Stap Wanbel Wantaim
1 Sampela taim yu bin tingting long ol gutpela samting long bodi bilong yumi man? (Sng. 139:14) Olgeta wan wan hap bilong bodi i save wok gut wantaim. Baibel i tok kongrigesen Kristen i olsem wanpela bodi em olgeta hap bilong en i wok gut wantaim. Aninit long Het bilong ol, em Krais, olgeta insait long kongrigesen ol i ‘mekim gut wok na pas gut wantaim.’ (Ef. 4:16) Ol manmeri bilong Jehova ol i stap wanbel, olsem na Jehova inap mekim wok long ol bilong kamapim ol gutpela samting.
2 Ol manmeri bilong kongrigesen long taim bilong ol aposel ol i bin “wanbel tru” long lukautim narapela narapela long ol samting bilong spirit na skin. (Ap. 2:44-47) Jehova i helpim ol na ol i wanbel na karim hevi taim ol man i mekim nogut tru long ol, na ol i winim hevi. (Ap. 4:24-31) Ol i autim tok bilong Kingdom long wanem wanem hap ol i go long en, na ol i autim gutnius long olgeta hap ol man i sindaun long en long dispela taim bipo. (Kl. 1:23) Nau long taim bilong yumi, kongrigesen Kristen i stap wanbel long mekim ol wankain samting, tasol ol i mekim bikpela wok moa. Wanem ol samting i save helpim ol long i stap wanbel wantaim?
3 Tok Bilong God i Bungim Ol: Long olgeta hap bilong graun, lotu bilong yumi i mekim yumi i stap wanbel. Olsem wanem dispela samting inap kamap? Yumi luksave long rot bilong Jehova long givim ol kaikai bilong spirit “long taim bikman i makim.” (Mt. 24:45) Na tu, yumi amamas tru long ol man i olsem “presen” em i givim bilong mekim wok tisa long kongrigesen. Taim yumi daunim yumi yet na kisim ol kaikai bilong spirit Jehova i givim, save bilong yumi long Tok Bilong God bai kamap bikpela moa na dispela bai kirapim yumi ol disaipel bilong Jisas long bihainim pasin bilong em. Yumi mas wok yet long stadi long Tok Bilong God, na wok strong long i stap “wanbel tru” long bilip. (Ef. 4:8, 11-13) Olsem wanem? Yu save ritim Baibel long olgeta de na bai yu inap strongim pasin bilong yumi long i stap wanbel long ol samting bilong spirit?
4 Bung Wantaim Ol Kristen i Mekim Yumi i Stap Wanbel: Pasin sori i helpim yumi long pas gut wantaim long ol miting Kristen. Long ol dispela miting, yumi save ‘tingting long ol arapela manmeri bilong God.’ (Hi. 10:24, 25) Dispela i makim olsem yumi no tingim tasol skin bilong ol, nogat; yumi kisim save gut long ol brata bilong yumi, na yumi tingim ol olsem Jehova i save tingim ol, olsem ol i gutpela samting tru. (Hag. 2:7, NW ) Taim yumi harim ol i autim bilip bilong ol, dispela i kirapim yumi long laikim ol moa yet na pasin bilong yumi long i stap wanbel i kamap strong moa. Olsem wanem? Yu gat nem olsem man o meri bilong go oltaim long ol miting bilong kongrigesen?
5 Ol Wanwok Bilong Autim Tok: Pasin bilong autim gutnius wantaim ol wanbilip i save mekim yumi i stap wanbel long mekim laik bilong God. Aposel Pol i laikim tru ol man ‘i wok wantaim em’ bilong mekim wok bilong Kingdom bilong God. (Kl. 4:11) Taim yumi toktok wantaim long ol ekspiriens na helpim narapela narapela long taim bilong autim tok, dispela bai helpim yumi long inapim wok Kristen bilong yumi na i strongim pasin wanbel namel long yumi.—Kl. 3:14.
6 Spirit Holi i Kamapim Pasin Wanbel: Taim yumi givim bel long mekim laik bilong Jehova, em bai givim spirit holi long yumi. Dispela bai helpim yumi long stretim ol hevi i kamap namel long yumi na stap wanbel wantaim. (Sng. 133:1) Spirit holi i kirapim yumi long bihainim “pasin bilong i stap wanbel.” (Ef. 4:3) Yumi wan wan inap strongim pasin wanbel namel long lain bilong God taim yumi kamapim pasin bilong spirit holi long ol samting yumi mekim long ol wanbilip.—Ga. 5:22, 23.
7 Pasin bilong i stap wanbel na mekim wok aninit long wok bos bilong Krais i save helpim bodi long “kamap bikpela na strongpela” long pasin sori. (Ef. 4:16b) Na bikpela samting moa yet, dispela pasin i litimapim nem bilong Jehova, em “God bilong givim . . . bel isi.”—Ro. 16:20.