Skulim Gut Tingting Bilong Yu
1 Long dispela taim nogut bilong las de em yumi stap long en, planti hevi na kain kain bikpela traim i painim lain bilong God long olgeta hap. (2 Ti. 3:1-5) Yumi olgeta i mas kisim samting bilong strongim yumi bambai yumi ken sanap strong long bilip. (1 Ko. 16:13) Yumi inap mekim olsem long rot bilong helpim yumi kisim long Jehova taim yumi ritim oltaim Tok bilong em, bilip na wet long spirit bilong em i helpim yumi, na stap klostu long oganaisesen bilong em.—Sng. 37:28; Ro. 8:38, 39; KTH 2:10.
2 Olsem na as tok bilong bikpela de kibung yumi mekim i no longtaim i go pinis, em “Tingting Bilong Yupela i Mas Kamap Olsem Tingting Bilong Ol Man i Bikpela Pinis.” Ol i kisim dispela tok long 1 Korin 14:20, long dispela skripsa aposel Pol i tok: “Ol brata, yupela i no ken i stap olsem ol pikinini long tingting bilong yupela. Nogat. Long olgeta kain pasin nogut yupela i mas i stap olsem ol liklik pikinini. Tasol tingting bilong yupela i mas i stap olsem tingting bilong ol bikpela man.” Nau yumi ken tingim gen sampela bikpela tok bilong dispela program.
3 Yumi Mas i Gat Stretpela Save Bilong Skulim Gut Tingting: Long namba wan tok, “Kisim Tingting Bilong Ol Man i Bikpela Pinis,” brata i tok yumi mas i gat wanem samting bambai yumi inap karim ol hevi bilong nau? Pasin bilong wokim gut tingting, dispela samting tasol i no inap. Yumi mas kisim gutpela save tru long Baibel, nogut ol pasin nogut bilong graun i daunim yumi. Bilong kisim dispela kain save God i mas stiaim yumi. Olsem man bilong raitim song, yumi mas beten askim Jehova long helpim yumi long save gut long ol lo bilong em bambai yumi ken lotuim em long bel olgeta.—Sng. 119:1, 2, 34.
4 Long namba tu tok, wasman sekit i stori olsem long rot bilong Tok na oganaisesen bilong em, Jehova i save givim “Ol Samting Bilong Helpim Yumi Long Kisim Tingting Bilong Man i Bikpela Pinis.” Em i tok pasin bilong save gut long ol samting i olsem, “man i klia tru long ol tok na em inap skelim gut ol samting long tingting na painim tru as bilong en.” Husat inap helpim yumi long kisim dispela kain save? Jehova i bin givim ol man olsem presen bilong helpim yumi long kamap strong long ol samting bilong spirit. (Ef. 4:11, 12) Oganaisesen bilong God long graun i kirapim yumi long ritim Tok Bilong God long olgeta de na long go oltaim long olgeta miting bilong kongrigesen. (Sng. 1:2) Ol i lainim yumi long pasin bilong yusim Baibel na ol buk na nius Kristen bilong yumi bilong mekim famili-stadi na stadi bilong yumi yet, na bilong redi long ol miting na wok autim tok. Olsem wanem? Yu save mekim ol dispela samting? Yu gat sediul bilong yu yet bilong ritim Baibel long olgeta taim? Dispela em i bikpela samting sapos yumi laik bai ol pasin nogut, na ol nupela nupela stail, na tingting bilong ol man, na tingting nogut bilong graun i no ken pundaunim yumi.—Kl. 2:6-8.
5 Yumi Mas Lainim Gut Tingting Bilong Yumi: Long namba wan tok bilong em, “Lainim Gut Tingting na Bai Yu Inap Lukautim Pasin Bilong Yu Long Tingim Ol Samting Bilong Spirit,” brata em brens i salim i stori olsem ol man bilong graun i no inap skelim wanem ol pasin i gutpela na wanem ol pasin i nogut. (Ais. 5:20, 21) Em i olsem, long wanem, ol i no laik bilip na bihainim ol stretpela lo bilong God. Tasol yumi ol lain i kisim skul long ol samting bilong spirit long oganaisesen bilong Jehova, yumi save long ol lo bilong God, na dispela i stiaim ol wok na pasin yumi mekim. Olsem na yumi inap save tru long ol pasin i gutpela long ai bilong Jehova na i stret wantaim stretpela laik bilong em.—Ro. 12:2.
6 Bilong sakim ol tingting bilong dispela graun i save paulim ol man na i save kamapim ol kaikai nogut, oltaim yumi mas lainim gut tingting bilong yumi. Yumi inap mekim dispela samting olsem wanem? Olsem long Hibru 5:12-14, aposel Pol i kamapim klia olsem yumi no ken kisim “susu” tasol. Yumi mas kisim strongpela kaikai bilong spirit. Na kwiktaim yumi mas bihainim ol tok yumi kisim save long en. Taim yumi mekim olsem, yumi bilip tru olsem ol lo bilong Jehova i stret tru. Dispela bai skulim tingting bilong yumi long skelim gut wanem samting i gutpela na wanem samting i nogut.
7 Sori tru, sampela ol i no strong moa long ol samting bilong spirit. Bilong wanem? Ol i no putim tingting bilong ol long ol samting i gutpela na stretpela long ai bilong Jehova. Olsem na ol program bilong TV na ol video i stori long ol samting Baibel i no orait long en, o musik nogut, o ol samting nogut bilong Intenet, i bin pundaunim ol dispela brata. Taim yumi bihainim gutpela tingting, ol man nogut i save mekim pasin pamuk o i longlong nabaut, ol i no inap stiaim yumi.—Snd. 13:20; Ga. 5:7; 1 Ti. 6:20, 21.
