Olsem Wanem? Yu Inap Helpim Ol?

¹ Aposel Pol i kirapim ol brata sista long kongrigesen olsem narapela i mas lukautim narapela long wankain pasin. (1 Ko 12:25) Olsem na yumi mas tingim gut ol narapela na yumi mas redi long helpim ol taim ol i gat hevi. Wanpela samting yumi ken tingim, olsem: Sampela sista bilong yumi long spirit ol i wanpis na ol i mas mekim bikpela long ol pikinini bilong ol insait long tok i tru. Ol dispela sista i gat bikpela wok tru long lainim ol pikinini long ol samting bilong spirit. I stret yumi mas mekim gutpela tok bilong strongim ol na helpim ol sapos ol “i sot long ol samting.” (Ro 12:13a) Olsem wanem? Yu inap helpim ol?

² Sampela Rot Bilong Helpim Ol: Sapos ol i save kalap long PMV long olgeta taim bilong i go long ol miting na ol kibung, yu ken tokim ol yu laik kisim ol long ka, na ating dispela bai helpim ol na bai ol i no ken lusim bikpela mani long baim PMV samting. Sapos yu helpim wanpela mama long lukautim ol liklik pikinini bilong em long taim bilong ol miting, em bai harim gut ol tok bilong miting na dispela i ken helpim em. Na tu, tokim em yu laik helpim em taim em i kisim ol pikinini i kam long autim tok na bai em i no gat bikpela hevi tumas. Mekim pasin olsem yu tingim gut ol pikinini​—⁠kamap pren bilong ol​—⁠dispela pasin i ken helpim tru ol yangpela bilong yumi long kamap gutpela. Sapos sampela taim yu singautim wanpela mama o papa wanpis wantaim famili bilong em long sindaun long famili-stadi bilong yu dispela i ken givim nupela strong bilong spirit long ol.

³ Tingting Gut: Yumi mas was gut na no ken strong long helpim wanpela sapos em i no laik long yumi helpim em. Na taim yumi wok long helpim ol, yumi no ken strong long insait long ol samting bilong famili bilong ol. I gutpela long ol sista na ol marit i ken helpim wanpela sista sapos em i gat sampela hevi.

⁴ Olgeta Kristen i mas mekim gut long ol narapela na ol “i mas lukautim ol gut.” (Ro 12:13b) Taim yumi helpim ol brata sista bilong yumi, em wanpela rot bilong yumi ken kamapim klia olsem pasin bilong Krais long laikim ol narapela i stap namel long yumi.​—⁠Jo 13:⁠35.