Ol Yanpela i Laik Save
Bilong Wanem Mi Mas Karim Hevi Long Skin i Bagarap?
‘MI GAT 5-pela krismas’ Becky i tok. ‘Mi sindaun wantaim pren bilong mi long wilwil bilong em taim wanpela ka i baut long kona na kam bamim mipela.’ Wanem samting i kamap? Becky i tok: ‘Lek bilong mi i bruk na mi kisim bikpela birua long het bilong mi. Ol dokta i ting mi no inap i stap laip.’ Tasol Becky i stap laip na nau em i gat 16 krismas na em i meri bilong amamas. Tasol Becky i save karim hevi long samting i bin painim em. Em i tok: ‘Skin bilong mi i no strong.’
Skin bilong yangpela man Craig tu i bagarap. Em i gat bikpela sik CP (cerebral palsy). Craig i tok: ‘Sik CP i mekim na ol masol na ol rop wailis olsem nev long skin bilong mi i no wok gut wantaim kru taim kru i salim toksave long ol. Olsem na mi no inap wokabaut gut, mi mas wokabaut isi isi, nogut mi pundaun. Na tu, mi hatwok long toktok. Mi inap mekim olgeta dispela samting, tasol mi no inap mekim gut.’
Olsem wanem? Skin bilong yu tu i bagarap? Ol saveman i tok, long yia 2000 inap 59 milion yangpela long olgeta hap bai i gat sampela bagarap long skin. (Nius World Health, Janueri/Februeri 1985) Tasol maski planti i gat wankain hevi olsem yu, dispela i no inap tekewe hevi bilong yu taim yu laik ran na kalap na pilai, olsem ol narapela yangpela, a?
Hevi Bilong Ol Man Skin Bilong Ol i Bagarap
Long taim bilong Baibel skin bilong sampela man i bagarap tu. Sampela i lek nogut (2 Samuel 4:4; 9:13), aipas (Mak 8:22), hap skin i bagarap (Matyu 12:10). Maski wok i liklik, kain man olsem i hatwok long mekim.—Lukim Lo 28:29; Sindaun 26:7.
Ating yu tu yu hatwok long mekim sampela samting olsem pasim klos, o kaikai, o go long skul, na i mas i gat narapela i helpim yu long mekim ol dispela samting. Becky i tok: ‘Skin bilong mi long han sut i no wok gut, olsem na mi bin lain long rait long han kais. Mi bin hatwok tru long lain gen long wokabaut. Nau mi inap wokabaut, tasol sampela de mi wokabaut nogut.’ Tingim hevi bilong yangpela manki, skin bilong em i no go bikpela, em i sotpela tru. Em i tok: ‘Mi hatwok long putim han i go antap na mekim i dai lait. Ol i wokim ol haus bilong ol longpela man tasol.’—Buk How It Feels to Live With a Physical Disability.
Tasol ating skin tasol i no mekim yu i bel hevi. Wanpela nius (Parents) i tok: ‘Ol yangpela i save tingting tumas long tingting na toktok bilong ol narapela yangpela. Olsem na sapos skin bilong yangpela i bagarap, em bai tingting planti—ol narapela bai ting olsem wanem long skin bilong em. Taim narapela i laik toktok wantaim em na prenim em, em i kisim tingting kranki long dispela na em bai ting narapela i prenim em, long wanem, em i pilim sori tasol.’ Yumi laik bai narapela i mas laikim yumi—em pasin bilong yumi man, a? Tasol ating yu pilim olsem yu stap narapela kain long ol narapela. Yangpela Michelle i tok: ‘Taim mi liklik yet na i kam inap nau, mi bin stap narapela kain long ol narapela, long wanem, mi gat wanpela han tasol.’
Sapos skin bilong yu i narapela kain, ating sampela bai tok bilas long yu. Craig i tok: ‘Inap long gret 4 mi bin go long wanpela kain skul bilong ol pikinini em skin bilong ol i bagarap. Tasol long gret 5 mi kirap na go long skul bilong olgeta pikinini. Mi no karim planti hevi, tasol wanpela taim sampela manki i lap long pasin bilong mi long wokabaut.’ Becky tu i bin karim sampela hevi long skul. Taim ol dokta i katim em ol i bin bagarapim sampela rop insait long nek bilong em, em ol rop bilong helpim em long toktok. Olsem na taim em i toktok, nek bilong em i no klia tumas, em i kamap narapela kain. Becky i tok: ‘Long skul ol pikinini i bin tok mi gat nek olsem bilong tambaran.’
Na ating sampela manmeri tu inap bel nogut long yu. Taim ol i toktok wantaim yu ating ai bilong ol i lukluk nabaut, o ol i no laik toktok wantaim yu, ol i toktok wantaim papamama o man i stap wantaim yu. Ol i mekim olsem ol i no inap lukim yu o yu longlong samting. Tasol ating bikpela samting yu bel kaskas long en, em taim ol i tok sori long yu olsem yu wanpela hap kago i bagarap liklik.
Tingting Bilong God Long Dispela Samting
Tasol God i ting olsem wanem long yu? Yu ting skin bilong yu i bagarap long wanem em i no laikim yu? Tingim tok bilong Jisas taim em i bungim wanpela man i aipas “taim mama i karim em.” Ol disaipel bilong Jisas i tok: “Husat i mekim sin na taim mama i karim dispela man em i kamap aipas? Dispela man yet . . . o papamama?” Jisas i tok: “Dispela man i no mekim sin, na papamama bilong en tu i no mekim sin. Nogat.” (Jon 9:1-3) Tru tumas, dispela man na papamama bilong em i no bin mekim wanpela rong na nau man i kamap aipas. Em i aipas long wanem em na yumi olgeta i bin kisim sin long Adam. Aposel Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”—Rom 5:12.
