Putim Wok Bilong Jehova i Stap Olsem Nambawan Samting Long Laip Bilong Yu
1 Jisas i tok ol man i harim tok bilong em, ol i olsem tupela kain man bilong wokim haus. Wanpela em i man bilong bihainim tok bilong Krais na i olsem em i wokim haus bilong en antap long ston, na taim bikpela win olsem ol pasin birua na hevi i painim em, em i sanap strong. Narapela i bihainim ol laik bilong em yet na i olsem em i wokim haus bilong em antap long wesan na taim hevi i kamap em i no inap sanap strong. (Mt 7:24-27) Yumi stap long pinis bilong pasin bilong dispela graun, olsem na kain kain hevi i save painim yumi. I olsem yumi inap lukim ol blakpela klaut bilong bikpela hevi tru i wok long bung hariap tru. Olsem wanem? Bai yumi sanap strong i go inap long pinis? Bilip bilong yumi bai stap strong? (Mt 24:3, 13, 21) Ol samting yumi mekim long nau em inap helpim o nogutim yumi. Olsem na yumi mas askim yumi yet, ‘Olsem wanem? Wok bilong God i stap olsem nambawan bikpela samting long laip bilong mi?’
2 Olsem wanem yumi ken putim wok bilong Jehova i stap olsem nambawan samting long laip bilong yumi? Em i olsem: Long olgeta samting yumi mekim, yumi tingim Jehova pastaim. Yumi tingim ol samting bilong Kingdom olsem bikpela samting tru. Yumi bihainim tok bilong God long olgeta samting yumi mekim long olgeta de. Yumi givim bel tru long mekim stadi bilong yumi yet, famili-stadi, na stadi wantaim kongrigesen long ol tok bilong Baibel, na yumi givim bel long autim tok, na putim ol dispela samting i stap olsem nambawan samting. (Sav 12:13; Mt 6:33) Taim yumi bihainim dispela pasin, dispela bai helpim yumi long kisim strongpela bilip, na em bai i no inap bagarap maski wanem kain birua o hevi i painim yumi.
3 I gutpela tru long lukim sampela milion manmeri i mekim wok bilong Jehova na wetim ol gutpela samting bai kamap bihain, na ol i putim dispela i stap nambawan long laip bilong ol, olsem Jisas i bin mekim. (Jo 4:34) Long olgeta taim ol i save bihainim gut sedyul bilong ol bilong mekim ol wok bilong spirit na long dispela rot ol i kisim ol gutpela blesing. Wanpela mama i stori long olsem wanem em na man bilong em i bin mekim bikpela long tupela pikinini man bilong ol, na bihain tupela i mekim wok bilong Jehova. Em i tok: “Tok i tru i bin bosim i stap bilong mipela—na long olgeta taim mipela i insait long wok autim tok, mipela i redim ol miting na go long ol miting, na mekim wok autim tok long olgeta taim.” Na man bilong em i tok moa: “Tok i tru i no bosim sampela samting tasol long i stap bilong mipela—em i bosim olgeta samting long i stap bilong mipela. Tok i tru i stap namba wan samting long i stap bilong mipela, na ol narapela samting i stap nambatu.” Olsem wanem? Yu tu i putim wok bilong Jehova i stap olsem nambawan samting long famili bilong yu?
4 Wokim Gutpela Sedyul Bilong Olgeta Wik: Oganaisesen bilong Jehova i save helpim yumi long faipela miting bambai yumi mekim wok bilong spirit long olgeta taim. Ol Kristen i putim wok bilong Jehova i stap nambawan, ol i save stretim gut ol samting bilong famili na ol wok bilong skin bambai ol i ken i go long olgeta dispela miting. Ol i no larim ol samting i no bikpela samting tumas i pasim ol long i go long ol miting long olgeta taim.—Fl 1:10; Hi 10:25.
5 Ol strongpela Kristen i save em i bikpela samting long kisim kaikai long taim stret bilong en long olgeta de, na olsem tasol ol i save em i bikpela samting long makim taim bilong mekim stadi bilong ol yet na stadi wantaim famili na redim tu ol miting. (Mt 4:4) Yu inap makim 15 i go 20 minit o sampela taim moa long olgeta wan wan de bilong mekim stadi bilong yu yet? Bikpela samting em olsem, yu no ken larim ol narapela samting i pasim yu long stadi long taim yu makim. Stadi i mas kamap wanpela pasin yu mekim long olgeta taim. Bilong mekim olsem ating yu mas kirap hariap liklik long olgeta moningtaim. Inap 17,000 brata sista i wok long ol haus Betel long olgeta hap ol i save kirap hariap long moningtaim bilong skelim teks bilong de. Bilong kirap hariap long moningtaim yumi mas slip hariap liklik long nait bambai skin bilong yumi i kisim malolo na i strong gen long narapela de.
