol i stori long en long 1 Timoti 4:6, em wok bilong lainim ol man long “gutpela save” bilong Baibel. Man i bel hevi, ating yumi mas kirapim em long putim ol hevi bilong em long Jehova. Lainim em long “tingting long ol samting bilong antap”—ol samting bilong Kingdom. (Kl 3:2) Taim ol man i wok long putim tingting bilong ol long Tok Bilong God, dispela bai strongim ol, long wanem, Tok Bilong God i gat strong.—Hi 4:12.
5 Olsem na yumi mas wok long helpim ol man long tingim ol samting i ‘stretpela, na i klinpela, na i nambawan tru, na ol i ken amamas long en.’ (Fl 4:8) Sapos ol i tingim ol samting bilong Kingdom, ol bai kisim planti gutpela blesing wankain olsem yumi save kisim. Ol tu bai amamas long save, long rot bilong Kingdom, Jehova bai pinisim olgeta hevi bilong ol.—Sng 145:16.