Rot Bilong Lukaut Gut na Bai Taim i No Lus Nating
1 Long wok bilong Jehova, yumi gat planti wok bilong mekim! (1 Ko 15:58) Yumi gat wok long mekim stadi bilong yumi yet, na famili-stadi, na kaunim Baibel long olgeta de, na redim ol tok bilong ol miting na i go long en, na insait long wok autim tok long olgeta taim. Ol wasman i gat wok bilong lukautim yumi, na ol i save mekim ol narapela wok bilong kongrigesen. Sampela i gat bikpela wok bilong lukautim famili, o kain kain wok bilong mekim long ol narapela man. Bilong mekim gut olgeta dispela samting, olgeta i mas skelim na stretim gut wok bilong ol yet.
2 Tingim Gut Ol Bikpela Samting: Bilong ‘lukaut gut na taim i no lus nating,’ yumi mas tingting gut na skelim gut ol samting. (Ef 5:15, 16) Yumi mas save wanem samting i olsem bikpela samting na putim dispela i stap namba wan long ol samting yumi laik mekim. (Fl 1:10) Tupela marit Kristen i stori long famili bilong ol olsem: ‘Mitupela i save larim tok i tru i stiaim olgeta samting long i stap bilong mipela. Tok i tru i no bosim sampela samting tasol long i stap bilong mipela—em i bosim olgeta samting long i stap bilong mipela. Tok i tru i stap namba wan long i stap bilong mipela, na ol narapela samting i nambatu.’ Em i bikpela samting long putim lotu na wok bilong Jehova olsem namba wan long wokabaut bilong yumi.
3 Luksave Long Ol Samting Em Inap Pulim Nating Taim: I gat 168 aua long wanpela wik, na yumi mas mekim gutpela wok long dispela hap taim. Bilong mekim ol wok bilong God, yumi mas luksave long ol samting i save pulim nating taim bilong yumi na lusim. Wanpela ripot i tok, long Amerika ol i save lusim 30 aua long olgeta wik long lukim televisen! Na sampela moa ol i save lusim bikpela hap taim bilong kaunim ol buk na nius samting bilong dispela graun. Sampela i lusim bikpela hap taim long ol bung bilong amamas, na mekim ol samting ol i amamas long en, na spot, o sampela samting bilong kompyuta. Yumi mas skelim gut ol samting yumi mekim long olgeta de bambai yumi ken save long rot bilong mekim gutpela wok long taim bilong yumi. Yumi mas tingting gut na yumi no lusim bikpela hap taim bilong mekim ol wok em ol i no bikpela wok tumas.
4 Makim Taim Bilong Mekim Ol Samting na Bihainim Oltaim: Maski yumi gat wanem wanem kain sindaun, yumi olgeta inap painim taim bilong mekim ol wok bilong spirit. Taim sampela i kirap kwik long moningtaim long olgeta de, dispela i save helpim ol long mekim planti wok moa. Sapos yumi save lusim bikpela hap taim bilong wokabaut i go i kam long wok o long wetim ol narapela, ating yumi inap mekim wok long dispela hap taim bilong kaunim Baibel, redim ol tok bilong ol miting, o harim kaset bilong ol buk na nius samting bilong Sosaiti. Taim famili i makim stret wanpela taim bilong olgeta i ken stadi wantaim, dispela inap helpim gut ol. Sapos olgeta long famili i kam long taim stret bilong mekim famili-stadi, olgeta i gat inap taim bilong mekim ol narapela wok bilong ol tu.
5 Taim olgeta wan wan de i kam i go, yumi mas save gut olsem “taim i sotpela nau.” (1 Ko 7:29) Ol samting yumi mekim long dispela hap taim i stap yet i bikpela samting bambai yumi inap kisim laip. Bai yumi kisim blesing sapos yumi no larim dispela taim i lus nating inap long yumi ken putim ol samting bilong Kingdom i stap olsem namba wan samting long i stap bilong yumi!—Mt 6:33.