Go Long Ol Miting—‘Wok Strong Moa Long Mekim Olsem’
1 Pasin bilong bung wantaim em i bin stap olsem wanpela bikpela samting long lain bilong Jehova. Ol Israel i gat tempel na ol haus lotu bilong bung long en bilong mekim lotu i tru, na bilong God i ken skulim ol, na bilong kisim amamas wantaim. Olsem tasol, ol Kristen bilong pastaim ol i no bin lusim pasin bilong bung wantaim. Taim ol hevi na traim i wok long i go bikpela long dispela taim bilong las de, yumi tu i mas kisim strong long ol samting bilong spirit long rot bilong ol miting bilong kongrigesen—na yumi mas wok strong moa long kisim. (Hi 10:25) I gat 3-pela as na yumi save go long ol miting.
2 Bilong Bung Wantaim: Ol tok bilong Baibel i save kirapim yumi long “givim gutpela tok long ol arapela . . . na strongim bel bilong ol.” (1 Te 5:11) Taim yumi bung wantaim ol brata sista long ol miting Kristen, bai yumi kisim ol gutpela tingting na dispela i save kirapim yumi long mekim ol gutpela wok. Tasol sapos yumi no i go long ol miting, bai yumi inap kisim ol tingting kranki, o tingim yumi yet tasol, o yumi inap kisim tu ol tingting i no klin.—Snd 18:1.
3 Bilong Kisim Skul: Ol miting Kristen i save kamapim ol gutpela tok bilong Baibel bilong strongim yumi long laikim yet God. Ol miting i save skulim yumi long bihainim “olgeta tingting bilong God.” (Ap 20:27) Long ol miting, yumi save lain long pasin bilong autim tok na skulim ol man long gutnius, em ol dispela save yumi mas kisim moa yet long nau bambai yumi inap pilim bikpela amamas bilong painim na helpim ol man i laikim tok i tru bilong Baibel.
4 Bilong Lukautim Yumi: Long dispela taim nogut, kongrigesen i olsem ples hait bilong spirit—wanpela gutpela ples tru em bel isi na pasin sori i stap long en. Taim yumi stap long ol miting Kristen, spirit holi bilong God i ken helpim tru yumi, na helpim yumi long kamapim ol pasin bilong spirit olsem, “pasin bilong laikim tru ol arapela na pasin bilong amamas na pasin bilong i stap bel isi na pasin bilong i no belhat kwik na pasin bilong helpim ol man na mekim gutpela pasin long ol na pasin bilong wokabaut stret oltaim na pasin bilong i stap isi na pasin bilong daunim laik bilong olpela bel.” (Ga 5:22, 23) Ol miting i save strongim yumi long sanap strong long bilip. Ol i save inapim yumi bambai yumi redi long winim ol traim bai painim yumi long bihain.
5 Taim yumi go oltaim long ol miting, bai yumi pilim samting man bilong raitim Song i bin toktok long en long Song 133:1, 3: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” Long wanem wanem hap lain bilong God i bung na mekim wok bilong em long nau, ‘long dispela ples Bikpela i save mekim gut tru long ol . . . na em i givim laip bilong i stap gut oltaim’ long ol.