Wok Bilong Autim Tok Bilong Kingdom i Helpim Ol Man Long Abrusim Bagarap!
1 Em i nambawan bikpela wok i kamap nau long dispela graun. God Jehova, Jisas Krais, na planti tausen ensel ol i tingim tru dispela wok. Em wanem wok, na bilong wanem em i bikpela samting? Em wok bilong autim tok bilong Kingdom, na em i helpim ol man long abrusim bagarap!—Ro. 1:16; 10:13, 14.
2 Sampela man i ting yumi inap helpim gut moa ol narapela sapos yumi mekim ol wok bilong mekim graun i kamap gutpela ples bilong i stap long en. Planti man i wok strong long kamapim bel isi, oraitim ol sik, na stretim ol hevi bilong mani. Tasol wanem samting bai helpim tru ol man?
3 Nambawan Bikpela Wok: Ol tok bilong Kingdom i stori gut long as bilong i stap bilong ol man, na bilong wanem ol pen na hevi i painim ol, na long gutpela samting ol i ken wetim i kamap bihain. Dispela gutnius i helpim ol man long kamap pren bilong Jehova, na long dispela rot ol inap kisim “bel isi God i save givim.” (Fl. 4:7) Tok bilong Kingdom tasol inap helpim ol man long karim ol hevi long nau, na tu, em i stori gut long olsem wanem ol man inap abrusim bagarap taim God bai pinisim ol pasin nogut long bihain. (1 Jo. 2:17) Olsem na em i bikpela samting long yumi mas wok strong long autim tok bilong Kingdom, a?
4 Olsem: Sapos banis bilong pasim bikpela wara long wanpela ples i laik bruk, na ol manmeri bilong dispela ples i slip i dai, yu ting wanem rot i gutpela bilong helpim ol? Bai yu kisim baket na rausim sampela wara long dispela banis wara? O bai yu bilasim dispela ples em bagarap i laik painim em? Nogat! Yu mas kirapim ol lain bilong dispela ples, na toksave long bagarap i laik kamap, na helpim ol long ranawe! Long nau bikpela bagarap i laik painim ol manmeri i slip long ol samting bilong spirit. (Lu. 21:34-36) Klostu nau ol pasin nogut bilong dispela graun bai pinis, olsem na yumi mas wok strong tru long autim tok long olgeta man yumi bungim!—2 Ti. 4:2; 2 Pi. 3:11, 12.
5 No Ken Les Long Mekim Dispela Wok: Yumi mas painim rot bilong autim gutnius long planti man moa em ol i gat gutpela bel—long haus bilong ol, long rot, long telefon, na long kain kain taim na ples. Dispela wok Jehova i bin givim yumi em i nambawan bikpela wok i winim olgeta narapela wok yumi inap mekim. Sapos yumi givim bel olgeta long mekim dispela wok, ‘God bai kisim bek yumi yet na ol manmeri i harim tok bilong yumi.’—1 Ti. 4:16.