Yu Save Putim Wanem Samting i Go Pas?
1 Yu bai bekim dispela askim olsem wanem? Yumi olgeta i laik putim ol wok bilong Kingdom i go pas. (Mt. 6:33) Tasol yumi ken askim yumi yet olsem, ‘Ol samting mi makim bilong mekim i soim olsem mi putim Kingdom i go pas o nogat?’ Baibel i tokim yumi: “Yupela i mas skelim gut pasin bilong yupela yet.” (2 Ko. 13:5) Olsem wanem yumi ken skelim pasin bilong yumi yet, olsem yumi wok long putim Kingdom i go pas o nogat?
2 Haptaim Bilong Yumi: Pastaim yumi ken skelim ol samting yumi save mekim long haptaim bilong yumi. (Ef. 5:15, 16) Yumi save lusim hamas aua long olgeta wik long stori wantaim ol pren, lukim TV o vidio, o pilai ol gem na spot? Sapos yumi raitim long pepa hamas aua yumi save tromoi long ol kain samting olsem na yumi skelim ol dispela aua wantaim ol aua yumi save lusim bilong mekim ol wok bilong God, ating bai yumi kirap nogut. Olsem wanem? Yumi save lusim ol wok bilong God bilong mekim wok ovataim na bai yumi gat mani bilong baim ol gutpela samting? Hamas taim yumi save lusim miting o wok autim tok bambai yumi ken mekim wok gaden, o kisim kaikai na ol narapela samting i go long maket bilong salim? Na sapos yumi stap long ples na yumi kam long taun bilong maketim ol samting, planti taim yumi no save go long ol miting bilong kongrigesen long taun na yumi no kisim strong long rot bilong bung wantaim ol wanbilip Kristen?—Sng. 35:18.
3 Putim Ol Bikpela Samting i Go Pas: Planti bilong yumi i no gat taim bilong mekim olgeta samting yumi laik mekim. Olsem na bilong putim ol wok bilong Kingdom i go pas, yumi mas skelim wanem ol samting i bikpela samting na bihain makim taim bilong mekim “ol samting i bikpela samting tru.” (Fl. 1:10, NW ) Ol samting i insait long ol dispela bikpela samting, em wok bilong stadi long Baibel, mekim wok autim tok, lukautim famili, na go long ol miting Kristen. (Sng. 1:1, 2; Ro. 10:13, 14; 1 Ti. 5:8; Hi. 10:24, 25) Ol narapela samting, olsem eksasais na gutpela amamas inap helpim yumi. (Mk. 6:31; 1 Ti. 4:8) Tasol ol dispela samting i mas i stap namba tu.
4 Wanpela yangpela brata i putim ol wok bilong Kingdom i go pas na em i kirap autim tok fultaim, em i no tingting long i go long bikpela skul bilong em i ken kisim gutpela wok mani. Em i lainim narapela tok ples na i go sindaun long hap i sot long ol man bilong autim tok. Em i tok: “Mi kisim bikpela amamas tru long hia. Mi save kisim nupela strong taim mi autim tok! Mi laik bai olgeta yangpela i mekim dispela kain wok na kisim wankain amamas olsem mi kisim. I no gat narapela samting i winim pasin bilong yusim olgeta samting yumi gat bilong mekim wok bilong Jehova.” Em nau, taim yumi putim Kingdom i go pas bai yumi kisim ol blesing, tasol bikpela samting moa, bai yumi amamasim Papa bilong yumi long heven, Jehova.—Hi. 6:10.