Ol i Gat Ol Bagarap Bilong Skin—Tasol Wok Bilong Ol i Karim Kaikai
1 Sapos yu wanpela bilong ol planti Witnes Bilong Jehova em ol i gat bagarap bilong skin, wok bilong yu long autim tok inap karim yet kaikai. Sindaun bilong yu inap opim rot long yu ken autim tok na strongim ol narapela.
2 Autim Tok: Planti em ol i karim hevi long bagarap bilong skin, ol i insait tru long wok autim tok. Olsem: Wanpela sista em i bin kisim operesen na dispela i mekim na em i hatwok tru long wokabaut na toktok gut, em i lukim olsem em inap mekim wok bilong tilim nius sapos man bilong em i lusim ka klostu long rot em planti man i wokabaut i go i kam long en. Wanpela taim em i tilim 80 magasin insait long tupela aua tasol! Sindaun bilong yu i narapela kain, ating dispela i opim rot long yu bungim ol man we i hatwok long ol narapela long bungim ol, olsem ol wokman bilong haus sik na ol narapela lain i gat bagarap bilong skin wantaim famili bilong ol. Sapos i olsem, orait tingim ol olsem teritori bilong yu yet.
3 Wok autim tok bilong yu inap karim gutpela kaikai tru! Taim ol narapela i lukim strongpela tingting bilong yu na ol gutpela samting em tok i tru bilong Baibel i kamapim long i stap bilong yu, dispela inap kirapim ol long laikim tok bilong Kingdom. Na tu, taim yu bungim ol man i karim hevi, ol samting i bin painim yu yet inap helpim yu long mekim isi bel bilong ol long rot bilong Baibel.—2 Ko. 1:4.
4 Yu Inap Strongim Ol Narapela: Stori bilong Laurel Nisbet i bin kirapim tru yu, a? Maski em i bin stap insait long wanpela masin bilong waitlewa inap 37 yia, em i bin helpim 17 man long kisim stretpela save long tok i tru bilong Baibel. Olsem tasol, gutpela pasin bilong yu inap kirapim ol wanbilip long wok strong long mekim wok bilong Jehova.—g93 11/8 p. 18-21.
5 Maski sapos sindaun bilong yu i pasim yu long go autim tok olsem yu laik mekim, i gat rot yet bilong yu ken strongim ol narapela. Wanpela brata i tok: “Mi kisim save olsem maski man i gat bikpela bagarap bilong skin, em inap helpim tru ol narapela. Mi na meri bilong mi i stap olsem anka bilong sampela brata sista long kongrigesen. Sindaun bilong mipela i mekim na mipela i stap tasol na oltaim ol i ken kam lukim mipela.” Tru, bagarap bilong skin bilong yu inap mekim na sampela taim yu no inap mekim ol wok olsem yu gat laik long mekim. Tasol maski i olsem, sapos yu kisim sampela helpim, ating yu inap insait tru long wok autim tok. Olsem na sapos yu laik kisim sampela helpim, orait toksave long ol elda o ol narapela long kongrigesen em ol inap long helpim yu.
6 Jehova i save lukim olgeta samting yu mekim bilong mekim wok bilong em, na em i amamas long pasin bilong yu long givim bel tru long mekim wok. (Sng. 139:1-4) Taim yu bilip long em, em inap strongim yu na bai wok bilong yu long autim tok i karim kaikai na i gat as tru bilong en.—2 Ko. 12:7-10.