Save Gut Long Ol Brata Bilong Yu
1 Baibel i tok, gutpela pren em i save pas gut wantaim narapela na pasin bilong em i winim pasin namel long tupela brata wanblut, na oltaim em i laikim pren bilong em na stap gut long em, na em i save sambai long em long taim bilong hevi. (Snd 17:17; 18:24) Sapos yumi wok strong long save gut long ol narapela na long laikim tru ol, bai yumi no inap sot long painim ol gutpela pren olsem long kongrigesen.—Jo 13:35.
2 Paslain na bihain long ol miting, rot i op long yumi ken save gut long ol brata na sista. I gutpela sapos yu kam hariap long ol miting na bihain long miting yu ken stap longtaim liklik bambai yu ken save gut na pas gut wantaim ol brata na sista. Traim long save long narapela narapela brata na sista na long toktok wantaim ol, olsem ol lapun i bin stap longtaim long tok i tru, na ol yangpela, na ol lain i save sem.
3 Yu Yet i Mas Kirapim Toktok: Yu no ken tok moning o apinun o gude samting na em tasol. Yu ken kirapim toktok long rot bilong wanpela ekspiriens yu bin kisim long wok autim tok, o wanpela gutpela tok bilong nupela magasin, o wanpela gutpela tok nau yu harim long miting. Yu ken save gut long ol brata long rot bilong putim gut yau long tok bilong ol, kirapim ol long stori long ekspiriens bilong ol na long ol samting ol i wok long lainim. Sapos yu askim wanpela long stori long olsem wanem em i bin save long Jehova, ating long dispela rot yu inap save gut long em. I gat planti samting i bin painim sampela long i stap bilong ol, na dispela i bin strongim bilip bilong ol, na sampela i wok long karim sampela hevi long nau em planti brata sista i no save long en. Taim yumi kisim save long ol dispela samting olsem ol gutpela pren i mas mekim, dispela bai helpim yumi long tingim gut ol narapela na hariap long mekim ol samting bilong helpim ol.
4 Kamap Pren Bilong Ol: Bihain long taim pikinini meri bilong em i dai, wanpela sista i hatwok long mekim ol singsing bilong Kingdom i stori long man i dai pinis bai kirap bek. Em i tok: “Wanpela taim mi krai na wanpela sista i sindaun long narapela lain sia em i lukim mi. Em i kam na holimpas mi na em i singsing wantaim mi. Bel bilong mi i pilim tru gutpela pasin bilong ol brata sista na mi laikim ol moa yet, na mi amamas tru long mipela i go long ol miting, long wanem, mipela i save, long Haus Kingdom yet mipela inap kisim helpim bilong strongim mipela.” Yumi ken kamap pren bilong ol brata sista bilong yumi long rot bilong mekim gut bel bilong ol long olgeta taim na strongim bel bilong ol.—Hi 10:24, 25.
5 Taim ol hevi bilong dispela graun i wok long i go bikpela moa, yumi mas pasim tok long bel bilong yumi long save gut long ol brata sista bilong yumi. Dispela gutpela pasin bilong strongim narapela narapela em bai helpim gut yumi olgeta.—Ro 1:11, 12.