‘Ol i Save Wok Strong Long Mekim Wok Bilong Bikpela’
1 Pol i mekim dispela tok taim em i stori long Trifina na Trifosa, em tupela sista i save wok strong long kongrigesen bilong Rom. Long narapela, em Persis, em i tok: ‘Em i bin wok strong long mekim wok bilong Bikpela.’ Na em i toktok gut tu long pasin bilong Fibi olsem meri “i bin helpim planti manmeri.” (Ro 16:2, 12) Long Baibel, Dorkas i gat nem olsem wanpela meri i save “mekim ol gutpela pasin na em i save helpim ol manmeri i sot long ol samting.” (Ap 9:36) Ol dispela meri i save tingim ol samting bilong spirit, ol i gutpela blesing long kongrigesen!
2 Olsem wanem? Yumi amamas long ol sista i save wok strong insait long kongrigesen bilong yumi? Ol i mekim bikpela hap wok bilong autim tok, na mekim planti Baibel-stadi, na helpim planti ol nupela man. Ol i lusim bikpela hap taim long helpim ol pikinini long kamap strong long spirit. Ol meri Kristen i wok long strongim pasin bilong laikim narapela, amamas, bel isi, na ol i givim bel long wok insait long kongrigesen. Long kain kain rot ol i helpim ol man bilong ol na ol narapela long famili bambai ol i ken mekim bikpela wok moa bilong Jehova.
3 Ol Sista i Mekim Wok Bilong God Long Olgeta De: Na sampela meri i save mekim bikpela wok tu em ol sista misineri; planti bilong ol i bin helpim wok long i go bikpela long ol narapela kantri. Long ol kongrigesen man bilong ol i wok long en, ol meri bilong ol wasman bilong raun ol i save mekim bikpela wok bilong autim tok na strongim planti sista. Na yumi no ken lusim tingting long ol sista i wok long Betel—ol i wok strong long mekim wok bilong Jehova long helpim oganaisesen bilong em. Na gutpela wok ol sista painia oltaim i save mekim long litimapim nem bilong God i helpim planti tausen manmeri long kisim tok i tru.
4 Ol dispela bilipmeri i no tingim ol yet tasol, olsem na ol i kisim bikpela amamas long pasin ol i mekim. (1 Ti 6:6, 8) I gutpela yumi tok amamas long ol na strongim ol na helpim ol.
5 Ol meri Kristen ol i gutpela samting long oganaisesen bilong Jehova; ol i mekim gutpela wok i olsem blesing long yumi olgeta. Oltaim yu mas amamas long ol dispela gutpela meri na beten long Jehova i ken blesim ol taim ol i ‘wok strong long mekim wok bilong Bikpela.’