Ol Yangpela i Laik Save . . .

Olsem Wanem Mi Inap Karim Hevi Long Skin i Bagarap?

MAMA bilong wanpela yangpela meri, nem bilong em Magi, em i tok: ‘Magi em inap wokabaut, tasol olgeta hap bilong skin i no inap wok gut wantaim, na maus bilong em i hevi.’ Magi i gat wanpela bikpela sik. Na planti milion yangpela long olgeta hap i olsem Magi​—ol i gat sampela bagarap long skin.

Ating skin bilong yu tu i bagarap, a? Maski yu olsem yet taim mama i karim yu, o sik i bin painim yu, o yu bin kisim bagarap,a yu no ken ting yu no inap amamas na mekim wanpela samting. Sapos yu no les kwik, yu inap mekim sampela samting na bai dispela bagarap i no ken daunim yu olgeta.

Sampela Tingting Kranki

Taim hevi i painim yumi, olsem skin i bagarap samting, yumi laik bai dispela hevi i mas pinis tasol, a? Em pasin bilong yumi man. Ating aposel Pol i gat wanpela sik, olsem na ai bilong em i no strong. (Galesia 6:11) Taim em i go lukim ol Kristen long Galesia long namba wan taim, em i tok: “Wanpela kain sik i mekim, na mi bin kam autim gutnius long yupela namba wan taim. Bodi bilong mi i no strong, na dispela i givim bikpela hevi long yupela. Tasol yupela i no bin givim baksait long mi, na yupela i no les long i stap wantaim mi.” (Galesia 4:​13, 14) Sampela saveman i ting ai bilong Pol i nogut, olsem susu nogut i kamap long ai bilong em, olsem na skin bilong em i no gutpela long ai bilong ol man. “Tripela taim [Pol i] beten strong long Bikpela,” long em i ken rausim sik bilong em. Tasol God i no rausim. (2 Korin 12:​8, 9) Maski skin bilong Pol i bagarap, em i mekim gutpela wok long save bilong em, na em i bin raitim ol hap bilong Baibel, na em i mekim gutpela wok misineri.

Ating yu save, ol hevi yu no inap stretim, yu mas karim tasol, a? Wanpela meri, nem bilong em Jan Coombs, long buk bilong em (Living With the Disabled) em i tok: ‘Man i gat hevi long skin, em i no ken giamanim bel bilong em, em i mas bilip olsem em i gat dispela hevi. Na em i mas save, tru skin i no inap mekim olgeta wok, tasol em i man yet​—em i no narapela samting.’ Sapos i no gat rot bilong oraitim skin bilong yu, nogut yu giamanim bel bilong yu olsem yu no gat sik. Sapos yu mekim olsem, bai yu bel hevi na sutim tok long yu yet. Baibel i tok: “Ol man i gat gutpela tingting i save daunim ol yet.” (Sindaun 11:2) Olsem na sapos yu gat pasin daun, yu save, nau yu no inap mekim olgeta samting, long wanem, skin i bagarap. Tasol nogut yu laik stap wanpis, na yu no amamas moa long bung wantaim ol narapela man, o yu ting yu no inap mekim wanpela samting. Nogat. Pasin daun bai helpim yu long tingting stret long hevi bilong yu na tingim wanem wanem ol samting yu inap mekim.

Bihainim Savepasin

Na yu mas save tru long as bilong sik bilong yu. Baibel i tok: “Olgeta man i gat gutpela tingting, ol i save tingting gut pastaim na mekim samting.” (Sindaun 13:16; 10:14) Na long kisim gut save long sik bilong yu, i gutpela sapos yu kaunim sampela buk bilong dokta, o givim askim long dokta i save lukautim yu. Sapos yu mekim olsem, ating yu no gat tingting kranki long sik bilong yu, na dispela tingting i no ken pasim yu long mekim sampela samting yu inap mekim.

