Wok Long Kamap Strong
1 Tingim bek namba wan taim yu harim tok bilong Kingdom. Ol tok i tru yu harim i bin kirapim bel bilong yu long kisim sampela save moa. I no longtaim na yu save olsem yu mas senisim wokabaut bilong yu, long wanem, ol pasin bilong Jehova i winim tru ol pasin bilong yumi. (Ais 55:8, 9) Yu bin senisim pasin bilong yu, na dediketim laip bilong yu, na kisim baptais.
2 Tasol maski yu bin kamap strong liklik long ol samting bilong spirit, sampela pasin kranki i stap yet bilong stretim. (Ro 12:2) Ating yu bin pret long ol man, na dispela i mekim na yu surik long autim tok. O ating yu bin sot long kamapim sampela pasin bilong spirit holi. Tasol yu no slek liklik, nogat; yu tingting strong long mekim pasin bilong yu i kamap gutpela moa na yu putim sampela mak bilong spirit bilong winim.
3 Ating nau yu bin baptais inap sampela yia. Olsem wanem? Taim yu tingim bek pasin bilong yu long bipo, yu ting pasin bilong yu i bin senis na kamap gutpela moa? Yu winim pinis sampela mak yu bin putim? Yu givim bel tru long wok olsem long “taim [yu] stat long bilip long God”? (Hi 3:14) Timoti i stap strongpela Kristen inap planti yia pinis tasol Pol i kirapim em strong olsem: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.”—1 Ti 4:15.
4 Mas Skelim Yu Yet: Olsem wanem? Taim yumi tingim bek ol pasin yumi bin mekim, yumi wok long mekim yet sampela pasin kranki olsem long taim yumi baptais nupela yet? Yumi lus long winim sampela mak yumi bin putim? Sapos olsem, bilong wanem yumi no bin winim? Ating yumi gat laik tru long mekim, tasol yumi no wok hariap long mekim. Ating yumi tingting planti tumas long ol samting bilong skin o ol hevi i painim yumi na ol dispela samting i pasim yumi.—Lu 17:28-30.
5 Yumi no inap senisim ol samting yumi mekim pinis, tasol yumi inap senisim sampela samting yumi laik mekim long bihain. Yumi inap skelim gut pasin bilong yumi yet na luksave long ol samting yumi sot long en, na bihain wok strong long mekim ol dispela pasin i kamap gutpela. Ating yumi mas wok strong moa long kamapim ol pasin bilong spirit holi. (Ga 5:22, 23) Sapos i hatwok long yumi stap wanbel wantaim ol narapela o wok gut wantaim ol elda, em bikpela samting yumi mas wok long kisim pasin daun.—Fl 2:2, 3.
6 Olsem wanem? Yumi wok strong long inapim mak bilong holim sampela wok insait long kongrigesen na long dispela rot yumi kamapim klia olsem yumi wok long kamap strong? Sapos ol brata i givim bel moa ol inap winim mak bilong kamap wokman o elda. Sampela bilong yumi inap insait long wok painia oltaim o wok painia haptaim. Na ating sampela i laik wok strong moa long mekim stadi bilong ol yet, o long bekim tok moa long miting, o long mekim wok bilong ol long autim tok i kamap gutpela moa.
7 Yumi wan wan i mas pasim tok long bel long wanem samting yumi mas wok strong long mekim i kamap gutpela moa. Yumi save, sapos yumi givim bel tru long kamap strong, bai yumi kisim bikpela amamas moa na bai yumi inap helpim tru wok bilong kongrigesen.—Hi 6:1.