Ol Wasman i Go Pas Long Wok—Wasman Siaman
1 Wok wasman insait long kongrigesen em wanpela bikpela wok tru. (Ap 20:28; 1 Ti 3:1) Dispela em i namba wan bilong ol stori mipela bai kamapim long ol narapela narapela wok ol elda Kristen i save mekim, bambai yumi olgeta i ken pilim tru bikpela wok ol i mekim bilong helpim yumi.
2 Sosaiti i save makim wasman siaman na em i mekim dispela wok inap long taim ol i senisim em. Taim wasman siaman i stretim ol wok, dispela i save helpim ol elda long mekim gut ol wok bilong ol. (Buk Lo, pes 41) Wanem ol wok i insait long en?
3 Olgeta pas i kam long kongrigesen i mas i go long wasman siaman na bihain em i givim hariap long kuskus bilong mekim wok long en. Bilong redi long miting bilong ol elda, wasman siaman i save kisim tingting bilong wan wan elda long ol samting ol bai stori long en, na em i wokim wanpela lista bambai ol i ken stori long en. Na em i save stap siaman long taim bilong ol miting bilong ol elda. Taim ol elda i pasim tok long mekim wanpela samting, em wok bilong wasman siaman long helpim ol brata long bihainim dispela tok. Em i save makim husat husat bai mekim ol hap insait long ol Miting Bilong Wok na makim husat bai mekim pablik-tok. Em i skelim olgeta toksave ol i mas mekim long kongrigesen na em i mas tok orait long baim ol samting kongrigesen i mas baim long olgeta taim olsem wara na paua samting, na stretim ol samting bambai ol i ken skelim ol samting bilong akaun bilong kongrigesen long olgeta 3-pela mun.
4 Wasman siaman i save stretim wok bilong Komiti Bilong Lukautim Wok Bilong Kongrigesen. Taim wanpela Baibel-stadi i laik kamap pablisa i no baptais yet, o taim pablisa i laik kisim baptais, wasman siaman i save stretim ol samting bambai ol elda i ken bung wantaim em. Wasman siaman i save go pas long stretim ol samting bilong redi long taim wasman sekit i kam bambai dispela wik bilong mekim bikpela wok i ken strongim tru kongrigesen.
5 I gat planti narapela narapela wok wasman siaman i mas mekim. Taim em i wok strong long mekim wok bilong em long pasin daun, yumi olgeta i ken mekim wok bilong yumi long wok gut wantaim ol elda. (Ro 12:8) Taim yumi “bihainim tok” na “stap aninit” long ol man i go pas long yumi, ol bai amamas moa yet long mekim wok bilong ol.—Hi 13:17.