Autim Tok na Mekim Gut Long Man i Stap Klostu
1 Jisas i tok, “laikim ol wantok olsem yu laikim yu yet.” (Mt 22:39) Yu save “mekim gutpela pasin” long ol wanbilip, tasol olsem wanem? Yu inap mekim gutpela pasin tu long ol man i stap klostu long yu? (Ga 6:10) Olsem wanem yu inap mekim olsem?
2 Kamapim Klia Yu Wanpela Witnes: Olsem wanem? Ol man i stap klostu long yu ol i save yu wanpela Witnes? Sapos nogat, gutpela sapos yu go autim tok long ol, a? Gutpela samting inap kamap! O sapos yu ting i gutpela moa, yu ken traim autim tok long ol long kain kain taim na ples. Taim yu stap ausait yu inap lukim ol i wok long stretim ol samting long banis bilong ol, o ol i wokabaut isi long rot. Wokabaut i go long ol na pes bilong yu i mas lait. Traim toktok long ol bilip bilong yu, na long hap Haus Kingdom i stap long en, long ol samting i save kamap long en, na tokim ol long husat ol narapela man i stap long hap bilong yupela em ol i save go long Haus Kingdom. Singautim ol long kam long ol miting. Tingting strong long autim gutnius long olgeta man yu save long ol.—Ap 10:42; 28:23.
3 Mekim Gutpela Pasin: Gutpela pasin bilong yu bai kamapim klia tru yu wanem kain man, na dispela inap opim rot long autim tok. Na tu, dispela bai ‘givim biknem long tok tru bilong God.’ (Ta 2:7, 10) Kamapim klia olsem yu save tingim tru ol man i stap klostu long yu. Mekim gutpela pasin pren na pilim ol hevi samting bilong ol. Tingim olsem sampela taim ol i laik stap wanpis, na no ken mekim bikpela pairap na bagarapim sindaun bilong ol. Sapos wanpela bilong ol i sik, mekim gutpela pasin na redi long helpim em. Taim nupela famili i kam sindaun long hap yu stap long en, go lukim ol na tok amamas long ol. Kain gutpela pasin olsem i mekim na ol man i kisim gutpela tingting long yumi na i litimapim nem bilong Jehova.—Hi 13:16.
4 Lukautim Gut Ol Samting Bilong Yu: Yu mekim gutpela pasin long ol man i stap klostu long yu taim yu lukautim gut haus bilong yu bambai haus samting i luk nais. Taim haus na banis i klin na i luk nais, dispela samting bai mekim na ol man i laik harim tok i tru. Tasol sapos haus i doti o ol samting i stap nabaut, dispela inap mekim na ol man i no laik harim tok bilong Kingdom. Olsem na em i bikpela samting long haus, banis, na ka bilong yu i mas i stap klin na yu mas stretim ol samting i bruk.
5 Taim yumi mekim ol samting i soim olsem yumi tingim ol man i no bilong kongrigesen Kristen, yumi kamapim klia pasin bilong laikim ol man i stap klostu long yumi. Dispela inap kamapim wanem samting? Taim ol i ‘lukim gutpela pasin bilong yumi,’ sampela bai “litimapim nem bilong God.”—1 Pi 2:12.