Helpim i Kam Long Taim Stret
1 Taim aposel Pita i lukim olsem i gat wok long em i mas strongim ol wanbilip, pasin bilong tingim gut ol i kirapim em long givim ol gutpela tok bilong kirapim gen tingting bilong ol na strongim ol. (2 Pi. 1:12, 13; 3:1) Em i tokim “ol manmeri i bin kisim bilip” long wok yet long kisim ol pasin bilong spirit na bai ‘save bilong ol bai i no inap i stap nating, nogat, em bai i karim planti kaikai.’ (2 Pi. 1:1, 5-8) God i bin singautim na makim ol dispela manmeri bilong i stap lain bilong em yet, olsem na Pita i laik helpim ol long i stap olsem lain tru bilong God na bai ol “i no gat asua long wanpela samting,” na “stap wanbel wantaim God.” (2 Pi. 1:10, 11; 3:14) Long planti bilong ol dispela manmeri, tok bilong Pita i olsem helpim i kam long taim stret.
2 Long nau, ol wasman Kristen i gat wankain pasin bilong tingim gut ol manmeri bilong God. Long dispela taim bilong “planti hevi nogut tru,” planti wokboi bilong Jehova i wok long karim ol bikpela hevi. (2 Ti. 3:1) Ol hevi bilong mani, famili, o ol hevi long sindaun bilong wan wan man i mekim na ating sampela i mekim wankain tok olsem Devit: “Planti hevi i save kamap long mi, na mi no inap kaunim ol. Ol pasin nogut mi bin mekim ol i daunim mi pinis, olsem na mi no moa lukluk gut. Ol pasin nogut i kamap planti moa, na i winim namba bilong gras bilong het bilong mi. Bel bilong mi i malumalum, na mi no gat strong moa.” (Sng. 40:12) Ol dispela hevi inap kamap bikpela tru na ating ol man i karim ol hevi olsem bai i no tingim moa ol samting bilong spirit, na ol bai lusim wok bilong autim tok. Tasol maski ol i karim hevi, ol i ‘no lusim tingting long lo’ bilong Jehova. (Sng. 119:176) Nau em i taim stret bilong ol elda i helpim ol man olsem.—Ais. 32:1, 2.
3 Bilong mekim dispela wok, ol elda i bin kisim gutpela tok bilong kirapim ol long wok strong long helpim ol man i no insait long wok autim tok long nau. Ol elda i kirap pinis long wok strong tru long mekim olsem, na dispela wok bai i go inap long pinis bilong mun Epril. Ol wasman bilong Buk-Stadi bai go lukim ol pablisa i bin lusim wok autim tok bilong givim sampela helpim long ol long ol samting bilong spirit bambai ol i ken kirap mekim wok gen wantaim kongrigesen. Sapos ol i lukim olsem i gutpela long wanpela i mekim Baibel-stadi wantaim dispela pablisa, orait ol bai stretim rot bilong mekim olsem. Ol inap askim ol narapela pablisa long helpim dispela wok. Sapos ol i askim yu long mekim olsem, wok yu mekim inap helpim tru ol dispela pablisa, na moa yet sapos long gutpela pasin yu strongim ol.
4 I gat as na olgeta i ken amamas taim wanpela i kirap gen long mekim wok wantaim kongrigesen. (Lu. 15:6) Taim yumi mekim ol samting bilong strongim man i lusim wok autim tok, ating yumi mekim tok i kamap long taim stret.