“God Em Inap Long Mekim Olgeta Samting”
1 Nambawan bikpela wok kongrigesen Kristen i mas mekim em wok bilong autim tok bilong Kingdom long olgeta hap. (Mt 24:14) Dispela em i bikpela wok tru. Planti man i ting yumi no gat mani samting bilong mekim dispela bikpela wok. Sampela narapela man i no inap bilip olsem yumi ken mekim dispela wok, long wanem, ol man i save tok bilas long yumi, birua, na mekim nogut long yumi. (Mt. 24:9; 2 Ti 3:12) Sampela ol i ting bai yumi no inap tru long inapim dispela wok. Tasol Jisas i tok: “God em inap long mekim olgeta samting.”—Mt 19:26.
2 Ol Gutpela Piksa Bilong Bihainim: Taim Jisas i kirapim wok bilong em, em wanpela tasol i mekim dispela wok namel long ol lain man. Ol man i birua long em ol i laik pasim wok bilong em long kamap gutpela, olsem na ol i mekim nogut tru long em, na bihain ol i givim bikpela pen long em na kilim em i dai. Tasol taim Jisas i laik i dai, em i tok: “Mi winim pinis strong bilong dispela graun.” (Jo 16:33) Em i mekim bikpela wok tru, a?
3 Ol disaipel bilong Jisas ol i gat wankain strongpela bel na ol i givim bel long mekim wok Kristen. Ol man i wipim, paitim, kalabusim, na kilim i dai planti disaipel. Tasol ol i “amamas long God i ting ol inap long kisim sem long nem bilong Jisas.” (Ap 5:41) Ol man i traim tru long pasim ol, tasol ol i autim gutnius “long olgeta hap bilong graun,” maski i luk olsem ol i no inap mekim olsem.—Ap 1:8; Kl 1:23.
4 Rot Bilong Wok i Ken Kamap Gutpela Long Nau: Yumi tu i save givim bel long autim tok bilong Kingdom, maski planti hevi i save painim yumi. Ol i tambuim wok bilong yumi, ol i birua na kalabusim yumi, na mekim ol narapela samting nogut bilong pasim yumi long wok, tasol yumi save mekim gut dispela wok. Olsem wanem yumi inap mekim? “Bikpela i tok olsem, ‘Yu no inap mekim wok long strong bilong ami o long strong bilong yu yet. Nogat. Strong bilong spirit bilong mi bai i stap wantaim yu, na long dispela strong tasol bai yu mekim wok.’ ” (Sek 4:6) Taim Jehova i stap wantaim yumi, i no gat wanpela samting inap pasim wok bilong yumi!—Ro 8:31.
5 Taim yumi autim tok, i no gat as na yumi mas pret o ting yumi no inap mekim dispela wok, nogat. (2 Ko 2:16, 17) I gat as tru na yumi mas wok yet long autim gutnius bilong Kingdom. Long rot bilong helpim Jehova i save givim yumi, yumi inap mekim “samting man i no inap mekim”!—Lu 18:27.