6 Sapos yu het bilong wanpela famili, mekim wok bilong yu na wokim sedyul na stretim ol samting bilong famili i ken mekim ol samting bilong spirit. Sampela famili i save kaunim Baibel, yiabuk, o sampela narapela buk taim ol i malolo bihain long kaikai long apinun. Planti papamama em ol i bin lukim pikinini bilong ol i kamap strongpela Kristen, ol i tok wanpela samting i helpim famili i kamap gutpela em pasin bilong ol long makim wanpela apinun o nait samting long olgeta wik bilong mekim ol samting bilong spirit wantaim famili bilong strongim ol. Wanpela papa i tok: “Mi ting ol pikinini bilong mipela i kamap gutpela long ol samting bilong spirit, long wanem, mipela i save mekim famili-stadi long olgeta Trinde nait—mipela i bin kirapim dispela stadi 30 yia i go pinis.” Olgeta 3-pela pikinini bilong em i bin kisim baptais taim ol i liklik yet, na bihain olgeta 3-pela i insait long wok painia. Yupela i ken mekim famili-stadi, na tu, yupela i ken mekim traim long pasin bilong toktok wantaim ol man taim yupela i autim tok na ol hap bilong miting, na yupela i ken bung wantaim bilong mekim sampela pilai samting bilong kisim amamas.
7 Long sedyul bilong yu bilong olgeta wik, yu makim taim bilong yu ken mekim wok bilong autim tok bilong Kingdom? (Kl 4:5) Planti bilong yumi i gat planti wok, olsem ol wok insait long famili na kongrigesen. Sapos yumi no makim taim stret bilong insait long wok bilong autim tok na skulim ol man long olgeta wan wan wik, ol narapela samting inap pasim yumi long mekim dispela bikpela wok. Papa bilong wanpela bikpela banis bulmakau i tok: “Long 1944 samting mi luksave olsem i gat wanpela samting tasol mi mas mekim bambai mi inap autim tok, em long makim stret wanpela de bilong mekim olsem. I kam inap long nau, mi save kisim wanpela de malolo long wik bambai mi ken autim tok.” Wanpela elda Kristen i tok, taim em i makim taim stret bilong mekim wok autim tok, dispela i save helpim em long inapim 15 aua long olgeta mun long wok autim tok. Sapos em i gat sampela wok bilong em yet em i mas mekim long Sarere, em i save mekim bihain long taim em i autim tok long moningtaim. Olsem wanem? Yu na famili bilong yu inap makim wanpela de long olgeta wik bilong mekim wok autim tok, na mekim dispela i kamap olsem wanpela wok bilong spirit yupela i mekim long olgeta taim?—Fl 3:16.
8 Skelim Gut Ol Samting Yu Save Mekim: I gat ol samting inap pasim yumi long putim wok bilong Jehova i stap olsem nambawan samting long laip bilong yumi. Ating sampela hevi inap mekim na yumi no bihainim gutpela sedyul bilong yumi long stadi, go long ol miting, na autim tok. Na birua bilong yumi, Satan, bai wok strong long ‘pasim yumi’ bambai yumi no ken mekim ol samting yumi laik mekim. (1 Te 2:18; Ef 6:12, 13) No ken larim ol dispela samting i daunim yu na yu lusim wok. Sapos yu mas mekim sampela senis bambai yu bihainim yet sedyul bilong yu long mekim ol wok bilong spirit, orait mekim olsem. Bilong inapim ol samting i bikpela samting, yumi mas tingting strong na long wok strong oltaim long mekim.