8 Ol Yangpela i Mas ‘Stap Olsem Liklik Pikinini Long Pasin Nogut’: Program i gat tupela hap i strongim ol yangpela long skulim gut tingting bilong ol. Ol brata i stori olsem pasin bilong ‘stap olsem liklik pikinini long pasin nogut’ i makim olsem man i no mekim liklik o em i no gat save liklik long ol samting i no klin long ai bilong Jehova. (1 Ko. 14:20) Ol i bin strongim yumi olgeta long was gut long ol samting yumi save lusim hap taim bilong mekim na bai yumi sakim pasin bilong lukim o harim stori bilong olkain pasin nogut na ol dispela samting i no ken stiaim yumi. (Ef. 5:15-17) Ol i strongim yumi long kaunim hamas aua yumi save lusim bilong ritim ol buk samting i no helpim yumi long kisim gutpela save long ol samting bilong spirit. Yu bin mekim olsem? Yu bin lusim bikpela hap taim long dispela samting o olsem wanem? Ritim Baibel long olgeta de, na tu, tingting strong long ritim olgeta buk na nius oganaisesen i save givim yumi. Taim yumi mekim olsem dispela bai helpim yumi olgeta, ol yangpela tu, long kisim “gutpela tingting.”—Snd. 4:7-9.
9 “Bihainim Ol Tok Bilong Baibel Bilong Stiaim Tingting na Dispela Bai Helpim Yumi”: Dispela em nem bilong laspela tok bilong bikpela de kibung. Brata em brens i salim i tok olsem Jehova em i As bilong save i givim laip long man, em dispela save i winim tru save bilong olgeta man. Tingim, yumi inap kisim gutpela save bilong Jehova! God i amamas long givim save long ol man i wok long painim na i bilip olsem God bai givim dispela save long ol. (Snd. 2:3-5, 9; 28:5) Olsem wanem? Yu wok long kisim dispela save em i laik givim?
10 Kibung i strongim yumi long luksave long ol tok bilong stiaim tingting taim yumi ritim Baibel. (2 Ti. 3:16, 17) Stadi gut long ol dispela tok bilong kisim stretpela save long ol samting Jehova i tok long en. Lusim hap taim bilong tingim tingim ol dispela tok bilong stiaim tingting na putim ol tru long tingting na bel bilong yu. Dispela bai skulim gut tingting bilong yu bambai yu inap skelim gut ol samting yu laik mekim. (Jos. 1:8) Nau yumi ken tingim sampela samting i save painim planti man na lukim olsem wanem pasin bilong bihainim ol tok bilong Baibel i helpim yumi long stap gut.
11 ‘Bai mi bihainim wanpela kain stail bilong pasim ol klos na bilas?’ Stail bilong ol klos na bilas bilong ol man bilong graun i kamapim pasin bilong bikhet. Dispela kain pasin i stiaim ol man long putim ol klos i no gutpela o i kamapim klia ol hap skin bilong ol. Wanem ol tok bilong Baibel bilong stiaim tingting bai helpim yumi long sakim ol dispela kain pasin? Taim yumi skulim gut tingting bilong yumi, bai yumi tingim tok bilong stiaim tingting i stap long 1 Timoti 2:9, 10, long “putim ol gutpela klos samting, inap tasol long . . . ol [manmeri] i laik bihainim tok bilong God.” Ol narapela tok bilong stiaim tingting i stret long dispela samting i stap long 2 Korin 6:3 na Kolosi 3:18, 20.
12 ‘Mi inap mekim wanem na bai famili bilong mi inap pas gut wantaim?’ Em i bikpela samting long olgeta bilong famili i mas toktok gut wantaim. Jems 1:19 i tok: “Olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” Narapela i mas putim gut yau na toktok gut wantaim narapela insait long famili. Tasol sapos yumi mekim tok long hatpela pasin, o long pasin antap, o long pasin olsem yumi no tingim gut narapela, orait maski dispela tok i tru, em inap bagarapim bel bilong narapela na i no helpim em. Olsem na maski yumi man o meri marit, o papa o mama o pikinini, yumi mas mekim ol “gutpela tok tasol, em olkain tok ol man i save laik long harim.”—Kl. 4:6.
13 ‘Pasin bilong laikim tumas mani kago i save stiaim mi?’ Pasin bilong laikim tumas mani kago em i wanpela samting bilong graun i save mekim laip bilong man i hatwok moa. Em i no helpim man long stap amamas. (Sav. 5:10; Lu. 12:15; 1 Ti. 6:9, 10) Bilong helpim yumi long abrusim pasin bilong laikim tumas mani kago, Jisas i lainim yumi long dispela bikpela tok: Ai bilong yumi i mas gutpela. Sapos yumi bihainim stretpela tingting, na yumi no kisim planti kain kain samting bilong skin, em bai mekim na yumi ken lukluk i go stret long ol wok bilong Kingdom, na olgeta narapela samting i stap namba tu tasol.—Mt. 6:22, 23, 33.
14 Ol Samting Yumi Laik Kamapim: Baibel i gat planti gutpela tok bilong stiaim tingting em yumi inap bilip tru long en, na ol i stiaim yumi taim yumi mas skelim ol samting yumi laik mekim. Yumi mas lain long ol dispela tok, tingim tingim long bel, na save long pasin bilong bihainim ol dispela tok long laip bilong yumi. Long dispela rot yumi skulim gut tingting bilong yumi “long skelim wanem ol pasin i gutpela na wanem ol pasin i nogut,” na dispela bai helpim yumi yet na litimapim nem bilong Jehova.—Hi. 5:14.