Lukaut Gut Long Taim Bilong Yu
1 Olsem wanem? Yu pilim hatwok long mekim ol wok bilong spirit? Yu laik bai yu gat bikpela taim moa bilong mekim wok autim tok? Olsem wanem yumi inap mekim gutpela wok long taim bilong yumi?—Sng. 90:12; Fl. 1:9-11.
2 Luksave Long Ol Samting i Save Pulim Nating Taim: Yumi olgeta i mas skelim olsem wanem yumi save yusim taim bilong yumi. Baibel i tok: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. Nau yupela i gat taim bilong mekim pasin bilong God. Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.”—Ef. 5:15, 16.
3 Sapos i stret long ol hap yumi sindaun long en yumi ken askim yumi yet olsem: ‘Mi save lusim bikpela hap taim long stori nating wantaim ol narapela, pilai snuka o pilai dat? Mi save sindaun nating tasol na i no mekim wanpela wok? Taim mi go long taun, mi save go painim ol ples we i gat ol vidio-gem samting na lusim bikpela haptaim na mani long pilaim ol dispela gem? Sapos mi gat E-meil, mi save lusim sampela taim long olgeta de long ritim o bekim ol E-meil em ol i no bikpela samting tumas? Mi save lusim nating taim long ringim ol wantok na ol narapela na toktok long ol liklik samting? (1 Ti. 5:13) Sapos mi gat rot bilong lukim ol samting long Intenet, mi save lusim nating taim long lukluk long en? Sapos mi gat televisen, mi save lusim nating planti aua long lukluk long en maski mi no laikim wanpela program? Mi save lusim taim long mekim sampela samting mi laikim na dispela i pulim taim bilong mi long stadi long Tok Bilong God?’ Ol dispela kain samting inap bagarapim yumi long ol samting bilong spirit.—Snd. 12:11.
4 Mekim Gutpela Wok Long Taim: Wanpela yangpela husat i bin insait tru long pilai kompiuta gem i tok: “Sampela taim, sapos mi pilai kompiuta gem paslain long mi go autim tok o go long miting Kristen, mi save hatwok tru long putim gut tingting long ol samting. Klostu olgeta taim mi save tingting long olsem wanem mi bai pilai gut taim mi go bek long haus. Dispela i bagarapim pasin bilong mi long mekim stadi bilong mi yet na ritim Baibel. Amamas bilong mi long mekim wok bilong God i wok long pinis isi isi.” Em i luksave olsem em i mas mekim sampela senis, olsem na em i rausim olgeta gem long kompiuta bilong em. Em i tok: “I hatwok tru long mi mekim olsem. Mi luksave olsem pasin bilong pilai kompiuta gem i bin kalabusim mi. Tasol mi kisim bikpela amamas long samting mi bin mekim, long wanem, mi save olsem dispela i bilong helpim mi yet.”—Mt. 5:29, 30.
5 Ating yu gat wok long mekim olsem sapos i gat sampela samting yu mas senisim. Olsem wanem? Long olgeta wan wan de yu inap rausim 30 minit long haptaim yu save tromoi bilong mekim ol samting em ol i no bikpela samting? Sapos long olgeta de yu tromoi dispela haptaim long ritim Baibel, bai yu inap ritim Baibel olgeta insait long wanpela yia. Dispela bai helpim yu tru long ol samting bilong spirit! (Sng. 19:7-11; 119:97-100) Makim taim stret bilong ritim Baibel, redim ol samting bilong miting, na bilong wok autim tok. (1 Ko. 15:58) Taim yu mekim olsem dispela bai helpim yu long lukaut long ol samting inap pulim taim bilong yu na em bai helpim yu long “save gut long laik bilong Bikpela.”—Ef. 5:17.
[Askim Bilong Stadi]
1. Wanem sampela askim yumi ken givim long yumi yet long olsem wanem yumi save yusim taim bilong yumi?
2, 3. Olsem wanem yumi wan wan i ken skelim pasin bilong yumi long yusim taim bilong yumi?
4. Wanpela yangpela i mekim wanem senis? Bilong wanem em i mekim olsem?
5. Olsem wanem yumi inap kisim haptaim bilong mekim ol wok bilong spirit? Dispela inap helpim yumi olsem wanem?