Bai Yu Go Long Narapela Kongrigesen?
Taim yu tok yes long dispela askim, i gat planti samting yu yet na ol narapela i mas mekim. Sapos yu bihainim ol dispela samting mipela i kamapim daunbilo, dispela bai helpim yu long pas gut hariap long ol brata sista long nupela kongrigesen.
(1) Taim yu save pinis long hap yu bai go long en, kuskus bilong kongrigesen bai kisim atres bilong nupela kongrigesen. Taim yu kamap pinis long dispela hap, yu mas painim hariap Haus Kingdom na kisim save long taim bilong ol miting. Sapos tupela o tripela kongrigesen i save mekim wok long Haus Kingdom, askim ol elda long tokim yu long wanem kongrigesen yu bai go long en. Yu mas go hariap long ol miting na save gut long ol elda bilong kongrigesen.
(2) Kuskus bilong kongrigesen nau yu stap long en na bilong nupela kongrigesen bai wok gut wantaim na bai Kat Ripot bilong yu na bilong famili i ken kamap long nupela kongrigesen. Kuskus bai raitim pas long ol elda bilong nupela kongrigesen bilong mekim liklik toksave na bai ol i ken save long yu. (Lukim Askim long Wok Kingdom bilong Epril 1991.) Ol elda long Komiti Bilong Lukautim Wok Bilong Kongrigesen bai toksave long wasman bilong Buk-Stadi yu bai go long en na em bai helpim yu long save long ples ol i save mekim Buk-Stadi long en.—Ro 15:7.
(3) Olgeta pablisa long nupela kongrigesen bilong yu ol i gat gutpela wok bilong mekim—ol i gat wok long save gut long yu na mekim yu i amamas. (Skelim wantaim 3 Jon 8.) Bilong ol i ken mekim olsem long yu, yu mas go long ol miting bambai yu ken amamas long insait long pasin bilong narapela i strongim narapela.
(4) Yu no ken tingting long stretim olgeta samting long nupela sindaun bilong yu pastaim na bihain yu tingting long insait long wok autim tok wantaim nupela kongrigesen. Taim yu putim ol samting bilong Kingdom i stap namba wan, ol narapela samting bai kamap gutpela na bai yu pilim olsem sindaun bilong yu long nupela hap i gutpela tru. (Mt 6:33) Taim yu sindaun gut pinis long nupela haus bilong yu, ating bai yu tingting long singautim sampela long kongrigesen i kam bambai yu ken save gut long ol.—Ro 12:13b.
Pasin bilong i go long nupela hap em i wanpela bikpela wok tru. Tasol taim olgeta i bihainim ol dispela samting mipela i kamapim, bai i no gat sampela hevi bilong spirit i painim yu. Olgeta wantaim bai amamas tru long dispela gutpela pasin i stap namel long yumi lain brata Kristen.