Askim

◼ Yumi ken mekim wanem bilong helpim ol miting bilong yumi i kamap gutpela moa?

Ating sampela inap ting em wok bilong ol elda na wokman tasol long mekim ol miting i kamap gutpela, long wanem, ol i save lukautim na mekim planti tok insait long ol miting. Tasol i no olsem, yumi olgeta i ken mekim ol samting bilong helpim ol miting i kamap gutpela na i helpim yumi. Yumi ken mekim ol dispela tenpela samting bilong helpim ol miting i kamap gutpela moa:

Redim ol miting paslain. Taim yumi redi gut, yumi inap amamas long ol miting. Taim yumi olgeta i mekim olsem, ol miting inap helpim na strongim yumi moa. Kam olgeta taim. Taim planti i kam, dispela inap strongim olgeta i stap long miting, na strongim yumi long pilim tru olsem i bikpela samting long kam long ol miting. Kam paslain long miting i kirap. Sapos yumi kam paslain long taim miting i kirap, yumi ken insait long namba wan singsing na beten na long dispela rot miting bai helpim gut yumi. Bringim olgeta samting i kam. Taim yumi bringim Baibel na ol narapela buk samting yumi save mekim wok long en i kam long miting, yumi inap lukim ol tok bilong en tu na kisim gut ol tok brata i kamapim. No ken larim ol samting i pulim tingting. Taim yumi sindaun klostu long pletfom, yumi inap harim gut ol tok. Pasin bilong toktok isi isi na i go i kam long toilet, em inap mekim yumi yet na ol narapela i no putim gut yau long ol tok. Bekim ol tok. Taim planti bilong yumi i putim han bilong bekim ol tok, dispela i save strongim planti moa taim ol i harim ol tok yumi mekim bilong kamapim bilip bilong yumi. Bekim sotpela tok. Dispela inap mekim na planti moa i ken insait long bekim tok. Yumi mas bekim tasol ol tok i stap long buk samting yumi stadi long en. Inapim wok bilong yu. Sapos yu gat tok insait long Skul Bilong Wok Autim Tok o yu gat wanpela soim samting long Miting Bilong Wok, redim gut, na mekim traim long haus, na wok strong long mekim na no ken lusim. Tok amamas long ol narapela. Tokim ol narapela olsem yu pilim tru gutpela wok ol i mekim. Dispela i save strongim ol na kirapim ol long mekim gutpela wok moa long bihain. Strongim narapela narapela. Pasin bilong tok gude na mekim ol gutpela tok bilong strongim ol narapela paslain na bihain long ol miting, ol i gutpela samting bilong givim amamas na strong long yumi taim yumi go long ol miting.