Husat Ol i Brata na Susa Bilong Yumi?

WANPELA taim Bikpela Tisa i mekim wanpela narapela kain askim. Em i askim olsem: “Husat em i mama bilong mi? Na husat em i brata bilong mi?” (Matyu 12:48) Yu inap bekim dispela askim?— Ating yu save olsem mama bilong Jisas em Maria. Tasol yu save long nem bilong ol brata bilong em?— Em i gat ol susa tu?—

Baibel i tok nem bilong ol brata bilong Jisas em “Jems na Josep na Saimon na Judas.” Na Jisas i gat ol susa em ol i stap laip taim em i bin mekim wok autim tok. Jisas em i namba wan pikinini, olsem na ol dispela arapela i liklik long em.​—Matyu 13:​55, 56; Luk 1:​34, 35.

Olsem wanem? Ol brata bilong Jisas i kamap disaipel tu?— Baibel i tok pastaim “ol i no bilip long em.” (Jon 7:5) Tasol bihain, Jems na Judas (narapela nem bilong em Jut) ol i kamap disaipel bilong Jisas, na ol i raitim tupela buk bilong Baibel. Yu save long ol buk ol i bin raitim?— Yes, Buk Jems na Buk Jut.

Tru, Baibel i no kolim nem bilong ol susa bilong Jisas, tasol yumi save olsem em i gat tupela o sampela susa moa. Olsem wanem? Ol dispela susa i kamap disaipel bilong em?— Baibel i no mekim wanpela tok long dispela, olsem na yumi no save. Tasol yu save bilong wanem Jisas i bin mekim dispela askim olsem, “Husat em i mama bilong mi? Na husat em i brata bilong mi?”— Yumi ken painimaut dispela.

Jisas i wok long skulim ol disaipel i stap taim wanpela man i kam na tok: “Mama bilong yu wantaim ol brata bilong yu ol i sanap ausait, na ol i laik toktok wantaim yu.” Olsem na Jisas i mekim wok long dispela samting i kamap bilong skulim ol man long wanpela bikpela samting, na em i mekim dispela askim: “Husat em i mama bilong mi? Na husat em i brata bilong mi?” Em i makim han i go long ol disaipel bilong em na tok: “Lukim mama bilong mi wantaim ol brata bilong mi.”

Bihain Jisas i stori gut long mining bilong tok bilong em, olsem: “Man o meri i save bihainim laik bilong Papa bilong mi i stap long heven, em i brata na susa na mama bilong mi.” (Matyu 12:​47-​50) Dispela i soim olsem Jisas i laikim tru ol disaipel bilong em. Em i skulim yumi olsem ol disaipel i olsem ol brata, susa, na mama tru bilong em.

Long dispela taim, ol brata bilong Jisas yet​—Jems, Josep, Saimon, na Judas​—ol i no bilip olsem Jisas em i Pikinini Bilong God. Ating ol i no bin bilipim ol tok ensel Gebriel i bin mekim long mama bilong ol. (Luk 1:​30-​33) Olsem na ating ol i bin mekim hatpela pasin long Jisas. Man i mekim kain pasin olsem, em i no stap olsem brata tru na susa tru. Yu save long wanpela em i bin mekim hatpela pasin long brata o susa bilong em?—

Baibel i stori long Iso na Jekop na olsem wanem Iso i bin kros nogut tru na em i tok: “Bai mi kilim Jekop i dai.” Mama bilong ol, Rebeka, em i pret nogut tru, olsem na em i salim Jekop i go long narapela hap na bai Iso i no inap kilim em i dai. (Stat 27:​41-​46) Tasol planti yia bihain pasin bilong Iso i senis, na em i holimpas Jekop na givim kis long em.​—Stat 33:4.

