No Ken Surik Long Autim Tok!
1 Taim yumi redi long i go autim tok long ol haus yumi pilim em i hatwok tru. Pasin bilong pilim olsem yumi no inap mekim gut dispela wok inap pasim yumi long i go autim tok i tru long “olgeta manmeri.” (1 Ti. 2:4) Tasol yumi no ken surik long autim gutnius. Bilong wanem?
2 Em i Tok Bilong Jehova: Jehova i givim tok long ol man long rot bilong Baibel. Taim yumi kisim dispela tok i go long ol narapela, yumi kamapim tingting bilong em long ol, i no tingting bilong yumi. (Ro. 10:13-15) Taim ol man i sakim tok bilong Kingdom, tru tru ol i sakim tok bilong Jehova. Tasol yumi no bel hevi. Yumi bilip olsem dispela tok bai kirapim bel bilong ol man i laik bai sampela senis i kamap long pasin bilong dispela graun na ol i tingim tru ol samting bilong spirit ol i mas kisim.—Ese. 9:4; Mt. 5:3, 6.
3 Jehova i Save Bringim Ol Manmeri i Kam: Ating wanpela man bipo em i no laik harim tok bilong yumi nau em bai harim tok, long wanem, sindaun bilong em i senis na laik na tingting bilong bel em i senis. Ating nau Jehova bai mekim gut long dispela man na “bringim em i kam.” (Jo. 6:44, 65) Taim Jehova i mekim olsem, yumi mas redi long Jehova i ken mekim wok long yumi na yumi bihainim rot ensel i stiaim yumi long en bilong painim ol kain man olsem.—KTH 14:6.
4 God i Save Givim Spirit Holi Long Yumi: Spirit holi i save helpim yumi na yumi “no pret long autim tok bilong marimari bilong Bikpela.” (Ap. 14:1-3) Taim yumi tingim olsem yumi gat dispela strong bilong helpim yumi long mekim wok autim tok, bai yumi no inap pret long autim tok i tru long ol man i sindaun klostu long yumi, ol wanwok, ol wanklas, ol wanblut na ol man i gat bikpela save o maniman.
5 Jisas i Lainim Yumi Long Rot Bilong Mekim: Jisas i kamapim ol gutpela askim bilong kirapim tingting, na ol tok piksa i stret long ol man, na ol tok Baibel i as bilong en. Em i kamapim gut tok i tru em i pilim long bel, long pasin i no hatwok long ol man i kisim na long pasin ol man bai amamas long harim. Dispela pasin bilong autim tok i gutpela yet long nau. (1 Ko. 4:17) Ating yu bai autim tok long kain kain rot, tasol strongpela tok bilong Kingdom em i stap wankain yet.
6 Jehova i yusim yumi long mekim gutpela wok bilong helpim tru ol man. Yumi no ken surik! Yumi mas strongim bel na larim Jehova i ‘opim rot’ na bai yumi ken autim gutnius long ol narapela.—Kl. 4:2-4.