Askim

◼ Olsem wanem yumi ken helpim wanpela man i bin lusim wok autim tok longtaim tru long winim gen mak bilong mekim wok pablisa bilong autim gutnius?

Taim wanpela pablisa i lusim wok autim tok inap longpela taim i kamapim olsem em i gat bikpela laik tru long mekim wok bilong Jehova, i gat as na yumi amamas long dispela. (Lu 15:​4-6) Ating dispela man i bin larim ol man i birua long tok i tru o ol hevi bilong ol wan wan de i daunim em na em i no mekim stadi bilong em yet, go long ol miting, na mekim wok autim tok. Olsem wanem yumi ken helpim em na bai em i kamap strong gen long ol samting bilong spirit?

Yumi olgeta i mas helpim em na kamapim klia olsem yumi laikim em tru. Wantu ol elda bai skelim ol samting bilong spirit dispela man i mas kisim. (Je 5:​14, 15) Sapos dispela pablisa i bin lusim wok autim tok inap sotpela taim, ating wanpela pablisa i gat save inap helpim em long mekim wok autim tok gen. Tasol sapos dispela pablisa i no bin bung wantaim kongrigesen inap longtaim, ating yupela i mas mekim sampela samting moa bilong helpim em. Ating yupela i ken mekim Baibel-stadi wantaim em long wanpela buk i stret long em na bai dispela i strongim bilip bilong em na bai em i pilim tru. Sapos olsem, orait wasman bilong wok autim tok bai stretim rot na wanpela pablisa i gat save i mekim stadi wantaim em. (Hi 5:​12-14; lukim Askim i stap long Wok Kingdom bilong Novemba 1998.) Sapos yu save wanpela i mas kisim kain helpim olsem, orait toktok wantaim wasman bilong wok autim tok long kongrigesen bilong yu.

Paslain long askim wanpela man i bin lusim wok autim tok inap longpela taim long insait gen long wok autim tok, em i gutpela long tupela elda i ken bung wantaim em bilong save em i inapim ol mak bilong mekim wok autim tok o nogat. Ol bai bihainim wankain pasin olsem ol i save mekim taim ol i bung wantaim ol nupela i laik winim mak bilong kamap pablisa bilong autim gutnius. (Lukim Wastaua, Me 1, 1989, p. 18.) Dispela pablisa i bin lusim wok autim tok em i mas i gat bikpela laik long autim gutnius long ol narapela. Na tu, em i mas inapim ol mak buk Lo, pes 97-99 i kamapim, na em i mas kam long ol miting long olgeta taim.

Taim dispela pablisa i kam bek, oltaim em i mas mekim ol narapela narapela wok bilong spirit, dispela bai strongim em long pas gut wantaim Jehova na wokabaut yet long rot i go long laip oltaim. (Mt 7:14; Hi 10:​23-25) Ol samting em i mekim bilong “wok strong tru” na kisim ol pasin Kristen i save stap oltaim, dispela bai lukautim em na bai em i no ken slek gen long mekim wok olsem wanpela disaipel Kristen.​—⁠2 Pi 1:​5-8.

This article is repeated in km 11/06, 4/07.