No Ken Strong Tumas Long Painim Amamas

¹ Nau long dispela taim bilong planti hevi, sampela taim yumi olgeta i gat laik long malolo. I stret long yumi painim sampela amamas. Tasol sapos man i lusim bikpela hap taim long malolo, painim amamas, na bung wantaim ol pren, dispela inap mekim na em i no gat taim long mekim ol samting bilong spirit. Yumi no ken strong tumas long painim amamas. (Mt. 5:⁠3) Olsem wanem yumi inap mekim olsem? Yumi ken bihainim tok i stap long Efesus 5:​15-17.

² Putim Mak: Pol i tok ol Kristen i mas “lukaut gut” long wokabaut bilong ol. Man i mas i gat pasin bilong mekim ol samting long skel na bosim gut skin bambai em i kisim liklik malolo inap bilong helpim em. Em i gutpela long tingting gut long pasin bilong yumi long yusim fri taim bilong yumi. Ol amamas i mas helpim yumi, ol i no ken mekim na yumi pilim olsem yumi lusim nating taim bilong yumi, na ol i no ken pinisim strong bilong yumi. Taim yumi insait long sampela amamas, na bihain yumi no pilim gutpela, o yumi no amamas, o bel bilong yumi i gat tok, dispela i makim olsem yumi mas senisim pasin bilong yumi long yusim taim bilong yumi.

³ Bihainim Stretpela Tingting: Pol i tok yumi mas “i gat taim” bilong mekim ol samting i bikpela samting moa long i stap bilong yumi, na yumi no ken mekim ‘pasin kranki.’ Ol Kristen i dediket pinis ol i no inap larim ol amamas i pulim bikpela hap taim bilong ol. Tru, malolo na ol amamas em inap givim nupela strong long yumi, tasol spirit holi bilong God i as bilong strongim yumi long ol samting bilong spirit. (Ais. 40:​29-31) Taim yumi mekim ol wok bilong spirit​—⁠stadi long Baibel, go long ol miting bilong kongrigesen, mekim wok autim tok​—⁠yumi kisim spirit bilong God, i no long rot bilong ol amamas.

⁴ Tingim Ol Bikpela Samting: Pol i tokim ol Kristen long ol i “mas save gut long laik bilong Bikpela.” Jisas i tok taim yumi mekim ol samting, namba wan samting yumi mas tingim em Kingdom bilong God. (Mt. 6:33) Em i bikpela samting long pastaim yumi mas mekim ol samting em inap helpim yumi long truim dediket bilong yumi long Jehova. Na bihain, yumi ken painim amamas long sampela taim. Taim yumi mekim olsem, dispela bai helpim yumi, na bai yumi kisim bikpela amamas moa.​​—⁠Sav. 5:12.