Autim Stret Tok Bilong God
1 Taim Filip i autim tok long wanpela ofisa, “pastaim em i autim as bilong tok dispela man i bin ritim, na bihain em i autim ol arapela tok bilong gutnius bilong Jisas.” (Ap. 8:35) Filip i “autim stret tok tru bilong God.” (2 Ti. 2:15) Olsem wanem? Yu save yusim Baibel taim yu autim tok?
2 Tok Bilong God em i as bilong olgeta samting yumi bilip long en na lainim ol man long en. (2 Ti. 3:16, 17) Em i pulim ol man i kam long Jehova na i skulim ol bilong kisim laip. Olsem na em i bikpela samting long yusim Baibel taim yumi autim tok na yumi no ken toktok tasol long ol samting yumi save tingting long en. (Hi. 4:12) Planti man i gat liklik save tasol long Baibel, olsem na yumi mas ritim stret long Baibel bilong soim ol man ol gutpela tok bilong stiaim yumi na ol gutpela samting ol man inap wet long kisim long bihain.
3 Ritim Stret Long Baibel: Taim yu go long ol haus, yu ken putim buk o nius yu tingting long tilim long wanpela bek o bilum na holim Baibel long han bilong yu. Taim yu toktok wantaim man, i no hatwok long yu opim Baibel na ating man bai i no ting yu laik mekim wanpela longpela tok long em. Sanap gut bambai man inap lukluk long Baibel bilong yu taim yu ritim. Ating yu ken askim em long ritim wanpela ves. Em bai pilim moa yet ol tok yu autim taim em inap lukim tok Baibel i mekim na i no harim tasol tok bilong yu. Tru, bilong em i ken kisim gut tok bilong ves, kamapim klia ol bikpela tok bilong en.
4 Kamapim Wanpela Skripsa: Taim yu kamapim pinis nem bilong yu, yu ken tok: “Ol manmeri i save go lukim kain kain man bilong ol i ken soim rot long ol. Yu ting husat inap givim nambawan gutpela tok bilong stiaim yumi? [Larim man i bekim tok.] Yu ting olsem wanem long dispela tok? [Ritim Sindaun 2:6, 7, na larim man i bekim tok.] Save bilong ol man i sot tru, na i bagarapim bel bilong planti man. Tasol gutpela tingting na save bilong God em samting yumi inap bilip tru long en na em i helpim tru yumi.” Soim buk o nius yu laik tilim, na kamapim wanpela tok i soim gutpela tingting bilong God inap helpim yumi.
5 Jisas i kamapim ol tok bilong buk bilong God bilong helpim ol man i gat gutpela bel. (Lu. 24:32) Pol i kamapim ol tok bilong buk bilong God bilong truim ol tok em i lainim ol man long en. (Ap. 17:2, 3) Bai yumi kisim bikpela amamas moa na bai yumi strong moa long autim tok taim yumi lain long autim stret Tok Bilong God.