Bihain, Jekop i gat 12-pela pikinini man. Tasol ol bikpela pikinini bilong Jekop ol i no laikim liklik brata bilong ol, em Josep. Ol i jeles long em, long wanem, em i feiveret pikinini bilong papa bilong ol. Olsem na ol i salim em long ol man bilong baim na salim ol wokboi nating, em ol i laik i go long Isip. Bihain ol i tokim papa bilong ol olsem wanpela wel animal i bin kilim i dai Josep. (Stat 37:​23-​36) Em pasin nogut tru, a?—

Bihain ol brata bilong Josep i sori tru long samting ol i bin mekim. Olsem na Josep i lusim rong bilong ol. Olsem wanem? Yu inap luksave long olsem wanem Josep i olsem Jisas?— Ol aposel bilong Jisas i bin lusim em taim hevi i painim em, na Pita i giaman olsem em i no save long Jisas. Tasol olsem Josep, Jisas i lusim rong bilong olgeta bilong ol.

Na i gat dispela tupela brata, Kein na Abel. Stori bilong tupela tu inap skulim yumi. God i lukim bel bilong Kein olsem em i no laikim tru brata bilong em. Olsem na God i tokim Kein olsem em i mas senisim pasin bilong em. Sapos Kein i bin laikim tru God, em bai putim yau long tok bilong God. Tasol em i no laikim God. Wanpela taim Kein i tokim Abel olsem: ‘Yumi go wokabaut long ples kunai.’ Abel i go wantaim Kein. Na taim ol yet i stap long ples kunai, Kein i paitim brata bilong em strong tru na kilim em i dai.​—Stat 4:​2-8.

Baibel i tokim yumi olsem i gat wanpela samting yumi mas lainim long dispela stori. Yu save em wanem samting?— “Bipo tru yupela i bin harim tok olsem, yumi wan wan i mas laikim tru ol arapela. Yumi no ken i stap olsem Kein. Em i man bilong Satan.” Olsem na ol brata na susa i mas laikim narapela narapela. Ol i no ken bihainim pasin bilong Kein.​—1 Jon 3:​11, 12.

Bilong wanem yumi no ken bihainim pasin bilong Kein?— Long wanem, Baibel i tok em i “man bilong Satan.” Kein i bihainim pasin bilong Satan, olsem na i olsem Satan i papa bilong em.

Olsem wanem? Yu save nau long as na em i bikpela samting long yu mas laikim ol brata na susa bilong yu?— Sapos yu no laikim ol, yu bihainim pasin bilong ol pikinini bilong husat?— Pasin bilong ol pikinini bilong Satan. Yu no laik kamap olsem, a?— Olsem na long wanem rot yu inap kamapim klia olsem yu laik stap pikinini bilong God?— Em long rot bilong laikim tru ol brata na susa bilong yu.

Tasol pasin laikim em i wanem samting?— Em wanpela samting yumi pilim long bel na i kirapim yumi long mekim ol gutpela pasin long ol arapela man. Yumi soim olsem yumi laikim ol arapela taim yumi belgut long ol na taim yumi mekim ol gutpela samting bilong helpim ol. Na husat em ol brata na susa em yumi mas laikim ol?— Tingim, Jisas i skulim yumi olsem em ol lain i insait long bikpela famili Kristen.

Em i bikpela samting olsem wanem long yumi mas laikim ol dispela brata na sista Kristen bilong yumi?— Baibel i tok: “Man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jon 4:​20) Olsem na yumi no inap laikim sampela tasol insait long famili Kristen. Yumi mas laikim olgeta. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Olsem wanem? Yu laikim olgeta brata na sista?— Tingim, sapos yu no laikim ol, yu no inap laikim tru God.

Olsem wanem yumi inap soim olsem yumi laikim tru ol brata na sista bilong yumi?— Sapos yumi laikim ol, yumi no abrusim ol, long wanem, yumi no laik toktok wantaim ol, nogat. Yumi bai mekim pasin pren wantaim olgeta. Oltaim yumi bai mekim gutpela pasin long ol na bai yumi redi long givim sampela samting bilong yumi long ol. Na sapos hevi i painim ol, yumi bai helpim ol, long wanem, yumi wanpela bikpela famili.

Taim yumi laikim tru olgeta brata na sista bilong yumi, dispela i kamapim klia wanem samting?— Em i kamapim klia olsem yumi disaipel bilong Jisas, em Bikpela Tisa. Na yumi laik stap olsem, a?—