Askim

◼ Olsem wanem? I stret yumi mekim Baibel-stadi wantaim wanpela brata o sista i lusim wok autim tok sapos wanpela elda bilong Komiti Bilong Lukautim Wok Bilong Kongrigesen i tokim yumi long mekim olsem?

Ol elda i gat wok bilong lukautim olgeta insait long kongrigesen, na ol pablisa i lusim wok autim tok tu. Ol i save go lukim ol dispela pablisa na skelim wanem ol samting ol i ken mekim bilong helpim ol wan wan. Sapos i stret, wanpela rot bilong helpim ol em long mekim Baibel-stadi wantaim ol. Buk Lo Bilong Yumi Long Mekim Wok Autim Tok long pes 103 i tok, em wok bilong Komiti Bilong Lukautim Wok Bilong Kongrigesen long skelim husat i mas kisim helpim long dispela kain rot.

Wasman bilong wok autim tok i save skelim husat inap tru long helpim dispela brata o sista, na ol i mas stadi long wanem ol tok, na wanem buk samting inap helpim tru em. Ating brata o sista i bin stadi wantaim em bipo o wanpela em brata o sista i save gut long em, em inap stadi wantaim em. Ol i ken askim wanpela strongpela sista long helpim wanpela sista i lusim wok autim tok. I no gat wok long narapela pablisa i go wantaim dispela pablisa long taim bilong mekim stadi. Taim pablisa i mekim stadi, em i ken kisim aua long en, na makim olsem gobek na stadi long ripot bilong em.​—⁠Lukim Wok Kingdom, Disemba 1987, pes 4, 5.

Dispela sumatin em wanpela man i baptais pinis, olsem na i no gat wok long mekim stadi i go i go inap longpela taim. Yumi laik helpim dispela brata o sista long kam gen long ol miting long olgeta taim na long mekim wok autim tok long olgeta taim. Wasman bilong wok autim tok bai wok long skelim olsem ol dispela stadi i wok long kamap gutpela o nogat. Taim ol dispela brata i kisim kain gutpela helpim olsem, bihain ol i mas karim hevi bilong ol pasin ol yet i mekim long ai bilong Jehova na sanap strong long tok i tru “olsem graun i save holimpas rop bilong diwai na mekim diwai i sanap strong.”​—⁠Ef 3:​17; Ga 6:⁠5.