Nau ol i wokim rot bilong helpim ol man i gat kain kain bagarap long skin, na i gutpela yu save long ol dispela samting, na ating i gat wanpela samting inap helpim yu. Olsem: Nau ol i wokim lek na han giaman long ol nupela kain samting, na ol i no hevi olsem ol samting ol i bin wokim bipo. Olsem na man i pasim lek giaman o han giaman, em inap mekim planti samting olsem em lek o han tru bilong em. Wanpela nius (Time) i tok, i gat planti nupela samting ol saveman i wokim bilong helpim ol man i bagarap long skin. Olsem na ating yu inap kisim samting bilong helpim skin bilong yu.

Planti man i save mekim wok long ol liklik masin bilong helpim ol long harim tok, o ol i mekim wok long stik bilong wokabaut, o pasim hap ain samting long lek bilong helpim ol long wokabaut. Na sapos yu gat kain hevi olsem, ating dispela ol samting inap helpim yu. Tru ating planti yangpela i sem long mekim wok long kain samting olsem, a? Tasol King Solomon i tok: “Sapos tamiok bilong man i no sap na em i no sapim, orait em bai i hatwok tru long katim diwai.” (Saveman 10:10) Olsem na sapos i gat wanpela samting olsem stik bilong helpim yu long wokabaut, o liklik masin bilong helpim yu long harim tok, tasol yu no laik mekim wok long en, ating yu no inap tru mekim sampela samting yu inap kisim amamas long en. Sapos yu larim pasin bilong sem i pasim yu long mekim wok long sampela samting bilong helpim skin, bai yu hatwok moa. Solomon i tok moa: “Sapos man i gat gutpela tingting, bai em i mekim gutpela wok.”

Tru tumas, sapos yu mekim wok long sampela samting em inap helpim yu long wokabaut o lukluk o harim tok, bai yu kisim gutpela samting long en. Tru, ating bai yu hatwok, tasol no ken les long lain long mekim wok long stik bilong wokabaut, o lek giaman, o liklik masin bilong harim tok. Na ating skin bilong yu i narapela kain taim yu mas mekim wok long kain samting olsem, tasol dispela ol samting inap opim rot na yu ken mekim sampela samting em bipo yu no inap mekim. Wanpela yangpela meri bilong Afrika, em Jay, em i gat 18 krismas. Em i no save raun. Wanpela taim tasol em i bin lusim liklik kompaun em i save stap long en. Em i kirap na stadim Baibel wantaim ol Witnes Bilong Jehova na bihain em i go long ol miting Kristen. Bilong mekim olsem, em i mas wokabaut longwe liklik na em i no inap wokabaut long lek, em i mas wokabaut long han na pulim skin i go. Wanpela Witnes long Yurop i harim stori bilong Jay, olsem na em i salim wanpela sia long em i gat tripela wil. Jay inap stiaim sia long han bilong em. Yu ting em i sem long raun long en? Nogat, maski em i narapela kain sia tru. Dispela sia i helpim gut Jay na em inap go long olgeta miting na autim tok long haus bilong ol man.

Tingting Strong Long Winim Hevi!

Was gut long tingting kranki. King Solomon i tok: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.” (Saveman 11:4) Olsem wanem? Yu pret o sem long mekim sampela samting i gutpela yu mekim? Tingim Moses. Lain Israel i mekim wok kalabus long Isip, olsem na God i makim Moses long helpim ol. Tasol Moses i pilim olsem em i no inap mekim dispela wok, long wanem, ‘maus bilong em i hevi.’ (Kisim Bek 6:12) Tasol Moses i daunim em yet, em i no hambak, na bihain em inap autim gut tok long bikpela lain Israel.​—Lo 1:1.

