Ol Man Olsem “Presen” i Amamas Long Lukautim Ol Manmeri Bilong God
1 Jehova i mekim gutpela pasin na long rot bilong Pikinini bilong em, em i givim ol man olsem “ol presen”! (Ef. 4:8, 11, 12) Ol i save mekim ol kain kain wok, olsem ol i save wok strong long lukautim ol manmeri bilong God. (1 Pi. 5:2, 3) Dispela pasin i helpim yumi olgeta. Ol dispela man i save tingim tru i stap bilong ol narapela long ol samting bilong spirit, olsem ol man i karim hevi, o ol i nupela long kongrigesen, o ol i gat sampela pasin kranki, o ol i bin lusim lain bilong God.—Fl. 2:4; 1 Te. 5:12-14.
2 Taim ol samting i kamap long graun i mekim yumi pret, ol dispela wasman i save stap olsem “ples hait ol manmeri i ken i go long en long taim bilong bikpela win na ren.” Taim yumi pilim les o yumi karim bikpela hevi na long taim i gat wok long narapela i mas mekim gut bel bilong yumi, ol dispela wasman i save givim nupela strong long yumi “olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.”—Ais. 32:2.
3 Strongim Bel Bilong Ol Man i Lusim Wok Autim Tok: Ol elda i save wok strong long strongim bel bilong ol man i save autim tok wan wan taim o ol i lusim wok autim tok olgeta, na ol i save helpim ol long kirap gen long wok oltaim wantaim kongrigesen. Pasin bilong ol elda long i go lukim ol brata sista i bin helpim planti long kam oltaim long ol miting bilong kongrigesen, na kamap strong long ol samting bilong spirit na nau ol inap insait gen long wok autim tok. Olgeta dispela samting ol elda i mekim i kamapim klia pasin bilong Jehova long tingim gut yumi na wok bos bilong Jisas Krais. Em i makim pasin yumi ken bihainim long tingim gut ol sipsip i lus.—Mt. 18:12-14; Jo. 10:16, 27-29.
4 Ol wasman i save lukluk long ol samting i makim olsem man i wok long kamap slek long ol samting bilong spirit. Taim man i mekim ol samting i makim olsem em i bel hevi, o em i kam wan wan taim long ol miting, o em i no givim bel tumas long autim tok, dispela inap makim olsem em i mas kisim helpim long ol samting bilong spirit. Ol elda i amamas long helpim ol man i laik bihainim pasin bilong ol man bilong graun long bilas samting o ol man i skelim skelim ol lain insait long kongrigesen. Ol gutpela wasman i gat pasin bilong tingim gut na laikim tru ol narapela na ol i redi long ‘givim laip bilong ol yet’ bilong helpim ol narapela long kirap gen long laikim tru Jehova.—1 Te. 2:8.
5 Long bipo, ol hevi bilong sik samting, na mani, na famili i mekim na sampela Kristen em ol i dediket pinis ol i lusim kongrigesen na ol i kamap slek olgeta long ol samting bilong spirit. Tasol ol elda i no save sutim tok long ol, nogat, long gutpela pasin ol i save tokim ol olsem Jehova i save tingim ol sipsip bilong em na em bai strongim ol long taim bilong hevi. (Sng. 55:22; 1 Pi. 5:7) Ol gutpela wasman inap helpim ol manmeri long luksave olsem sapos ‘ol i go klostu long God, em bai go klostu long ol,’ na em bai mekim gut bel bilong ol na strongim ol.—Jems 4:8; Sng. 23:3, 4.
6 Amamas Long Ol Lapun: Ol gutpela wasman i save tingim gut ol lain em ol narapela i no save tingim ol. Long olgeta kongrigesen i gat sampela em ol i lapun na skin i no strong moa, o sampela hap bilong skin i bagarap. Ol i no inap mekim bikpela wok bilong autim tok olsem bipo, long wanem, ol i no gat strong moa bilong mekim olsem. Tasol maski wanem wok ol i mekim bilong autim tok, dispela i olsem ol i helpim tru dispela wok bilong autim tok. (Mt. 25:15) Maski ol i autim tok inap 15 minit tasol, ol i mas raitim long ripot, na nem bilong ol bai stap yet long lista bilong ol pablisa i autim tok long olgeta mun.
7 Ol dispela man ‘olsem presen’ ol i tingim tru ol samting em ol brata bilong ol i sot long en long dispela taim bilong Memorial. Nau em i gutpela taim bilong ol elda long wok strong long helpim olgeta em ol i bin lusim lain bilong God na bai ol inap pilim gen pasin bilong amamas na bel isi i stap long kongrigesen! Yumi save amamas taim yumi lukim ol kain man olsem em ol i “bilip long Bikpela,” ol i kam long ol miting bilong kongrigesen, na mekim wok autim tok na ol i strongim gen bilip bilong ol long ofa bilong baim bek man.—Ga. 6:10; Lu. 15:4-7; Jo. 10:11, 14.