Mekim Gutpela Wok Long Taim Bilong Yu
1 Yumi laik mekim ol samting God i laikim na dispela i kirapim yumi long putim ol samting bilong spirit i stap namba wan samting long laip bilong yumi. Tok Bilong God i kirapim yumi long “wok pastaim long painim kingdom” na “skelim gut wanem ol samting i bikpela samting tru.” (Mt. 6:33, NW; Fl. 1:10, NW ) Olsem wanem yumi inap makim haptaim bilong mekim ol wok bilong Kingdom na putim ol samting i no bikpela samting i stap nambatu?—Ef. 5:15-17.
2 Putim Ol Wok Bilong Kingdom i Stap Namba Wan: Makim haptaim bilong yu long mekim ol samting na bai yu no lusim nating taim long ol samting i no olsem yu mas mekim. Long kirap bilong olgeta wan wan mun, sampela i save makim long kalenda ol de we ol i laik autim tok na ol i no larim ol narapela samting i pasim ol. Yu ken makim tu taim bilong ol miting, stadi, na ol kibung. Planti i makim haptaim bilong ritim Baibel long moning o long apinun long olgeta de. Yu mas makim haptaim stret bilong mekim ol wan wan bikpela samting, na no ken larim ol liklik samting i pasim yu.—Sav. 3:1; 1 Ko. 14:40.
3 No Ken Lusim Bikpela Haptaim Long Ol Samting Bilong Graun: Long sampela kantri, i no hatwok long kisim ol kain kain amamas na insait long spot. Planti i save lusim bikpela haptaim long TV, kompiuta, o stori nating wantaim ol wantok o wanblut bilong ol. Tasol sapos yumi lusim bikpela haptaim long ol samting bilong amamas na kompiuta samting, em ol samting bilong dispela graun, hevi inap painim yumi. (1 Jo. 2:15-17) Olsem na Baibel i kirapim yumi long no ken larim ol samting bilong dispela graun i stap olsem bikpela samting long laip bilong yumi. (1 Ko. 7:31) Long rot bilong bihainim dispela gutpela tok, yu inap kamapim long Jehova olsem lotu bilong em i namba wan samting long laip bilong yu.—Mt. 6:19-21.
4 Klostu nau pasin bilong dispela graun bai pinis. Ol man i putim ol samting bilong Kingdom i stap namba wan long laip bilong ol, ol bai amamas na God bai i orait long ol. (Snd. 8:32-35; Jem. 1:25) Olsem na yumi mas mekim gutpela wok long haptaim bilong yumi.