Yumi Inap Mekim Bikpela Wok i Winim Wok Bilong Jisas
1 Taim Jisas i mekim wok bilong em long graun, em i mekim sampela bikpela wok. Long rot bilong mirakel em i givim kaikai long planti tausen manmeri, oraitim sik bilong planti, na kirapim bek sampela man i dai pinis. (Mt 8:1-17; 14:14-21; Jo 11:38-44) Wok bilong em i bin kirapim tingting bilong olgeta manmeri bilong Israel. Tasol long laspela apinun paslain long em i dai, em i tokim ol disaipel bilong em olsem: “Man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim.” (Jo 14:12) Olsem wanem yumi inap mekim “bikpela wok,” winim wok Jisas i mekim?
2 Autim Tok Long Planti Teritori Moa: Jisas i bin mekim wok long hap bilong Palestain tasol, tasol em i tokim ol disaipel bilong em long autim tok “i go inap long olgeta hap bilong graun,” winim ol hap em i bin autim tok long en. (Ap 1:8) Wok bilong autim tok em i bin kirapim, nau i go kamap long olgeta hap bilong graun, long 232 kantri. (Mt 24:14) Olsem wanem? Yu insait tru long mekim wok autim tok long teritori bilong kongrigesen bilong yu?
3 Autim Tok Long Planti Man Moa: Taim Jisas i go bek long heven, i no gat planti disaipel i stap bilong mekim yet wok autim tok. Tasol, ol i givim bel tru long autim tok long Pentikos long yia 33 C.E., olsem na long dispela de inap olsem 3,000 manmeri i bilip long tok i tru na ol i kisim baptais. (Ap 2:1-11, 37-41) Wok bilong bungim ol man em “bel bilong ol i gutpela tru . . . bilong kisim laip i stap gut oltaim,” dispela wok i stap yet long taim bilong yumi. Nau yumi save baptaisim olsem 1,000 manmeri long olgeta wan wan de. (Ap 13:48) Olsem wanem? Yu mekim tru wok inap long skel bilong yu bilong painim ol man long wanem wanem hap ol i stap long en, na i go bek hariap bilong lukim ol man i bin amamas long harim tok?
4 Autim Tok Inap Longpela Taim Moa: Jisas i bin mekim wok autim tok long dispela graun inap 3 na hap yia. Planti bilong yumi i bin mekim wok autim tok inap longpela taim moa. Maski hamas yia moa God bai larim yumi mekim yet dispela wok, yumi amamas long helpim olgeta wan wan nupela disaipel long kirap bihainim rot bilong kisim laip. (Mt 7:14) Olsem wanem? Long olgeta mun yu wok strong long mekim wok bilong Bikpela?—1 Ko 15:58.
5 Jisas i strongim yumi olsem na yumi ken bilip tu olsem yumi bai mekim bikpela wok moa yet olsem disaipel tru bilong em.—Mt 28:19, 20.