Olsem na nogut yu pilim olsem yu no inap mekim wanpela samting. Yu mas strong na subim skin long mekim samting yu mas mekim! Birua i bin painim yangpela meri Becky taim em i gat 5-pela krismas, olsem na taim em i toktok, nek bilong em i no klia tumas. Tasol papamama bilong Becky i no larim em i les. Ol i strongim em long go insait long Skul Bilong Wok Autim Tok long Haus Kingdom bilong ol Witnes, olsem na taim Becky i gat 7-pela krismas em inap mekim ol tok long ai bilong ol man. Becky i tingim bek dispela samting na i tok: ‘Taim mi mas mekim ol tok, dispela i bin helpim mi. Em i kirapim mi long wok strong long stretim toktok bilong mi.’ Na papamama i strongim Becky long autim tok long haus bilong ol man. Becky i tok: ‘Ating planti man i no amamas long harim nek bilong mi na mi save tingting planti long dispela. Tasol mi save tingim as bilong wok bilong mi, olsem mi mekim ol samting bilong amamasim Jehova. Na mi save beten long Jehova na askim em long helpim mi.’ Long nau Becky i save mekim wok bilong God long olgeta de.

Craig i bikpela pinis na em i gat sik bilong kru na em i no inap wokabaut gut o toktok gut. Tasol em tu i no larim sik i pasim em long mekim bikpela wok long kongrigesen Kristen. Em i tok: ‘Mi bilip long Jehova na em i mekim gut long mi. Faipela taim mi bin insait long wok painia haptaim [wok autim tok]. Mi insait long Skul Bilong Wok Autim Tok, na tu, mi save lukautim ol akaun bilong kongrigesen.’

Na i gat “taim bilong lap,” olsem na sapos yu mekim traim ating yu inap insait long ol samting ol narapela yangpela i save lap na amamas long en. (Saveman 3:4) Becky i tok: ‘Mi no inap tru pilai spot olsem volibal, long wanem, skin bilong mi i no wok hariap wantaim. Tasol mi inap ran. Na bihain liklik long birua i painim mi, mama i bin strongim mi long lain long kikim wilwil. Olgeta taim mama i bin strongim mi long lain long ol nupela samting.’

Larim Narapela i Helpim Yu

I hatwok long karim hevi long skin i bagarap. Aposel Pol tu i gat wanpela kain bagarap bilong skin na dispela i olsem ‘nil i sutim skin bilong em.’ (2 Korin 12:7) Tasol i no olsem yu wanpela i mas karim dispela hevi. Yangpela meri, em Sarne, skru antap long lek bilong em i bagarap. Em i tok: ‘Mi save bung wantaim ol gutpela poroman Kristen. Na famili bilong mi, na ol pren bilong mi insait long kongrigesen i save strongim mi, olsem na dispela i samting tru bilong helpim mi.’ Tru tumas, nogut yu stap wanpis. (Sindaun 18:1) Na inap long skel bilong yu, i gutpela sapos yu “wok strong long mekim wok bilong Bikpela.” (1 Korin 15:58) Na Sarne i tok: ‘Mi save mekim ol wok bilong Kingdom, olsem na dispela i save helpim mi long kisim stretpela tingting long ol hevi bilong mi.’ Becky i tok: ‘Taim mi toktok wantaim ol narapela na hevi bilong ol i winim hevi bilong mi, nau mi no tingim tumas hevi bilong mi. Na ol dispela man i no olsem mi, ol i no gat gutpela samting bilong wetim i kamap.’

Bikpela samting yu mas mekim, em long askim Jehova long helpim na strongim yu. Jehova i save long ol laik na hevi bilong yu na em inap givim “bikpela strong” bilong em bilong helpim yu long karim hevi bilong yu. (2 Korin 4:7) Ating bihain bai yu gat wankain tingting olsem yangpela man Terrence. Terrence em wanpela Kristen na taim em i gat 9-pela krismas em i kamap aipas. Tasol em i no larim dispela samting i daunim em. Em i tok: ‘Maski mi aipas, em i no pasim mi long mekim wok, tasol mi mas hatwok liklik long mekim.’

[Ol Futnot]

[Piksa long pes 15]

Kisim save long sik bilong yu