Pasin Bilong Yu Long Kisim Kaikai Bilong Spirit i Gutpela o Nogat?
1 Ol i tok, kaikai yumi kisim i mekim na skin bilong yumi i kamap gutpela o nogut. Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” Olsem na pasin bilong yumi long kisim kaikai bilong spirit, em tu i mekim na yumi stap gutpela o nogut. (Mt. 4:4) Orait pasin bilong yu long kisim kaikai bilong spirit i gutpela o nogat? Yu save laikim sampela kaikai tasol na sampela nogat? Yu save kaikai hariap tumas? O yu amamas long lusim hap taim bilong kisim gutpela kaikai bilong spirit long olgeta taim?
2 Skelim Kaikai Yu Save Kisim: Long rot bilong “wokboi i gat gutpela tingting,” Jehova i save givim “planti gutpela gutpela abus” long “taim” stret. (Mt. 24:45; Ais. 25:6) Bilong ol dispela gutpela samting i ken helpim yumi tru, yumi mas wok strong long kisim gutpela kaikai bilong spirit.
3 Askim yu yet olsem: ‘Mi save ritim teks bilong de na stori bilong en long olgeta de? Mi save ritim Baibel na tingim tingim tok bilong en long olgeta de? Mi save redim ol miting bilong kongrigesen na stadi long ol tok bilong miting? Mi bin ritim ol nupela nius na buk bilong yumi?’
4 Jisas i tok promis: “Ol manmeri i save, ol i stap rabis tru long ol samting bilong God, em ol i ken amamas. . . . Ol manmeri i laikim tumas long bihainim stretpela pasin, . . . ol i ken amamas. Bai God inapim ol tru.” (Mt. 5:3, 6) Olsem na kisim gutpela kaikai bilong spirit na kisim planti save bilong God na putim long tingting na bel bilong yu.