Helpim Ol Long Mekim Gen Wok
1 Aposel Pol i save long samting em inap bagarapim ol Kristen long spirit, olsem na em i tok: “Nau em i taim bilong yupela i lusim slip na kirap. . . . Taim bilong God i laik kisim bek yumi, . . . em i kamap klostu liklik.” (Ro 13:11) Pol i tingting planti long ol brata bilong em ol i slip long ol samting bilong spirit; em i laik kirapim ol long mekim gen wok.
2 Nait bilong olpela taim i laik pinis na tulait bilong nupela taim i laik kamap. (Ro 13:12) I gat as tru na yumi tingting planti long ol brata i no bung moa wantaim yumi na autim gutnius. Yumi ken mekim wanem bilong helpim ol long mekim gen wok bilong Jehova?
3 Ol Samting Ol Elda i Ken Mekim: Ol man i lusim wok autim tok, i no olsem olgeta i givim baksait long tok i tru, nogat; planti i no autim tok, long wanem, ol i bel hevi, o sampela hevi i bin painim ol, o mani kago i pulim ol, o ol i tingting planti long sampela narapela hevi bilong skin. (Lu 21:34-36) Sapos inap, gutpela sapos yumi helpim ol taim ol i no lusim yet wok autim tok. Taim wanpela pablisa i lusim sampela mun long autim tok, kuskus bilong kongrigesen i mas toksave long brata i lukautim Buk-Stadi. Ol i ken stretim rot bilong go lukim em. Ol i mas wok long save long as na pablisa i no bin autim tok na olsem wanem ol i ken helpim em.—Lukim Wastaua, Septemba 15, 1993, p. 20-23.
4 Ol Samting Ol Narapela i Ken Mekim: Planti bilong yumi i save long wanpela brata o sista i bin lusim wok autim tok. Ating bipo em i gutpela pren bilong yumi. Yumi ken mekim wanem bilong helpim em? Gutpela sapos yumi go lukim em. Tokim em yu sori yu no lukim em moa. Amamas na kamapim gutpela tok. Tokim em yu tingim em, tasol no ken mekim tok olsem yu ting em i sik long spirit. Stori long ol gutpela ekspiriens bilong strongim em o long sampela gutpela samting kongrigesen i bin mekim. Givim bel long tokim em long narapela Kibung Distrik bai kamap, na kirapim em long kam. Sapos em i bung gen wantaim yumi, ating dispela bai helpim em, winim olgeta narapela samting. Askim em long em i laik bai yu kam wantaim em long miting. Toksave long ol elda long ol samting i bin kamap.
5 Taim man i lusim wok autim tok em i kirap gen long kam long ol miting, ating bai em i sem liklik taim em i bungim ol man bipo em i save long ol. No ken askim em, “Yu bin stap we?” Tokim em yu amamas long lukim em. Kirapim em long insait long toktok. Kisim em i go sekanim ol narapela em i no save long ol. Sindaun wantaim em long miting, na givim buk singsing na ol narapela buk bilong stadi long em, sapos em i no gat. Kirapim em long kam gen, na sapos i gat wok long mekim, tokim em yu bai amamas long helpim em.
6 Jehova na Jisas i sori long ol man i bin lus, olsem na taim ol i kamap strong gen long spirit, Jehova na Jisas i amamas. (Mal 3:7; Mt 18:12-14) Sapos ol man yumi bin helpim ol, ol i kirap gen long mekim wok bilong Jehova, yumi tu bai amamas olsem.