9 Yumi no ken larim ol pasin bilong dispela graun na sin i stap long skin bilong yumi i pulim yumi long mekim sampela samting Baibel i no as bilong en na isi isi dispela i pulim bikpela hap taim na tingting bilong yumi. Yumi ken skelim yumi yet long rot bilong ol kain askim olsem: ‘Olsem wanem? Wokabaut bilong mi i senis isi isi na ol narapela samting i pulim mi, na i olsem mi no skelim gut ol samting? Mi kirap long tingim tumas ol samting bilong dispela graun em ol bai pinis long bihain? (1 Jo 2:15-17) Mi save lusim hamas aua long inapim ol laik bilong mi yet, pilai spot, o mekim ol narapela samting bilong kisim amamas—olsem lukim TV o video, pilai snuka o sampela narapela pilai? Na mi lusim hamas aua long mekim wok bilong spirit?’
10 Sapos yu pilim olsem i gat planti liklik liklik samting i wok long pasim yu, orait yu mas mekim wanem? Pol i bin beten bambai ol brata bilong em i ken “kamap strongpela Kristen tru,” olsem tasol yu ken beten askim Jehova long helpim yu long putim gen wok bilong em i stap olsem nambawan samting. (2 Ko 13:9, 11) Nau yu mas wok strong long bihainim ol samting yu pasim tok pinis long mekim na stretim ol samting yu mas stretim. (1 Ko 9:26, 27) Jehova bai helpim yu bambai yu no ken bihainim rot i go long han sut o han kais taim yu bihainim tok na mekim wok bilong em.—Skelim wantaim Aisaia 30:20, 21.
11 Wok Strong Long Mekim Gutpela Wok Bilong God: Planti milion manmeri i save wok strong long painim amamas, tasol taim ol i go lapun ol i kisim save olsem ol samting bilong skin ol i wok strong long bungim i no bin helpim ol long kisim amamas bilong i stap oltaim. I olsem ol i bin “ran i go bilong holimpas win.” (Sav 2:11) Tasol taim Jehova i stap nambawan long laip bilong yumi, na yumi putim em i stap ‘klostu long yumi,’ bai yumi pilim olsem i stap bilong yumi i gat as tru. (Sng 16:8, 11) Yumi pilim olsem, long wanem, Jehova em i as bilong laip bilong yumi. (KTH 4:11) Em i Bikpela Man bilong kamapim laik bilong em, sapos yumi no tingim em, i stap bilong yumi bai i no gat as bilong en. Taim yumi mekim laik bilong Jehova, yumi mekim ol gutpela wok i gat as bilong en na i save helpim yumi, na tu, i helpim gut ol narapela long nau na long olgeta taim bihain.
12 Em i bikpela samting long yumi no ken lusim tingting olsem pinis bilong dispela graun nogut bilong Satan em i kam klostu hariap. Tingting bilong yumi long ol samting bai kamap bihain i mas bosim ol samting yumi mekim long olgeta wan wan de. Ol manmeri long taim bilong Noa i no bin bilip olsem bikpela tait wara bai kamap long olgeta hap, ol i no tingting long dispela samting, ol i bin tingting tasol long inapim laik bilong ol yet—ol i kaikai, dring, na marit—i go inap long tait i “pinisim olgeta dispela manmeri.” (Mt 24:37-39) Long nau, ol manmeri i tingim tumas ol samting bilong dispela graun, ol bai lukim olgeta samting ol i wetim na tingting long kisim long bihain bai pinis long taim bilong wanpela bikpela bagarap, kain bagarap ol man i no bin lukim bipo, em de bilong Jehova.—2 Pi 3:10-12.
13 Olsem na yumi mas wok yet long putim wok bilong God Jehova, i stap olsem nambawan samting, na mekim laik bilong em. I no gat wanpela wok em inap kamapim gutpela samting olsem wok bilong Jehova—em Bos yumi inap bilip tru long em. Em i no inap tok giaman—ol wok bilong Jehova yumi mekim i no inap lus nating. (Ta 1:2) Em i no inap dai—i no gat wanpela samting yumi mekim bilong Jehova bai lus nating. (Hab 1:12; 2 Ti 1:12) Long nau yumi wok long kisim na strongim pasin bilong bihainim tok na bilip, na dispela em kirap tasol bilong wanpela rot bai yumi stap long em i go inap oltaim oltaim, em bai yumi amamas long mekim wok bilong God bilong yumi, em Man bilong amamas!—1 Ti 1:11; 6:19.
[Rait long pes 3]
“Tok i tru i no bosim sampela samting tasol long i stap bilong mipela—em i bosim olgeta samting . . . , na ol narapela samting i stap nambatu.”