Olsem na yumi save, God i no givim strafe long wanpela man na nau skin bilong em i bagarap. As bilong sampela bagarap em pasin bilong mekim nabaut long wanpela samting. Na sampela bagarap i kamap long wanem “taim nogut i save painim yumi olgeta.” (Saveman 9:11) Na skin bilong sampela yangpela i bagarap, long wanem, papamama i bin mekim nogut long ol o ol i no bin lukautim gut ol.
Tasol maski wanem hevi i painim yu, nogut yu ting God i ting skin bilong yu i no gutpela. Nogat. Em i save tingim yu olsem yu wanpela gutpela samting. Na em i tingim yu moa sapos yu save tingim em na aninit long em. (Luk 12:7) Em i save “wari” tru long yu na em i amamas long yu mekim wok bilong em. (1 Pita 5:7) Aposel Pol em i wanpela gutpela wokboi bilong God na em tu i gat wanpela kain bagarap bilong skin. Dispela i olsem ‘wanpela samting olsem nil i sutim skin bilong em.’ (2 Korin 12:7) Yumi ken amamas long wanem, “ol man i save lukluk long bodi. Tasol [Jehova i] save lukim tingting na laik bilong man.” (1 Samuel 16:7) Em i save long ol samting yu inap mekim long nau na long ol samting yu inap mekim bihain long nupela taim bilong em, taim skin bilong yu i gutpela olgeta.—KTH 21:3, 4.
Karim Hevi Narapela i Putim Long Yu
Sori tru, ating ol wanskul bilong yu na sampela narapela i no gat wankain tingting olsem God. Sampela taim ol i amamas long nogutim narapela. Olsem na yu no ken kirap nogut sapos sampela wankrismas bilong yu i tok bilas long hevi bilong yu. Sampela taim ol i no laik semim yu; ol i laik save olsem wanem dispela hevi i bin painim yu. Ating ol i no tingting gut o pilim gut hevi bilong yu, olsem na sampela taim ol i tok kranki.
Orait, yu ken mekim wanem? Sapos yu lukim olsem narapela i sem na em i no inap toktok gut wantaim yu, yu yet i mas kamapim tok long em. Yumi save, planti ol i sem o pret long wanpela samting sapos ol i no save gut long en. Helpim ol long save gut long tingting na pasin bilong yu, na ol i no ken tingim tasol skin bilong yu. Na sapos rot i op yu ken tok: ‘Olsem wanem? Yu save bilong wanem mi mas sindaun long dispela sia i gat wil?’ Dispela nius (Parents) i bin stori long wanpela tisa i gat wanpela lek tasol, na taim em i save ol sumatin i tingting long olsem wanem dispela samting i kamap, em i kirapim tok olsem: ‘Ating yupela i laik save wanem samting i bin painim mi, a? Yupela i laik save?’
Tasol maski yu strongim bel sampela taim, ating wan wan taim wanpela i bagarapim bel bilong yu. Becky i tok: ‘Taim mi yangpela tru na ol i tok bilas long mi, mi save bel hevi tru. Kirap long dispela taim i kam inap long nau mi save tingting tumas long toktok na pasin bilong narapela. Tasol nau mi no larim dispela i daunim mi. Na sampela taim mi inap lap long hevi bilong mi.’ Tru tumas, sapos yu inap lap, sampela taim dispela inap daunim bel hevi bilong yu. I gat “taim bilong lap.” (Saveman 3:4) Na King Solomon i tok moa: “Yu no ken harim olgeta toktok bilong ol manmeri.” (Saveman 7:21) Sapos wanpela i mekim tok bilas long yu, givim baksait long dispela tok. Becky i tok: ‘No ken tingting planti long tok bilong narapela.’
Samting Yu Wetim i Save Helpim Yu
Olgeta man i no gutpela olgeta. Rom 8:22 i tok: “Olgeta samting God i bin wokim . . . i krai nogut i stap, i kam inap long nau.” Tasol yu inap wetim gutpela samting bai kamap bihain. Tingim wanpela yangpela meri, nem bilong em Karol. Taim mama i karim em klostu em i yaupas olgeta. Birua i painim em taim em i raun long wilwil, olsem na ol i mas katim na rausim wanpela lek bilong em. Karol i laik bai em i ken i dai. Em i kirap na stadim Baibel wantaim ol Witnes Bilong Jehova na em i lain olsem bihain long nupela stretpela taim, i no gat wanpela man bai i tok: ‘Mi gat sik.’ (Aisaia 33:24) Em nau—Karol i save bihain skin bilong em bai kamap strong gen. God bai wokim mirakel!—Aisaia 35:5, 6.
Taim Karol i kisim save long God, dispela i mekim wanem long tingting bilong em? Sampela pren Kristen bilong em i tok: ‘Olgeta taim em i amamas na em i no tingim ol hevi bilong em. Planti pren bilong Karol i no save em i gat lek giaman na em i no inap harim gut tok bilong ol. Em i gat liklik masin bilong helpim em long harim tok, na taim ol narapela i toktok em i save lukim gut maus bilong ol, na long dispela rot em i save ol i toktok long wanem samting.’ Olsem na yumi save, Karol i no tingim tasol ol samting bai kamap bihain, a? Em i mekim sampela samting nau bilong helpim sindaun bilong em. Na yu tu inap mekim olsem.
[Piksa long pes 19]
Sampela i stori long hevi i bin painim ol bilong helpim narapela i laik save long en